فوتو: اشىق دەرەككوز
بۇل ءۇردىس مۇناي باعاسىنىڭ باررەلىنە 60 دوللاردان جوعارى ساقتالۋى, اقش فەدەرالدى رەزەرۆ جۇيەسىنىڭ مولشەرلەمەنى تومەندەتۋ تسيكلىنە ءوتۋى, سونداي-اق جاھاندىق دوللار يندەكسىنىڭ 8,3%-عا السىرەۋى سياقتى سىرتقى فاكتورلارمەن بايلانىستى.
دامۋشى ەلدەردىڭ ۆاليۋتالارى دا جىل باسىنان بەرى ورتا ەسەپپەن 8,3%-عا نىعايعان, وسىنىڭ اياسىندا قازاقستان نارىعىنا دەگەن حالىقارالىق ينۆەستورلاردىڭ قىزىعۋشىلىعى ارتىپ وتىر.
«ينفلياتسيالىق قىسىمدى تومەندەتۋگە جانە ماكروەكونوميكالىق ورتانىڭ بولجامدى بولۋىن ەسەلەۋگە باعىتتالعان ۇكىمەت پەن ۇلتتىق بانكتىڭ ۇيلەسىمدى ساياساتى تەڭگەنىڭ نىعايۋىنا ايتارلىقتاي ۇلەس قوستى. اتاپ ايتقاندا, ۇكىمەت, ۇلتتىق بانك جانە اگەنتتىك 2026-2028 جىلدارعا ارنالعان ماكروەكونوميكانى تۇراقتاندىرۋ جانە حالىقتىڭ ءال-اۋقاتىن ارتتىرۋ جونىندەگى بىرلەسكەن ءىس-قيمىل باعدارلاماسىن ىسكە اسىرىپ وتىر. اتالعان باعدارلاما سۇرانىس پەن ۇسىنىس اراسىنداعى تەڭگەرىمسىزدىكتى جويۋعا, بيۋدجەت شىعىستارىنىڭ تيىمدىلىگىن ارتتىرۋعا, ميكرو جانە ماكروپرۋدەنتسيالدى رەتتەۋ شارالارىن ىسكە اسىرۋعا, حالىقتىڭ ناقتى تابىسىن وسىرۋگە جانە ينفلياتسيانى تومەندەتۋ مەن تۇراقتاندىرۋ ارقىلى ورنىقتى ەكونوميكالىق وسىمگە جاعداي جاساۋعا باعىتتالعان», دەلىنگەن مالىمدەمەدە.
ۇلتتىق بانكتىڭ قاتاڭ ءارى دايەكتى شەشىمدەرى نارىق سەنىمىن ارتتىرىپ, تەڭگەدەگى قۇرالداردىڭ ناقتى كىرىستىلىگىن كوبەيتتى. قازان ايىنان قاراشا ايىنا دەيىن بەيرەزيدەنتتەر قازاقستاننىڭ مەملەكەتتىك باعالى قاعازدارىنا 1,1 ميلليارد دوللار ينۆەستيتسيا قۇيدى. وسىلايشا, جالپى ينۆەستيتسيا كولەمى 3,6 ملرد دوللارعا جەتتى.
بۇل قارجى مينيسترلىگى ءۇشىن قارىز الۋ قۇنىن تومەندەتۋگە مۇمكىندىك بەردى: جەلتوقساندا 9 جىلدىق مبق 16,1% كىرىستىلىكپەن ورنالاستىرىلدى (قازاندا – 17,2%).
ۇلتتىق بانك شەتەلدىك ينۆەستورلاردىڭ ءوسىپ كەلە جاتقان ۆاليۋتالىق ۇسىنىسى مەن سىرتقى قولايلى احۋال تەڭگە باعامىنا تىكەلەي اسەر ەتكەنىن اتاپ ءوتتى.
«مەملەكەتتىك باعالى قاعازدار نارىعىنىڭ ينفراقۇرىلىمىن دامىتۋ بويىنشا ۇلتتىق بانكتىڭ جۇيەلى جۇمىسى – وپەراتسيالاردىڭ اشىقتىعىن ارتتىرۋ, كىرىستىلىك قيسىعىن قالىپتاستىرۋ, بەيرەزيدەنتتەر ءۇشىن قولجەتىمدىلىك پەن ەسەپ ايىرىسۋ راسىمدەرىن جەتىلدىرۋ – نارىقتىڭ ساپالى نەگىزىن قالىپتاستىرىپ, شەتەلدىك ينۆەستورلاردىڭ قىزىعۋشىلىعىن قولداپ وتىر», دەلىنگەن حابارلامادا.
سونىمەن قاتار قازىرگى ايىرباس باعامى ديناميكاسى ەكونوميكالىق ساياسات ساپاسىنىڭ جاقسارعانىن جانە بولجامدى ماكروورتا قالىپتاسقانىن كورسەتەتىنى اتاپ ءوتىلدى. تەڭگەمەن باعالاناتىن قۇرالدارعا ينۆەستورلاردىڭ سەنىمى ارتقان.
ۇلتتىق بانك ەركىن وزگەرمەلى ايىرباس باعامى رەجيمىنىڭ ساقتالاتىنىن جانە تەڭگە باعامىنىڭ ەكىجاقتى قالىپتى قۇبىلۋىنا جول بەرىلەتىنىن مالىمدەدى.
«ۆاليۋتا نارىعىنداعى جاعداي تۇراقتى باقىلاۋدا. قازىرگى ۋاقىتتا ۇلتتىق بانك الىپساتارلىققا قاتىستى بەلسەندىلىكتى جانە وعان ارالاسۋعا يتەرمەلەيتىن قانداي دا ءبىر فاكتورلاردى بايقاپ وتىرعان جوق», دەلىنگەن رەسمي اقپاراتتا.
بۇعان دەيىن ساراپشىلاردىڭ تەڭگە باعامىنىڭ كۇشەيۋىن ىشكى نارىقتاعى ۇسىنىستىڭ ارتۋىمەن جانە سىرتقى ەكونوميكالىق فاكتورلارمەن بايلانىستىرىپ وتىرعانىن جازعان ەدىك.
