فوتو: سۋ رەسۋرستارى جانە يرريگاتسيا مينيسترلىگى
مينيستر نۇرجان نۇرجىگىتوۆ جاس ونەرتاپقىش دانا قادىربەكپەن ارنايى كەزدەسۋ وتكىزىپ, ونىڭ اۋادان سۋ جيناۋعا ارنالعان جاڭا تەحنولوگياسىمەن تانىستى. وقۋشىنىڭ ويلاپ تاپقان قۇرىلعىسى زاماناۋي نانوماتەريالداردى پايدالانىپ, ەلەكتر جەلىسىنە تاۋەلسىز جۇمىس ىستەيدى جانە اۋاداعى ىلعالدى ءتيىمدى كوندەنساتسيالاۋعا مۇمكىندىك بەرەدى.
كەزدەسۋ ناتيجەسىندە مينيسترلىك پەن جاس عالىم جوبانى بىرلەسىپ تالداپ, پيلوتتىق رەجيمدە سىناقتان وتكىزۋگە, عىلىمي دەرەكتەرمەن الماسۋعا جانە تەحنولوگيانىڭ كەڭ اۋقىمدى قولدانىسىن زەرتتەۋگە باعىتتالعان مەموراندۋمعا قول قويدى.
مينيستر نۇرجان نۇرجىگىتوۆ اتالعان جوبانى جۇزەگە اسىرۋعا بارلىق جاعداي جاسالاتىنىن ايتىپ, عىلىم جانە يننوۆاتسيالىق تەحنولوگيالار دەپارتامەنتىنە پيلوتتىق ەنگىزۋ جۇمىستارىنا قولداۋ كورسەتۋدى تاپسىردى. ول دانا قادىربەككە العىس حات پەن سىيلىق تابىستاپ, سۋ ۇنەمدەۋ ماسەلەسىن كوتەرگەن جاس تالانتتاردى قولداۋدىڭ ماڭىزىن اتاپ ءوتتى.
«دارىندى جاستاردىڭ سۋ ۇنەمدەۋ ماسەلەلەرىنە بەيجاي قاراماي, بىرەگەي عىلىمي جوبالار ازىرلەپ, جۇزەگە اسىرىپ جۇرگەنى قۋانتادى. ءبىز بۇل جوبانى بۇرىننان باقىلاپ كەلەمىز. ول سۋ رەسۋرستارىن ۇنەمدەۋدە ەرەكشە شەشىم ۇسىنادى, بۇل اسىرەسە شالعاي ايماقتار ءۇشىن ماڭىزدى. قۇرىلعىنىڭ ىلعال از كەزدە دە اتموسفەرادان سۋ جيناي الۋى ونىڭ پراكتيكالىق قولدانىلۋىن كەڭەيتەدى. قازىرگى زاماناۋي نانوماتەريالدار مەن كۇن ەنەرگياسىن قولدانۋ بۇل جوبانى «جاسىل» يننوۆاتسيالاردىڭ ماڭىزدى جوباسىنا اينالدىرادى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
دانانىڭ جۇمىسى بۇعان دەيىن حالىقارالىق دەڭگەيدە جوعارى باعالانعان. ونىڭ جوباسى وڭتۇستىك كورەياداعى WICO حالىقارالىق كورمەسىندە 36 ەلدەن كەلگەن قاتىسۋشىلار اراسىنان ءبىرىنشى ورىن الىپ, يندونەزياداعى YISF حالىقارالىق جارمەڭكەسىندە دە توپ جاردى. سونىمەن قاتار قازۇۋ-دىڭ عىلىمي كونفەرەنتسياسىندا جانە Kazakhstan Smart Space بايقاۋىندا جۇلدەلى بولعان.
جاس ونەرتاپقىشتىڭ ازىرلەمەسى UNIDO-مەن بىرلەسكەن Global Cleantech Innovation Programme (GCIP) حالىقارالىق باعدارلاماسىنىڭ جارتىلاي فينالىنا دا ەنگەن. بۇل باعدارلاماعا قازاقستان بويىنشا 500-دەن استام ءوتىنىش تۇسكەن ەدى.
«بۇگىنگى كەزدەسۋ وتە جاقسى اسەر قالدىردى. سۋ رەسۋرستارى جانە يرريگاتسيا مينيسترلىگىنىڭ جاس عالىمدارعا بەلسەندى قولداۋ كورسەتىپ جاتقانى ەرەكشە قۋانتادى. مۇنداي قولداۋ مەنىڭ عىلىمي جۇمىسىمدى ءارى قاراي جالعاستىرۋىما ۇلكەن موتيۆاتسيا بەرەدى. ءمينيستردىڭ بۇگىن بەرگەن تاپسىرماسىنىڭ ارقاسىندا ءبىز قۇرىلعىنى دالالىق جاعدايدا سىناپ كورۋگە جانە جوبانى پيلوتتىق رەجيمدە ىسكە اسىرۋعا مۇمكىندىك الامىز», دەدى دانا قادىربەك.
