ورالداعى جاڭا عيماراتتىڭ جالپى اۋماعى – 2 025 شارشى مەتر. كەشەن پاراوليمپيالىق جانە سۋردوليمپيالىق سپورت تۇرلەرىمەن اينالىسۋعا تولىقتاي بەيىمدەلگەن. مۇندا ۆولەيبول, باسكەتبول, گولبول, پاۋەرليفتينگ, بوچچا, بادمينتون, ساداق اتۋ, دزيۋدو, گرەك-ريم كۇرەسى, ەركىن كۇرەس, ۇستەل تەننيسى سەكىلدى سپورت تۇرلەرى بويىنشا جاتتىعۋ جاساۋعا مۇمكىندىك بار. قۇرىلىسىنا شامامەن 820 ملن تەڭگە قاراجات كەتكەن كەشەننىڭ جالپى سىيىمدىلىعى – 200 ادام.
-مەملەكەت باسشىسى قاسىم-جومارت كەمەل ۇلى توقاەۆ ءوز سوزىندە: «كاسىپكەرلەردىڭ الەۋمەتتىك جاۋاپكەرشىلىگى دە, جەرگىلىكتى قاۋىمداستىقتارمەن ۇزاق مەرزىمگە ارنالعان سەرىكتەستىك قاتىناس ورناتۋعا دەگەن قۇلشىنىسى دا زور. بۇل – قۋانارلىق جاعداي. مەملەكەت پەن بيزنەستىڭ ىقپالداستىعى ارقىلى كوپتەگەن الەۋمەتتىك ماسەلە شەشىمىن تاۋىپ جاتىر», دەپ اتاپ وتكەن ەدى. ءبىزدىڭ بۇگىنگى جاڭا سپورت نىسانىنىڭ اشىلۋى دا پرەزيدەنت ءسوزىنىڭ جارقىن كورىنىسى, ايقىن دالەلىنىڭ ءبىرى دەر ەدىم. بۇل نىسان – ينكليۋزيۆتى قوعام قۇرۋعا باعىتتالعان ناقتى قادام, مەملەكەتىمىزدىڭ الەۋمەتتىك جاۋاپكەرشىلىگىنىڭ جەمىسى, - دەدى ناريمان تورەعاليەۆ الەۋمەتتىك باستامانىڭ ماڭىزدىلىعىنا توقتالىپ.
ءوڭىر باسشىسىنىڭ ايتۋىنشا, سوڭعى ەكى جىلدا وبلىستا 12 سپورت نىسانى پايدالانۋعا بەرىلگەن, ال بيىل تاعى 9 نىساننىڭ قۇرىلىسى ءجۇرىپ جاتىر. سونىڭ بەسەۋى جىل سوڭىنا دەيىن ەل يگىلىگىنە تاپسىرىلماق.
«بۇل نىسان – ءبىزدىڭ ەلگە دەگەن جاناشىرلىعىمىزدىڭ بەلگىسى. كەشەن مۇمكىندىگى شەكتەۋلى جانداردىڭ ومىرگە دەگەن قۇلشىنىسىن ارتتىرىپ, جاڭا بەلەستەرگە جەتۋىنە دەم بەرەدى دەپ سەنەمىز», دەدى وسى جيىنعا ارنايى كەلگەن تيمۋر تۋرلوۆ.
جاڭا كەشەننىڭ بازاسىندا «مۇمكىندىگى شەكتەۋلى جاندارعا ارنالعان سپورت كلۋبى» جۇمىس ىستەيدى. بۇگىندە اتالعان كلۋبتا سپورتتىڭ 20 تۇرىنەن 250-گە جۋىق سپورتشى جاتتىعىپ ءجۇر ەكەن. «ولاردىڭ 74-ءى ۇلتتىق قۇرامانىڭ قاتارىندا» دەيدى كلۋب باسشىسى قايىربەك وڭداعانوۆ.
2016 جىلى اشىلعان بۇل كلۋب وسى كەزگە دەيىن تۇرعىن ءۇيدىڭ استىڭعى قاباتىندا جۇمىس ىستەپ كەلگەن ەدى. ەندى كەڭ ءارى قولايلى جەكە عيمارات بەرىلگەن سوڭ وڭىردە پاراليمپيادالىق جانە سۋردوليمپيادالىق سپورتتىڭ دامۋىنا ۇلكەن سەرپىن بولارىنا سەنەمىز دەيدى سپورتشىلار.
