قوس ماڭىزدى شاراعا توتەنشە جاعدايلار ءمينيسترى شىڭعىس ءارىنوۆ ارنايى قاتىستى.
– توتەنشە جاعدايلار مينيسترلىگىندە العاش رەت اۋە تەحنيكاسىنا ارنالعان ارنايى انگار اشىلىپ وتىر. بۇل ءبىزدىڭ اۆياتسيانىڭ ماڭىزدى جەتىستىگى. مەملەكەت باسشىسىنىڭ تىكەلەي قولداۋىنىڭ ارقاسىندا ازاماتتىق قورعاۋ جۇيەسى, سونىڭ ىشىندە اۆياتسيا جاڭا سەرپىنمەن دامىپ كەلەدى. بيىل التى تىكۇشاق, ءۇش ۇشاق ساتىپ الىندى. جىل سوڭىنا دەيىن تاعى بىرەۋىن الۋ جوسپاردا تۇر. ماقساتىمىز – ەلىمىزدىڭ ءار وڭىرىندە 20 اۋە قۇتقارۋ جاساعىن قۇرۋ, سونىڭ ارقاسىندا كەز كەلگەن توتەنشە جاعدايعا دەر كەزىندە جەتىپ, جەدەل ارەكەت ەتۋ. سونىمەن قاتار اۆياتسيا سالاسىنا جاس مامانداردى دايارلاۋدى جالعاستىراتىن بولامىز, – دەدى مينيستر.
جاڭا عيمارات زاماناۋي تالاپقا ساي سالىنعان. قىزمەتكەرلەردىڭ تاۋلىك بويى جۇمىس ىستەۋىنە بارلىق مۇمكىندىك بار.
مينيستر ش.ءارىنوۆ جەزقازعان قالاسىندا 50 جىلدان كەيىن العاش رەت اشىلعان جاڭا ءورت ءسوندىرۋ ءبولىمى عيماراتىندا بولىپ, «بۇل دا مينيسترلىكتىڭ جۇيەلى جۇمىسىنىڭ ناتيجەسى» دەپ اتاپ ءوتتى قۇتتىقتاۋ سوزىندە. ءبولىم قازىرگى زامانعى ستاندارتتارعا ساي جابدىقتالعان. قۇتقارۋشىلاردىڭ قاۋىپسىز, ساپالى قىزمەت اتقارۋىنا بارلىق جاعداي جاسالعان.
ۇلىتاۋ وبلىسىنىڭ اكىمى داستان رىسپەكوۆ اتالعان نىسانداردىڭ اشىلۋى ءوڭىر قاۋىپسىزدىگىن قامتاماسىز ەتۋدەگى اسا ماڭىزدى قادام ەكەنىن ءمالىم ەتتى.
– مەملەكەت باسشىسى وڭىرلەردە توتەنشە جاعدايلاردا حالىقتىڭ قاۋىپسىزدىگىن كۇشەيتۋ ىسىنە ەرەكشە ءمان بەرىپ كەلەدى. بۇگىن اشىلىپ وتىرعان اۋە قۇتقارۋ جاساعى مەن جاڭا ءورت ءسوندىرۋ بولىمشەسى – وسى باعىتتاعى ناقتى قادام. بۇل – تۇرعىندارىمىزدىڭ قاۋىپسىزدىگى مەن ءومىرىن قورعاۋعا سالىنعان ماڭىزدى ينۆەستيتسيا, – دەگەن ءوڭىر باسشىسى جوباعا قولداۋ كورسەتكەن توتەنشە جاعدايلار مينيسترلىگى مەن «قازاقمىس» كورپوراتسياسىنا العىس ءبىلدىردى.
سالتاناتتى شارادا توتەنشە جاعدايلار قىزمەتكەرلەرىنە جاڭا تەحنيكا, بىرقاتار سالا قىزمەتكەرىنە قىزمەتتىك پاتەر كىلتتەرى تابىس ەتىلدى. سونىمەن قاتار سالا قىزمەتكەرلەرى مەن ءوڭىردىڭ بەلسەندى ازاماتتارى ارنايى توسبەلگى, العىسحاتتارمەن ماراپاتتالدى.
بيىل توتەنشە جاعدايلار مينيسترلىگى ۇلىتاۋ وبلىسىنا زاماناۋي جابدىقتالعان تىكۇشاق بەرگەن بولاتىن. بۇل وڭىردە تۇتقيىلدان بولىپ قالاتىن قيىن جاعدايدا جەدەل قۇتقارۋعا بارۋعا مۇمكىندىك جاساپ وتىر. الداعى ۋاقىتتا دا اۋە قۇتقارۋ ينفراقۇرىلىمىن دامىتۋ جۇمىسى جالعاسا بەرەدى. سونىمەن قاتار جىل سوڭىنا دەيىن وبلىستىڭ ساتباەۆ قالاسى مەن جايرەم كەنتىندە دە جاڭا ءورت ءسوندىرۋ بولىمدەرىنىڭ اشىلۋى جوسپارلانىپ وتىر.
ۇلىتاۋ وبلىسى
