قاسىم-جومارت توقاەۆقا ءوڭىردىڭ نەگىزگى الەۋمەتتىك-ەكونوميكالىق كورسەتكىشتەرى, سونداي-اق الماتى اگلومەراتسياسىن دامىتۋ جوسپارى جونىندە باياندالدى.
مارات سۇلتانعازيەۆ سوڭعى 3 جىلدا وبلىستىڭ جالپى وڭىرلىك ءونىمى 1,8 ەسە ارتىپ, 3,4 تريلليون تەڭگەدەن 6 تريلليون تەڭگەگە وسكەنىن ايتتى.
بيىلعى قاڭتار – قازان ايلارى ارالىعىنداعى قىسقا مەرزىمدى ەكونوميكالىق ينديكاتور 109,7 پايىزدى قۇرادى.
حالىقارالىق كومپانيالاردىڭ قاتىسۋىمەن تاعام ونەركاسىبى, لوگيستيكا جانە مەتاللۋرگيا سالالارىندا جالپى سوماسى 470 ميلليارد تەڭگەدەن اساتىن 13 ينۆەستيتسيالىق جوبا ىسكە اسىرىلۋدا.
بيىلعى توعىز ايدا وڭدەۋ ونەركاسىبىنىڭ ەكسپورتى 28,5 پايىز ۇلعايىپ, 618,5 ميلليون دوللارعا جەتكەنى جونىندە مالىمدەدى.
بۇل رەتتە ەكسپورتتىڭ 90 پايىزى جوعارى دەڭگەيدە قايتا وڭدەلگەن ونىمگە تيەسىلى.
الماتى وبلىسى اۋىل شارۋاشىلىعىنا ارنالعان مەملەكەتتىك سۋبسيديالاردى ءتيىمدى پايدالاناتىن جەتەكشى وڭىرلەردىڭ ءبىرى ەكەنىن جەتكىزدى.
ءبىر تەڭگە سۋبسيدياعا 17 تەڭگەگە دەيىن اۋىل شارۋاشىلىعى ءونىمى وندىرىلەدى. تاۋارلى ءسۇت فەرمالارىنىڭ سانى 11-گە دەيىن كوبەيدى.
سونىمەن قاتار اكىم وبلىستىڭ الەۋمەتتىك دامۋى تۋرالى اقپارات بەردى. بيىلعى ون ايدا 950 مىڭ شارشى مەترگە جۋىق تۇرعىن ءۇي سالىنعان.
ءۇش اۋىسىمدى مەكتەپتەر سانى 52-دەن 28-گە دەيىن قىسقاردى.
قاپشاعاي سۋ قويماسى مەن ۇلتتىق تابيعي پاركتەر اينالاسىنداعى تۋريزم كلاستەرىنىڭ دامۋ بارىسىن تانىستىردى.
وبلىسقا كەلگەن تۋريستەر سانى 2,2 ميلليون ادامعا جەتكەن. بۇل بىلتىرعى وسىنداي كەزەڭمەن سالىستىرعاندا 36 پايىزعا ارتىق.
مەملەكەت باسشىسى وبلىس اكىمىنە ءوڭىردىڭ ونەركاسىپ جانە اگرارلىق الەۋەتىن نىعايتۋ, لوگيستيكا, تۋريزم سالالارىن دامىتۋ, سونداي-اق تۇرعىنداردى تولعاندىراتىن وزەكتى ماسەلەلەردى كەشەندى تۇردە شەشۋ جونىندە بىرقاتار ناقتى تاپسىرما بەردى.
