فوتو: استانا قالاسىنىڭ اكىمدىگى
قالانى جاڭا جىلعا بەزەندىرۋگە اۋدان اكىمدىكتەرىنە شامامەن 365 ملن تەڭگە ءبولىندى. قاراجات تومەندەگىدەي بولىنەدى:
-
بايقوڭىر, سارايشىق, سارىارقا, الماتى اۋداندارىنىڭ ارقايسىسىنا 50 ملن تەڭگەدەن;
-
ەسىل اۋدانىنا– 90 ملن تەڭگە;
-
نۇرا اۋدانىنا – 75 ملن تەڭگە.
سونىمەن قاتار, ەلوردادا جاڭا جىل قارساڭىندا قالا تۇرعىندارى مەن قوناقتارىنا ارنالعان كوپتەگەن تەگىن قىسقى ويىن-ساۋىق نىساندارى ورناتىلادى: مۇز ايدىندارى, سىرعاناقتار, فوتوزونالار جانە باسقا دا نىساندار. اۋدانداردا شىرشالار قويىلادى.
«كوشەلەردى جاڭا جىلعا بەزەندىرۋ ءۇشىن وتكەن جىلعى گيرلياندالاردىڭ, ينستاللياتسيالاردىڭ جانە وزگە دە اشەكەيلەردىڭ ءبىر بولىگى قايتا پايدالانىلماق. بىرقاتار قوعامدىق كەڭىستىك قىسقى دەمالىس اتموسفەراسىن قالىپتاستىراتىن تاقىرىپتىق شاعىن ساۋلەتتىك فورمالارمەن جانە جارىقتىق ينستاللياتسيالارمەن بەزەندىرىلەدى», دەپ اتاپ ءوتتى اكىمدىكتىڭ ءباسپاسوز قىزمەتى.
استانا اكىمدىگىنىڭ مالىمەتىنشە, جاڭا جىلدىق بەزەندىرۋگە بولىنەتىن قارجى جەرگىلىكتى اتقارۋشى ورگان بيۋدجەتى مەن دەمەۋشىلەر قاراجاتىنان قۇرالادى.
