اتىراۋلىق ايبولات ىستىباي دزيۋدودان الەم چەمپيونى اتاندى

اتىراۋ. 10 تامىز. اتىراۋلىق پالۋان ايبولات ىستىباي بوسنيا جانە گەرتسەگوۆينا استاناسى – ساراەۆودا كادەتتەر اراسىندا ءوتىپ جاتقان دزيۋدودان الەم چەمپيونى اتاندى. بۇل تۋرالى egemen.kz ءتىلشىسى حابارلادى. اتىراۋ پالۋاندارىنىڭ اراسىندا ىستىباەۆتاردىڭ ابىرويى اسپانداپ تۇر. ءبىر وتباسىندا تاربيەلەنگەن نۇربولات پەن قانات تا, اعالارىنىڭ ىزىمەن سپورتقا اڭسارى اۋعان ايبولات تا سامبو, دزيۋدو جانە قازاق كۇرەسىمەن اينالىسادى. اعايىندى پالۋانداردىڭ جەتىستىكتەرى دە از ەمەس. جاقىندا ايبولات ىستىباي بوسنيا جانە گەرتسەگوۆينا استاناسى – ساراەۆودان التىن مەدالمەن ورالدى. ول وسىندا وتكەن كادەتتەر اراسىنداعى دزودودان الەم بىرىنشىلىگىندە قارسىلاستارىنىڭ ءبارىن ايقىن باسىمدىقپەن جەڭىپ, الەم چەمپيونى اتاندى. ايبولات الەمنىڭ ءار تۇكپىرىنەن جينالعان 500 سپورتشىنىڭ اراسىنان وق بويى وزىپ, قازاق ەلىنىڭ كوكبايراعىن بيىكتە جەلبىرەتىپ, ءانۇراندى شىرقاتۋ ءۇشىن نامىسقا تىرىستى. ماقساتى – ەلدىڭ ابىرويىن اسپانداتۋ. سول ماقساتىنا جەتۋ ءۇشىن بارىن سالدى. جاتتىقتىرۋشىسى مەرجان ەسماعامبەتوۆتىڭ ءتالىمىن وي ەلەگىنەن وتكىزدى. قازاقتىڭ نامىستى, قايسار پالۋانى 50 كيلو سالماقتا الدىمەن اقش, رەسەي, كيپر, گرۋزيا پالۋاندارىن يپپون ۇپايىمەن  جەڭدى. التىن مەدالعا قول جەتكىزەتىن شەشۋشى سىندا يتاليان پالۋانىمەن شەبەرلىك بايقاستى. شارشى الاڭدا جان بەرىسىپ, جان الىسقان سىندا قازاق پالۋانى قارسىلاسىنىڭ وسال تۇسىن تاۋىپ, ايقىن باسىمدىعىن تانىتتى. وسىلايشا, الەم چەمپيونى اتانعان 17 جاسار ايبولات ىستىبايدىڭ بۇل جەڭىسى ساراەۆو تورىندە كوكبايراعىمىزدى كوككە كوتەرىپ, ءانۇرانىمىزدى شىرقاتتى. جولداسبەك شوپەعۇل. دەرەك, سۋرەت: egemen.kz.