كونفەرەنتسيا مادەنيەت جانە اقپارات مينيسترلىگىنىڭ, ۇلتتىق مۋزەيدىڭ, قازاقستان قارۋلى كۇشتەرىنىڭ ارداگەرلەرى رەسپۋبليكالىق قوعامدىق ۇيىمى جانە Atamnyn amanaty قوعامدىق بىرلەستىگىنىڭ باستاماسىمەن ۇيىمداستىرىلدى.
پىكىرتالاس الاڭىنا كۇش قۇرىلىمدارىنىڭ, مۇراجايلاردىڭ, اسكەري جوعارى وقۋ ورىندارىنىڭ, ارداگەرلەر قاۋىمداستىعىنىڭ جانە قوعامدىق ۇيىمداردىڭ وكىلدەرى, سونداي-اق ۇلتتىق ۇلان ارداگەرلەرى شاقىرىلدى.
فورۋمدا قۇقىقتىق ءتارتىپ اسكەرى اتىنان ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, حالىق قاھارمانى گەنەرال-مايور قايرات ۇمبەتوۆ قۇتتىقتاۋ ءسوز سويلەدى. ول اشىق ديالوگتىڭ ماڭىزدىلىعىنا توقتالىپ, بىرلەسكەن جۇمىستىڭ وڭ ناتيجە بەرەتىنىن اتاپ ءوتتى جانە پاتريوتتىق تاربيەنى دامىتۋعا باعىتتالعان باستامالارعا قولداۋ ءبىلدىردى.
«باسقوسۋ اياسىندا ءبىز تاريحي جادىنى ساقتاۋعا, ۇرپاقتار ساباقتاستىعىن نىعايتۋعا جانە جاستاردى پاتريوتتىق تاربيەلەۋگە ارنالعان نەگىزگى ماسەلەلەردى تالقىلادىق», - دەيدى Atamnyn amanaty باسقارماسىنىڭ توراعاسى مۇرات مولداعاليەۆ.
كونفەرەنتسيا شەڭبەرىندە اسكەري-تاريحي جاڭعىرۋ مەن ءبىلىم بەرۋ باعىتىنداعى فورماتيكانىڭ ۇيلەسىمدى ادىستەرى, اسكەري قىزمەتشىلەردى حابار-وشارسىز كەتتى دەپ تانۋ جونىندەگى قازاقستان رەسپۋبليكاسى زاڭناماسىنىڭ وزەكتى اسپەكتىلەرى, سوعىس جىلدارىنداعى قازاقستاندىق جاۋىنگەرلەردىڭ تاعدىرىن مۇراعاتتىق ىزدەستىرۋ پراكتيكاسى ماسەلەلەرى كوتەرىلدى.
ۇيىمداستىرۋشىلار بۇل باعىتتاعى جۇيەلى جۇمىس ۇرپاقتار اراسىنداعى بايلانىستى نىعايتۋعا, جاستاردىڭ ەل تاريحىنا دەگەن قىزىعۋشىلىعىن ارتتىرۋعا جانە ونىڭ بولاشاعىنا جاۋاپكەرشىلىكپەن قاراۋدى قالىپتاستىرۋعا مۇمكىندىك بەرەتىنىنە سەنىم ءبىلدىردى.
