اتىراۋدا 90 جاس وتباسىعا پاتەر بەرىلدى

اتىراۋ. اتىراۋدا «جاس وتاۋ» باعدارلاماسىمەن بوي كوتەرگەن 90 پاتەرلىك جاڭا تۇرعىن ۇيگە وسىنشا جاس وتباسى قونىستاندى. بۇل تۋرالى egemen.kz ءتىلشىسى حابارلادى. ادەتتە جاس وتباسىلاردىڭ جاڭا باسپانا باقىتىنا يە بولۋى قيىن. اسىرەسە, 30 جاسقا دەيىنگىلەر الدىمەن پاتەر كەزەگىنە تۇرىپ, باسپاناعا قول جەتكىزۋدى بىرنەشە جىلداپ كۇتەدى. بىراق, جاس وتباسىلاردى بۇل تىعىرىقتان شىعارىپ, قۋانىشقا كەنەلتەتىن امال بار ەكەن. ونى اتىراۋ وبلىسىنىڭ اكىمى باقتىقوجا ىزمۇحامبەتوۆ «جاس وتاۋ» باعدارلاماسىن ىسكە اسىرۋ ارقىلى تاپتى. ءسويتىپ, بۇدان ەكى جىلداي بۇرىن ءوڭىر ورتالىعىندا 90 جاس وتباسىنا ارنالعان تۇرعىن ءۇي قۇرىلىسى باستالعان ەدى. وتكەن اپتادا مۇنايلى اتىراۋدىڭ عانا ەمەس, تۇتاس ەلدىڭ وركەندەۋ كەلەشەگىنە ءار سالاداعى قاجىرلى ەڭبەگىمەن وزىندىك ۇلەسىن قوسىپ جۇرگەن 90 جاس وتباسى زور قۋانىشقا كەنەلدى. ولارعا وبلىس اكىمى باقتىقوجا ىزمۇحامبەتوۆ جەرگىلىكتى قۇرىلىس كاسىپورنى تۇرعىزعان جاڭا تۇرعىن ۇيدەن ەكى بولمەلىك 30, ءبىر بولمەلىك 60 پاتەردىڭ كىلتىن تاپسىردى. جيىرما توعىز جاسقا تولماعان, ءارى ەكى بالالى جاس وتباسىلاردىڭ مۇشەلەرى الۋان ءتۇرلى ماماندىقتىڭ يەلەرى, ماسەلەن, سالامات قايىروۆ ءبىلىم بەرۋ, مەرۋەرت جايماعامبەتوۆا دەنساۋلىق ساقتاۋ سالاسىندا ابىرويلى ەڭبەك ەتىپ ءجۇر. ال نۇرلان ازاماتوۆ جاستار ۇيىمىنا جەتەكشىلىك ەتەدى. بۇلاردان وزگە مەملكەتتىك قىزمەتكەرلەر دە, اسكەريلەر دە باسپانا باقىتىن سەزىندى. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.