فوتو: ۇلتتىق بانك
جىلدىق ينفلياتسيا قازاندا 12,6% بولدى (قىركۇيەكتە – 12,9%). ازىق-ت ۇلىك تاۋارلارى باعاسىنىڭ ءوسۋى 13,5%-عا (12,7%) جانە ازىق-ت ۇلىككە جاتپايتىن تاۋارلار باعاسىنىڭ ءوسۋى 11%-عا (10,8%) دەيىن قارقىن الدى. قىزمەتتەردەگى باعانىڭ ءوسۋى رەتتەلەتىن تۇرعىن ءۇي-كوممۋنالدىق قىزمەتتەرگە باعانىڭ اكىمشىلىك تومەندەۋى سالدارىنان 12,9%-عا (15,3%) دەيىن باياۋلادى. جوعارى ينفلياتسيالىق ديناميكا ۇسىنىس مۇمكىندىگىنەن جۇيەلى تۇردە اسىپ تۇسەتىن ورنىقتى سۇرانىس جاعدايىندا قالىپتاسادى. تاريفتىك رەفورمانىڭ جانە جانار-جاعارماي (ججم) نارىعىن ىرىقتاندىرۋ اسەرىنىڭ باعالار مەن ينفلياتسيالىق كۇتۋلەرگە تارالۋى قوسىمشا اسەر ەتىپ وتىر.
«جەكەلەگەن تاۋار نارىقتارىندا ساقتالىپ وتىرعان تەڭگەرىمسىزدىك, ورنىقتى سۇرانىس, يمپورتتىڭ قىمباتتاۋى جانە شىعىنداردىڭ ءوسۋى اياسىندا ازىق-ت ۇلىك كومپونەنتى بۇرىنعىشا ينفلياتسياعا كوپتەپ ۇلەس قوستى. سەرۆيستىك ينفلياتسيانىڭ ۇلەسى ازايدى, الايدا باعانىڭ ءوسۋ قارقىنى باياۋلاعانىنا قاراماستان ماڭىزدى كۇيىندە قالىپ وتىر. ازىق-ت ۇلىككە جاتپايتىن ينفلياتسيادا جانارماي مەن فارماتسەۆتيكالىق ءونىم باعاسىنىڭ ءوسۋى جەدەلدەگەنى بايقالادى.
قازاندا ايلىق ينفلياتسيا 0,5%-عا دەيىن ايتارلىقتاي باياۋلادى, الايدا بازالىق ينفلياتسيا 1% دەڭگەيىندە – جوعارى كۇيىندە قالدى. بۇل ءبىر جىلعا ەسەپتەگەندە 12,2% سايكەس كەلەدى. سونىمەن قاتار تۇتىنۋ قورجىنىنداعى تاۋارلار مەن قىزمەتتەردىڭ شامامەن 80%-ى 5% تارگەتتەن جوعارى قارقىنمەن قىمباتتايدى. وسىنىڭ ءبارى باعا قىسىمىنىڭ ورنىقتىلىعى مەن كەڭ قامتۋىن كورسەتەدى. بۇل پروينفلياتسيالىق ديناميكا فيسكالدىق جانە ۇدەمەلى كۆازيفيسكالدىق ىنتالاندىرۋدىڭ, سونداي-اق ارتقان تۇتىنۋشىلىق سۇرانىستىڭ اسەرىنەن كۇشەيەدى», دەلىنگەن ۇب حابارلاماسىندا.
ۇلتتىق بانك ينفلياتسيانىڭ باياۋلاۋ قارقىنىن, ىشكى سۇرانىس رەاكتسياسىن, سونداي-اق باعدارلامادا جانە ينفلياتسيانى باقىلاۋ, تومەندەتۋ بويىنشا شارالار كەشەنىندە كوزدەلگەن بىرلەسكەن شارالاردى ىسكە اسىرۋ تيىمدىلىگىن باعالاۋدى جالعاستىرا بەرمەك.
«قازىرگى ۋاقىتتا ۇلتتىق بانك جوعارى ينفلياتسيالىق كۇتۋلەردى, ورنىقتى بازالىق ينفلياتسيانى جانە تاريفتىك رەفورمالاردىڭ كەيىنگە قالدىرىلعان اسەرىن نازارعا الا وتىرىپ, 2026 جىلدىڭ ءبىرىنشى جارتىسىنىڭ سوڭىنا دەيىن مولشەرلەمەنى تومەندەتۋ مۇمكىن بولمايدى دەپ سانايدى. ينفلياتسيانىڭ ورنىقتى باياۋلاۋ ءۇردىسى قالىپتاسقانىنا سەنىمدىلىك بولماعان جاعدايدا اقشا-كرەديت شارتتارى قاتاڭداتىلۋى مۇمكىن», دەلىنگەن مالىمدەمەدە.
