ايماقتىڭ بۇرىنعىسى مەن بۇگىنگىسىن بىلەتىندەر سوناۋ 80-جىلدارى قىزىلوردا مەن جەزدى ءوڭىردىڭ اراسىن جالعايتىن كونە سوراپتىڭ 127 شاقىرىمىنا ماڭعىستاۋ وڭىرىنەن اكەلىنگەن بيتۋم توسەلگەنىن ايتادى. سول توسەنىشتىڭ تامتىعى عانا قالسا دا III كاتەگورياعا جاتقىزىلىپ, كەشەگە دەيىن كادەگە جاراپ كەلدى. 2000 جىلدار باسىندا جەرگىلىكتى كومپانيالار جولدىڭ 30 شاقىرىمىن سالىپ, كوپتىڭ كوكەيىندە ءۇمىت ويانىپ ەدى. بىراق سول كەزدەگى ەكونوميكالىق جاعدايعا بايلانىستى جاقسى باستاما ورتا جولدان ءۇزىلىپ قالدى. ماسەلەگە مەملەكەت باسشىسى نازار اۋدارعاننان كەيىن عانا كۇرە جول قۇرىلىسى باستالىپ, 2023 جىلى العاشقى ءاسفالتى توسەلە باستادى. ەكى جىل ىشىندە 424 شاقىرىمنىڭ وبلىس اۋماعىنداعى بولىگى سالىنىپ ءبىتتى.
سالتاناتتى راسىمگە وبلىس اكىمى نۇرلىبەك نالىباەۆ, «قازاۆتوجول» ۇك» اق باسقارما توراعاسى دارحان يماناشەۆ, دەپۋتاتتار مەن ارداگەرلەر قاتىستى. ايماق باسشىسى بۇل جولدىڭ ءوڭىر ەكونوميكاسىنا, ءوندىرىستىڭ وركەندەۋىنە, تۇرعىنداردىڭ ءال-اۋقاتىنىڭ ارتۋىنا تيگىزەتىن وڭ ىقپالى مەن ەرەكشە ماڭىزىن اتاپ ءوتتى.
«ۇزاق جىلدان بەرى ەل ارمانداپ كەلگەن اۆتوجولدى سالۋعا قولداۋ كورسەتكەن مەملەكەت باسشىسى قاسىم-جومارت توقاەۆقا بارشا سىر جۇرتشىلىعىنىڭ اتىنان زور ريزاشىلىعىمىزدى, شىنايى العىسىمىزدى بىلدىرەمىز. رەسپۋبليكالىق ماڭىزى بار اۆتوموبيل جولى تۋرالى ماسەلە تاۋەلسىزدىك العان كەزەڭنەن بەرى بىرنەشە مارتە كوتەرىلگەنىن بىلەمىز. بۇگىن وبلىس اۋماعىنداعى بولىگى تولىق قايتا جاڭعىرتۋدان ءوتىپ, ءتيىستى جۇمىس اياقتالدى. جوبانى جۇزەگە اسىرۋعا 84 ملرد تەڭگە جۇمسالدى», – دەدى نۇرلىبەك نالىباەۆ.
قۇرىلىس جۇمىسىنا بەس بىردەي مەردىگەر, 400 تەحنيكا جۇمىلدىرىلىپتى. جولدىڭ قالعان بولىگى كەلەر جىلى پايدالانۋعا بەرىلمەك. سول كەزدە وڭتۇستىك وڭىرلەردى ەلدىڭ ورتالىعىمەن بايلانىستىراتىن كۇرە جولمەن تاۋلىگىنە 10 مىڭعا دەيىن كولىك قاتىناي الادى. جۇك جانە جولاۋشىلار تاسىمالى ۇلعايادى.
«بىلتىر تامىز ايىنان بەرى ۇلىتاۋ وبلىسى اۋماعىنداعى جۇمىسقا كىرىستىك. وسى كۇنى العاشقى 50 شاقىرىمىنا اسفالت-بەتون قوسپاسى توسەلىپ جاتىر. كەلىسىمشارتتا ەكى ارالىقتاعى جولدىڭ سالىنىپ ءبىتۋى 2027 جىلدىڭ اياعىنا جوسپارلانعانىمەن دە كەلەر جىلدىڭ سوڭىنا دەيىن 208 شاقىرىم قۇرىلىستى بىتىرەمىز دەگەن ويدامىز. جەزقازعان – قاراعاندى باعىتىنداعى جۇمىس تا كوپ كۇتتىرمەيدى. ۇلىتاۋ وڭىرىندە 4 مەردىگەر 8 نىسان بويىنشا قۇرىلىس جۇرگىزەدى», دەيدى «قازاۆتوجول» ۇك» اق باسقارما توراعاسى دارحان يماناشەۆ.
«جول اكتيۆتەرى ساپاسىنىڭ ۇلتتىق ورتالىعى» رمك ماماندارى جىل ىشىندە قىزىلوردا بولىگىن 87 رەت تەكسەرىپ, 598 سىناما الىپتى. اسپاپتىق تەكسەرۋ بارىسىندا انىقتالعان اقاۋلاردىڭ دا قالىپقا كەلتىرىلۋى باقىلاۋدا تۇر.
سالتاناتتى راسىمدە اۋقىمدى جوبانىڭ جۇزەگە اسۋىنا ۇلەس قوسقان قۇرىلىسشىلار مەن ينجەنەرلەرگە, جول سالاسىنىڭ ماماندارىنا «قىزىلوردا وبلىسىنىڭ دامۋىنا قوسقان ۇلەسى ءۇشىن», «ەڭبەك ارداگەرى», «قۇرمەتتى جولشى» مەدالدارى تابىستالدى. بىرقاتار ازامات قىزىلوردا وبلىسىنىڭ قۇرمەت گراموتاسىمەن, وبلىس اكىمىنىڭ العىس حاتىمەن ماراپاتتالدى.
جولشىلار ەڭبەگى ارقاسىندا شۋ باعىتىنا قاراعاندا, قىزىلوردا مەن استانا اراسى 800 شاقىرىمعا جاقىنداي ءتۇستى. بۇرىن ساپارعا شىققاندار ەكى ارالىقتا 20 ساعات جول جۇرسە ەندى 16 ساعاتتا دىتتەگەن جەرىنە بارادى. ۇلىتاۋ وبلىسىنىڭ اۋماعىندا باستالعان قۇرىلىس جۇمىسى اياقتالىپ, جاڭا جول پايدالانۋعا بەرىلگەندە, استاناعا باعىت العان كولىك 12 ساعاتتا جەتەدى.
بۇگىندە وبلىستا «قىزىلوردا – جەزقازعان» جولىن «باتىس ەۋروپا-باتىس قىتاي» اۆتودالىزىنە قوساتىن 25 شاقىرىمدىق اينالما جول سالاتىن مەردىگەر مەكەمە انىقتالىپ جاتىر. كەلەر جىلى باستالاتىن «قىزىلوردا – سەكسەۋىل» باعىتىنداعى 462 شاقىرىمدىق 4 جولاقتى جول قۇرىلىسى سىرداريا, جالاعاش, قارماقشى, قازالى مەن ارال اۋداندارىنىڭ اۋماعىن قامتيدى. قىزىلوردا مەن اقتوبەنى جالعاپ جاتقان «باتىس ەۋروپا – باتىس قىتاي» ءاۆتودالىزىنىڭ ەكى جولاقتى بولىگىن كەڭەيتۋدىڭ بۇل باستاماسى اتالعان اۋداندار تىرشىلىگىنە جان ءبىتىرىپ, كورشى وبلىستارمەن الىس-بەرىس پەن بارىس-كەلىس ارتا تۇسەدى.
قىزىلوردا
