مادەنيەت جانە اقپارات مينيسترلىگىنىڭ قولداۋىمەن, قازاقستاندىق قوعامدىق دامۋ ينستيتۋتى ۇيىمداستىرعان ءىس-شارادا الدىمەن SARAP-تىڭ بيىلعى اتقارعان جۇمىسىنا قورىتىندى جاسالىپ, ققدي-نىڭ ۇلتتىق قۇرىلتاي اياسىندا ازىرلەگەن تالداۋ باياندامالارى, قايىرىمدىلىق جانە وتباسىنىڭ جاڭا ۇلگىسىنە قاتىستى الەۋمەتتانۋلىق زەرتتەۋ ناتيجەلەرى تانىستىرىلدى.
ققدي باسشىسى جۇلدىزاي ىسقاقوۆا «SARAP» كلۋبى 2021 جىلى قۇرىلىپ, سودان بەرى 62 تالقىلاۋ وتكىزىپ, وعان 2 500-دەن استام ادام قاتىسقانىن اتاپ ءوتتى. ءماجىلىس دەپۋتاتى ايدوس سارىم قازاقستان رەسپۋبليكاسى ىشكى ساياساتىنىڭ نەگىزگى قاعيداتتارى, قۇندىلىقتارى مەن باعىتتارى تۋرالى قۇجاتتىڭ ءمان-ماڭىزىنا توقتالدى.
ققدي وتباسى جانە گەندەرلىك ساياسات سالاسىنداعى زەرتتەۋلەر ورتالىعىنىڭ باسشىسى اقنۇر يمانقۇل جاڭا تۇجىرىمدامانىڭ باسىم باعىتتارىنىڭ ءبىرى رەتىندە جاۋاپتى اتا-انا يدەياسىن دارىپتەۋ مىندەتى قويىلعانىن ەرەكشە اتاپ ءوتتى.
«سانالى اتا-انا بولۋ – ەل ازاماتتارى ءۇشىن باستى قۇندىلىقتىڭ ءبىرى. زەرتتەۋگە سۇيەنسەك, رەسپوندەنتتەردىڭ 61,4%-ى اتا-انا ءرولىن ومىرىندەگى ەڭ باستى قۇندىلىق دەپ باعالاسا, 29,2%-ى اسا ماڭىزدى اسپەكتىنىڭ ءبىرى دەپ سانايدى. ودان بولەك, بالالار وتباسىنىڭ باستى قۇندىلىقتارى اراسىندا ءۇشىنشى ورىندا (38,7%) تۇر. بۇل كورسەتكىشتەر اتا-انا بولۋدىڭ قوعامدا جوعارى مارتەبەگە يە ەكەنىن جانە وتباسىن قولداۋعا باعىتتالعان الەۋمەتتىك ساياساتتى ودان ءارى دامىتۋ قاجەت ەكەنىن كورسەتەدى», دەدى سپيكەر.
ءىس-شارا اياسىندا قايىرىمدىلىق تۋرالى دا زەرتتەۋ ناتيجەلەرى جاريالاندى. ققدي الەۋمەتتانۋلىق زەرتتەۋلەر ورتالىعىنىڭ ساراپشىسى گۇلسايران نۇرتايدىڭ ايتۋىنشا, حالىقتىڭ قايىرىمدىلىق قورلارىنا دەگەن سەنىم دەڭگەيى اركەلكى.
«ەل ازاماتتارىنىڭ شامامەن 25%-ى قايىرىمدىلىق قورلارىنا مۇلدەم سەنبەيتىنىن ايتقان, ياعني شارتتى تۇردە ءار ءتورتىنشى ازامات سەنىمسىزدىك ءبىلدىردى. قىزىعى, قايىرىمدىلىق قورلارىنا ءشۇباسىز سەنەتىندەر ۇلەسى دە وسى شامادا – 26,4%. ال رەسپوندەنتتەردىڭ 45%-دان استامى قايىرىمدىلىق قورلارىنا ءىشىنارا سەنەدى, اتاپ ايتساق, ولاردىڭ 29,6%-ى تەك كەيبىر قايىرىمدىلىق قورلارىنا سەنىم بىلدىرسە, 15,8%-ى قورلارعا ەمەس, قايىرىمدىلىقپەن جەكە اينالىساتىندارعا سەنەتىنىن ايتقان», دەدى ساراپشى.
ءىس-شارا اياسىندا قاتىسۋشىلار ادام قۇقىقتارىن قورعاۋ, تۇرمىستاعى زورلىق-زومبىلىقتىڭ الدىن الۋ سالاسىنداعى وزەكتى ماسەلەلەردى دە تالقىعا سالدى.
