فوتو: Turizm jane sport ministrligi
مەدال سانى بويىنشا ەڭ ۇزدىك كورسەتكىشتى تىركەگەن سۋردو دزيۋدوشىلار 5 التىن, 2 كۇمىس, 4 قولا جۇلدەگە قول جەتكىزىپ, جالپىكوماندالىق ەسەپتە ءبىرىنشى ورىن الدى. وسىلايشا, ەلىمىزدىڭ سۋردو دزيۋدو تاريحىنداعى ەڭ جوعارى ناتيجەمەن تاريحي ءارى رەكوردتىق جەتىستىككە قول جەتكىزىلدى.
ال, ەركىن كۇرەس شەبەرلەرى 1 التىن, 1 كۇمىس, 3 قولا مەدال يەلەنىپ, گرەك-ريم كۇرەسىنىڭ وكىلدەرى تولىق مەدال جيىنتىعىن (التىن, كۇمىس, قولا) ەنشىلەدى.
جەڭىل اتلەتيكادان قازاقستان قۇراماسى 1 التىن جانە 1 قولا مەدال يەلەندى. فاينا مەيىرمانوۆا بيىكتىككە سەكىرۋ سايىسىندا 1,79 مەتر ناتيجەمەن سۋردليمپيادا چەمپيونى اتانىپ, جارىستىڭ رەكوردىن جاڭارتتى.
ال, تاەكۆوندو شەبەرلەرى 3 قولا مەدال سالسا, ۇستەل تەننيسىنەن ەرلەر قۇراماسى كوماندالىق ەسەپتە قولا جۇلدەگەر اتاندى.
سالا مينيسترلىگىنە قاراستى سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى نۇرلان ەسەمباەۆتىڭ ايتۋىنشا, جارىستىڭ العاشقى كۇنىنەن قازاقستان قۇراماسى ۇزدىك 5 ەلدىڭ قاتارىنان كورىندى.
«بۇل – مۇمكىندىگى شەكتەۋلى جاندار سپورتىنىڭ جۇيەلى دامىپ كەلە جاتقاندىعىنىڭ ءارى مەملەكەتتىك قولداۋدىڭ ناتيجەسى. سپورتشىلارىمىزدىڭ الەۋەتىن ارتتىرۋعا جانە جوعارى ناتيجەلەرگە جەتۋىنە جان-جاقتى قولداۋ كورسەتۋدى جالعاستىرامىز», دەدى ن.ەسەمباەۆ.
مينيسترلىكتىڭ مالىمەتىنشە, بايراقتى باسەكەدە 81 ەلدەن كەلگەن 3 000-عا جۋىق سپورتشى 21 سپورت ءتۇرى بويىنشا 209 ديستسيپلينادا ءوزارا مىقتىنى انىقتاعان. قازاقستان قۇراماسىنان 78 سپورتشى 8 سپورت تۇرىنەن سايىستى.
