وزبەكستاننىڭ ۇرگەنىش قالاسىندا كوپىر قۇلاپ, ادامدار قازا تاپتى

استانا. 10 تامىز. وزبەكستانداعى حيۋا وبلىسىنىڭ ورتالىعى – ۇرگەنىش قالاسىنداعى پاركتە كونتسەرت كەزىندە كوپىر قۇلاپ كەتىپ, ادامدار قازا تاپتى. بۇل تۋرالى وزبەكستان رەسپۋبليكالىق توتەنشە جاعدايلار مينيسترلىگىنە سىلتەمە جاساعان ras.kz حابارلاندى. «وزبەكستاننىڭ حورەزم وبلىسىنداعى ۇرگەنىش قالاسىنىڭ مادەنيەت جانە دەمالىس پاركىندە كونتسەرت كەزىندە جۇرتتىڭ كوپ جينالىپ قالۋىنان كوپىردىڭ تور جاقتاۋلارىنىڭ ءبىر بولىگى سوگىلىپ كەتتى. ناتيجەسىندە ونىڭ ۇستىندە تۇرعان كىسىلەر كولگە قۇلادى. اراسىندا قازا تاپقاندار دا بار», – دەلىنگەن حابارلامادا. بىراق قازا تاپقانداردىڭ ناقتى سانى ايتىلعان جوق. توتەنشە جاعدايلار مينيسترلىگىنىڭ مالىمەتى بويىنشا, بولعان وقيعانىڭ سەبەبىن جان-جاقتى زەرتتەپ, ونىڭ زارداپتارىن جويۋ ءۇشىن ۇكىمەت كوميسسياسى قۇرىلعان. وسىمەن ءبىر مەزگىلدە «وزودليك» («ازاتتىق» راديوسىنىڭ وزبەك رەداكتسياسى) ءتىلشىسى كوپىردىڭ جاقتاۋى وپىرىلىپ كەتۋى سالدارىنان بولعان اپاتتا كەم دەگەندە 15 ادامنىڭ قازا تاپقانىن جازادى. ال وقيعا 8 تامىز كۇنى, ساعات 19:00 شاماسىندا ورىن العان. سول كەزدە حورەزم وبلىسىنىڭ تانىمال ءانشىسى ناۆرۋزا سوبيروۆا ونەر كورسەتىپ جاتقان. ينتسيدەنت ورىن العان پاركتىڭ اتى «جاستار كولى» («يوشلار كўلي») دەپ اتالادى ەكەن. تالعات رايىمبەك. دەرەك, سۋرەت: ras.kz.