ۇكىمەتتە جەدەل جاردەم قىزمەتكەرلەرىنىڭ جالاقىسىن كوتەرۋ ماسەلەسى پىسىقتالىپ جاتىر

ۆيتسە-ءمينيستردىڭ سوزىنشە, قازىر دەنساۋلىق ساقتاۋ مينيسترلىگى ۇكىمەتپەن بىرلەسىپ ءتيىستى ەسەپ-قيساپتى جۇرگىزىپ جاتىر.

2020-2023 جىلدارى دارىگەرلەردىڭ جالاقىسى – 30 پايىزعا, ورتا بۋىن مەديتسينا قىزمەتكەرلەرىنىڭ جالاقىسى – 20 پايىزعا ارتقان. ال 2024 جىلى مەديتسيناعا تىكەلەي قاتىستى ەمەس قىزمەتكەرلەرىنىڭ, ونىڭ ىشىندە جەدەل جاردەم جۇرگىزۋشىلەرىنىڭ ەڭبەكاقىسى 18 پايىزعا وسكەن. 

ەندى فەلدشەرلەر مەن جەدەل جاردەم جۇمىسىنا قاتىستى وزگە دە مامانداردىڭ جالاقىسىن كوتەرۋ كوزدەلىپ وتىر. 

«قازىر فەلدشەردىڭ ەڭ تومەنگى جالاقىسى 180 000-190 000 تەڭگە شاماسىندا. تاجىريبەسىنە قاراي بۇل سوما 260 000 تەڭگەگە دەيىن جەتۋى مۇمكىن. ال جەدەل جاردەم جۇرگىزۋشىلەرى 160 000-180 000 تەڭگە اينالاسىندا جالاقى الادى. ۇكىمەت ۇسىنىسىمىزدى قولداسا كەلەر جىلدان باستاپ فەلدشەرلەر مەن جەدەل جاردەم جۇرگىزۋشىلەرىنىڭ جالاقىسى كوبەيەدى», دەدى تيمۋر سۇلتانعازيەۆ.

اتالعان مامانداردىڭ جالاقىسى قانشا پايىزعا ارتاتىنى ءالى ناقتىلانباعان. دەنساۋلىق ساقتاۋ ءبىرىنشى ۆيتسە-ءمينيسترى بۇل ماسەلە قارجى مينيسترلىگىمەن بىرلەسە تالقىلانىپ جاتقانىن مالىمدەدى. 

ايتا كەتەيىك, كۇنى كەشە ءماجىلىستىڭ جالپى وتىرىسىندا جەدەل جاردەم قىزمەتكەرلەرىن جاپپاي بەينەتىركەگىشپەن قامتۋ ماسەلەسى قولداۋ تاپقان بولاتىن.

سونداي-اق دارىگەرلەردىڭ ءومىرى مەن قۇقىقتارىن قورعاۋعا ارنالعان جاڭا نورمالار ۇسىنىلدى. 

بۇعان دەيىن سالا ماماندارىن قولداۋ اياسىندا 8,5 – 10 ملن ارالىعىندا الەۋمەتتىك تولەم بەرىلەتىنىن جازعان بولاتىنبىز.