ينۆەستيتسيا ءوڭىر ەكونوميكاسىنىڭ جاڭا درايۆەرى ەكەنى بەلگىلى. بۇل جوبا اياسىندا شامامەن 70 ملن اقش دوللارى كولەمىندە ينۆەستيتسيا تارتىلىپ, قۋاتى جىلىنا 180 مىڭ تونناعا دەيىن ءونىم وندىرەتىن ءوندىرىس ورنى اشىلادى. ناتيجەسىندە, وڭىردە 150 جاڭا تۇراقتى جۇمىس ورنى قۇرىلادى. وبلىس اكىمىنىڭ ورىنباسارى اسەت قاناعاتوۆتىڭ ايتۋىنشا, اتالعان جوبا – ءوڭىر ءۇشىن ستراتەگيالىق ماڭىزى بار باستامالاردىڭ ءبىرى.
«جەتىسۋ وبلىسىندا بىرقاتار ءىرى ينۆەستيتسيالىق جوبالار جۇزەگە اسىرىلىپ كەلەدى. نەگىزگى قۇجاتتارعا قول قويىلىپ, بىرنەشە كەزدەسۋ وتكىزىلگەننەن كەيىن ءوز تاراپىمىزدان بولاشاق زاۋىتتى ورنالاستىرۋ ءۇشىن «تالدىقورعان» يندۋستريالىق ايماعىنان جەر تەلىمىن دايىندادىق. وبلىس باسشىلىعى اتىنان قولدانىستاعى زاڭناما اياسىندا ينۆەستجوباعا بارىنشا قولداۋ كورسەتىلەتىنىن ايتقىم كەلەدى. بۇل جوبا ءوڭىر ەكونوميكاسىنا مۋلتيپليكاتيۆتى اسەر بەرىپ قانا قويماي, تۇراقتى جۇمىس ورىندارىنىڭ اشىلۋىنا ىقپال ەتەدى», دەدى ءا.قاناعاتوۆ.
«ME Elecmetal» كومپانياسىنىڭ باس ديرەكتورى ەۋحەنيو ارتەاگا اتاپ وتكەندەي, جەتىسۋ وبلىسى ستراتەگيالىق تۇرعىدان قولايلى گەوگرافيالىق جەردە ورنالاسقان, قاجەتتى لوگيستيكا مەن ەنەرگەتيكا سالاسىنداعى رەسۋرستارعا باي, بۇل دايىن ءونىمدى تابىستى جۇزەگە اسىرۋعا مۇمكىندىك بەرەدى.
ء«بىزدىڭ جوبا مەتاللۋرگيا سالاسىن دامىتۋعا باعىتتالعان. ءونىم ىشكى نارىقتا دا, ورتالىق ازيا ەلدەرىنە دە ەكسپورتقا جىبەرىلەتىن بولادى. بارلىق ۇيىمداستىرۋ ماسەلەسى شەشىلگەننەن كەيىن كەلەر جىلدىڭ ناۋرىز ايىندا بولاشاق زاۋىتتىڭ ىرگەتاسىن قالاۋدى جوسپارلاپ وتىرمىز», دەيدى كومپانيا ديرەكتورى.
كومپانيا وكىلىنىڭ ايتۋىنشا, جوبانى جۇزەگە اسىرۋ كەزىندە زاماناۋي ەكولوگيالىق ستاندارتتار ساقتالادى. ياعني وندىرىستىك قالدىقتاردى ازايتۋعا ءارى ەنەرگيانى ۇنەمدى پايدالانۋعا ەرەكشە نازار اۋدارىلادى.
جالپى, وڭىردە عانا ەمەس, ەل كولەمىندە تەگىستەگىش بولات شارعا سۇرانىس جىل سايىن ارتىپ وتىر. بۇل ءونىم نەگىزىنەن تاۋ-كەن وندىرىسىندە كەندى ۇنتاقتاۋ كەزىندە قولدانىلادى. قازاقستانداعى مىس, التىن جانە وزگە دە پايدالى قازبالاردى ءوندىرۋشى ءىرى كومپانيالار وسىنداي ءونىمنىڭ باستى تۇتىنۋشىسى بولىپ سانالادى. سالا مامانى, مەتاللۋرگيا ينجەنەرى بەكجان سارسەنوۆتىڭ ايتۋىنشا, بۇل زاۋىت ءوڭىر ەكونوميكاسى ءۇشىن ۇلكەن سەرپىلىس اكەلۋگە ءتيىس.
«قازىر ەلىمىزدە بولات شاردىڭ باسىم بولىگى شەتەلدەن اكەلىنەدى. جەتىسۋداعى زاۋىت ىسكە قوسىلسا, يمپورتقا تاۋەلدىلىك ايتارلىقتاي ازايادى. بۇل – ەكونوميكالىق قانا ەمەس, ستراتەگيالىق تۇرعىدان دا ماڭىزدى قادام», دەيدى ول.
تالدىقورعانداعى جاڭا زاۋىتتىڭ اشىلۋى – ءوڭىر تۇرعىندارى ءۇشىن دە قۋانىشتى جاڭالىق. جەرگىلىكتى جاس ماماندار مەتاللۋرگيا سالاسىنداعى جاڭا تەحنولوگيالاردى يگەرۋ مۇمكىندىگىنە يە بولادى. سونىمەن قاتار ءوندىرىس ورنى قوسالقى قىزمەتتەردى قاجەت ەتەتىندىكتەن, كولىك-لوگيستيكا, ەنەرگەتيكا, سەرۆيس سالالارىنا دا جاناما اسەرى تيەدى.
جەتىسۋ وبلىسى
