دەپۋتاتتاردىڭ ايتۋىنشا, سوڭعى ۋاقىتتا قوعامدا جالعان بەدەل مەن ورىنسىز ماراپاتقا ۇمتىلۋ ءۇردىسى كۇشەيىپ كەلەدى. اسىرەسە, ءتۇرلى ۇيىمدار مەن قاۋىمداستىقتار تاراپىنان بەرىلەتىن توسبەلگىلەر مەن مەدالداردىڭ سانى ارتقان. بۇل جاعداي ماراپاتتاردىڭ قۇندىلىعىن تومەندەتىپ, ەڭبەككە نەگىزدەلگەن ءادىل باعالاۋ جۇيەسىنە كەرى اسەر ەتىپ جاتىر. ساۋالدا ناقتى مىسالدار كەلتىرىلگەن. اتاپ ايتقاندا, 2025 جىلى «Qazaqstan ardagerleri» قوعامدىق بىرلەستىگى تاريحي تۇلعالاردىڭ اتىمەن ماراپاتتار تابىستاعان. الايدا ولاردىڭ اتاۋى مەن ديزاينى مەملەكەتتىك ناگرادالارعا ۇقساس دەپ تانىلىپ, ۇيىمداستىرۋشىلاردىڭ ءبىرى اكىمشىلىك جاۋاپكەرشىلىككە تارتىلعان.
دەپۋتاتتار قولدانىستاعى زاڭنامادا «قوعامدىق ماراپات» ۇعىمىنىڭ ناقتى بەكىتىلمەگەنىن اتاپ ءوتتى. سونىڭ سالدارىنان قوعامدىق ۇيىمدار بەرەتىن ماراپاتتار ءتيىستى قۇقىقتىق باقىلاۋدان تىس قالىپ وتىر.
«قوعامدىق ماراپات ۇعىمىن زاڭعا ەنگىزۋ, تاريحي تۇلعالاردىڭ ەسىمدەرىن جانە جوعارى مارتەبەلى اتاۋلاردى پايدالانۋعا شەكتەۋ قويۋ, سونداي-اق ماراپاتتاردىڭ اتاۋى مەن ديزاينىنا مىندەتتى ساراپتاما ەنگىزۋ قاجەت», دەلىنگەن ساۋالدا.
دەپۋتاتتاردىڭ پىكىرىنشە, بۇل شارالار ماراپاتتاۋ جۇيەسىنىڭ ادىلدىگىن قامتاماسىز ەتىپ, مەملەكەتتىك ناگرادالاردىڭ بەدەلىن ساقتاۋعا مۇمكىندىك بەرەدى.
