7 تاراۋ 30 باپتان تۇراتىن قۇجاتتى قارجى نارىعىن رەتتەۋ جانە دامىتۋ اگەنتتىگى توراعاسى مادينا ابىلقاسىموۆا تانىستىردى. اگەنتتىك توراعاسىنىڭ ايتۋىنشا, اتالعان زاڭ جوباسى قازاقستانداعى كرەديتتىك رەيتينگتىك اگەنتتىكتەر قىزمەتىن قۇقىقتىق تۇرعىدان العاش رەت جۇيەلى تۇردە رەتتەۋگە باعىتتالعان.
«زاڭ جوباسى رەيتينگتىك قىزمەتتى مەملەكەتتىك رەتتەۋ مەن قاداعالاۋدىڭ كەشەندى مودەلىن قالىپتاستىرادى. سونىمەن قاتار ىلەسپە زاڭ جوباسى اياسىندا 3 كودەكس پەن 18 زاڭعا وزگەرىستەر مەن تولىقتىرۋلار ەنگىزۋ كوزدەلگەن. جاڭا زاڭدا كەلەسى رەيتينگتىك قىزمەتتىڭ قۇقىقتىق نەگىزدەرىن بەلگىلەۋ, رەيتينگتىك قىزمەتتىڭ اشىقتىعى مەن تاۋەلسىزدىگىن قامتاماسىز ەتۋ, رەيتينگتىك قىزمەتتى مونيتورينگتەۋ جانە قاداعالاۋ, قارجىلىق قىزمەتتەردى تۇتىنۋشىلاردىڭ قارجىلىق ساۋاتتىلىعىن ارتتىرۋ مىندەتتەرى ايقىندالعان», دەدى مادينا ابىلقاسىموۆا.
الەمدەگى ەڭ باقىتتى ەلدەردىڭ رەيتينگى جاريالاندى: قازاقستان نەشىنشى ورىندا تۇر؟
زاڭ جوباسى شەڭبەرىندە كرەديتتىك رەيتينگتىك اگەنتتىكتەردىڭ ءۇش ءتۇرىن قامتيتىن ينستيتۋتسيونالدىق مودەل ەنگىزىلمەك. العاشقى مودەل بويىنشا تاۋەلسىز ۇلتتىق رەيتينگتىك باعالاۋ ينستيتۋتى رەتىندە قازاقستاننىڭ رەيتينگتىك اگەنتتىگىن قۇرۋ ۇسىنىلادى. ونىڭ اكتسيونەرلەرى قاتارىندا ۇلتتىق بانك, حالىقارالىق رەيتينگتىك اگەنتتىكتەر جانە باسقا دا قارجى ۇيىمدارى ەنەدى. ۇلتتىق بانك اگەنتتىكتىڭ قارجىلىق تۇراقتىلىعىن قامتاماسىز ەتىپ, قارجى نارىعى تاراپىنان سەنىمدى ارتتىرۋعا ىقپال ەتەدى.
ال بۇدان كەيىنگى كەزەكتە حالىقارالىق رەيتينگتىك اگەنتتىكتەر قىزمەتى قاراستىرىلعان. ولاردىڭ قاتارىنا Standard & Poor's, Moody's, Fitch Ratings, سونداي-اق ەكونوميكالىق ىنتىماقتاستىق جانە دامۋ ۇيىمىنا مۇشە كەمىندە بەس ەل مويىنداعان وزگە دە رەيتينگتىك اگەنتتىكتەردى تارتۋ جوسپارلانعان.
نۇربولات امانبەك
