شىمكەنتتەگى «قىزعالداق» سارايىندا وتكەن كىتاپتىڭ تۇساۋكەسەر ءراسىمى بەلگىلى اقىن, «الاش» سىيلىعىنىڭ لاۋرەاتى نارماحان بەگالى ۇلىنىڭ اق باتاسىمەن اشىلدى. سالتاناتتى ءىس-شاراعا رەسپۋبليكاعا تانىمال مەملەكەت جانە قوعام قايراتكەرلەرى, زيالى قاۋىم وكىلدەرى مەن قالامگەرلەر قاتىستى. ال كىتاپتىڭ تۇساۋىن پارلامەنت سەناتىنىڭ دەپۋتاتى دارحان قىدىرالى, «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى, تۇركىستان وبلىستىق ءماسليحاتىنىڭ توراعاسى نۇرالى ابىشەۆ, شىمكەنت قالاسى اكىمىنىڭ ورىنباسارى سارسەن قۇرانبەك جانە جازۋشى مارحابات بايعۇتتىڭ جۇبايى قىزداركۇل پەرنەبايقىزى كەستى.
وسى سالتاناتتى كەشتە ع.ەلشىباي جۋرناليستەر اكادەمياسىنىڭ تولىق مۇشەسى (اكادەميك) اتاندى. مارتەبەلى اتاقتى ەۋرازيا ۇلتتىق ۋنيۆەرسيتەتى جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى قايرات ساق پەن قازاقستاننىڭ ەڭبەك سىڭىرگەن قايراتكەرى ساندىباي اياعان تاپسىردى. سونىمەن بىرگە تۇركىستان وبلىستىق ءماسليحاتىنىڭ دەپۋتاتى قىزمەتىن اتقارىپ جۇرگەن قالامگەر عالىمجان ەلشىباي سەنات توراعاسى ماۋلەن اشىمباەۆتىڭ قۇرمەت گراموتاسىمەن ماراپاتتالدى.
القالى جيىندا ۇلتتىق عىلىم اكادەمياسىنىڭ اكادەميگى, ج.تاشەنوۆ ۋنيۆەرسيتەتى ديرەكتورلار كەڭەسىنىڭ توراعاسى وڭالباي اياشەۆ, م.اۋەزوۆ اتىنداعى وڭتۇستىك قازاقستان ۋنيۆەرسيتەتى وزبەكستان فيليالىنىڭ رەكتورى داريا پەرنەشقىزى, تۇركىستان وبلىسىنىڭ قۇرمەتتى ازاماتى سوزاقباي ابدىقۇلوۆ ءسوز سويلەپ, كىتاپ اۆتورىنىڭ شىعارماشىلىعىنا قاتىستى وي-پىكىرلەرىن ءبىلدىردى. كەشتى بەلگىلى اقىن, عالىم, باسپاگەر تەمىرعالي كوپباەۆ جۇرگىزدى.
جيىن بارىسىندا ع.ەلشىباي جارىق كورگەن العاشقى كىتابىنىڭ مازمۇنىمەن تانىستىردى. جۋرناليستيكا سالاسىندا وتىز جىلدان استام تەر توككەن قالامگەردىڭ 50 جىلدىق مەرەيتويى اياسىنداعى ەڭبەگى ەكەن. جيناققا عالىمجان قامىتبەك ۇلىنىڭ اۋداندىق, وبلىستىق, رەسپۋبليكالىق باسىلىمداردا ءار جىلدارى جاريالانعان ماقالا, سۇحباتتارى ەنىپ وتىر. وندا تۇعىرلى تۇلعالار تۋرالى تانىمدىق-زەرتتەۋ ماقالالارى, ۇلتتىق قۇندىلىقتار, اتا ءداستۇر, ءتىل, ءدىن, ساياسي تاقىرىپتاعى ساراپتامالار, ۇلت رۋحانياتى تۋرالى پۋبليتسيستيكالىق شىعارمالار, مولتەك سەزىمدەرىنىڭ سىرلارىن شەرتكەن جىرلارى توپتاستىرىلدى. ماسەلەن, «تۇعىرلى تۇلعالار» تاراۋى تۇرار رىسقۇلوۆ, سۇلتانبەك قوجانوۆ, ءنازىر تورەقۇلوۆ, نۇرتاس وڭداسىنوۆ, دىنمۇحامەد قوناەۆ, اسانباي اسقاروۆ سىندى قازاقتىڭ ءبىرتۋار پەرزەنتتەرىنىڭ ومىرىنە قاتىستى زەرتتەۋلەرگە ارنالعان.
تولەبي اۋدانى قاسقاسۋ اۋىلىنىڭ تۋماسى عالىمجان ەلشىباي قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن ۇزدىك بىتىرگەن. العاشقى ەڭبەك جولى اۋداندىق «تولەبي تۋى» گازەتىندە باستالدى. «شىمكەنت كەلبەتى», «وڭتۇستىك قازاقستان» گازەتتەرىندە جەمىستى ەڭبەك ەتتى. رەسپۋبليكالىق «جاس الاش» گازەتىندە وسى ءوڭىردىڭ مەنشىكتى ءتىلشىسى بولىپ ۇزاق جىلداي قىزمەت اتقاردى. سونداي-اق قازاق رۋحانياتىنىڭ قاراشاڭىراق باسىلىمدارى «انا ءتىلى» مەن «قازاق ادەبيەتى» گازەتتەرىندە دە قالام تەربەدى. «ەرەن ەڭبەگى ءۇشىن» مەدالىنىڭ يەگەرى ءبىر كەزدەرى قازاقستان جۋرناليستەر وداعىنىڭ تۇركىستان وبلىستىق فيليالىن دا باسقاردى.
شىمكەنت
