ەرلان سايروۆ دەپۋتاتتىق ساۋالىندا بۇگىندە ءاربىر جەكسەنبى سايىن اۋىل, اۋدان, قالا اكىمدەرىنىڭ سايلاۋى ءوتىپ جاتقانىن اتاپ ءوتتى.
الايدا ماجىلىسمەن ماسەلەنىڭ پىسىقتايتىن تۇستارى بار ەكەنىنە نازار اۋداردى.
ء«الى دە سايلانىپ جاتقان اۋىل اكىمدەرىنىڭ قۇزىرەتىن, ولاردىڭ الەۋمەتتىك-ەكونوميكالىق مۇمكىندىگىن رەتتەۋ قاجەت ەكەنىنە كوزىمىز جەتىپ وتىر. زاڭ اياسىندا اۋىل اكىمدەرىنىڭ قۇزىرەتىن ءالى دە كەڭەيتۋىمىز قاجەت. ءتورتىنشى بيۋدجەتتى قالىپتاستىرۋ تەتىكتەرىن زاڭمەن پىسىقتاۋىمىز ءتيىس», دەدى دەپۋتات.
بۇگىندە ەلىمىزدە اۋدان, قالا اكىمدەرىن سايلاۋ پيلوتتىق جوباسى اياسىندا 52 اكىم سايلانعان. دەسە دە دەپۋتات سايلانعان اۋدان اكىمدەرىنىڭ اراسىندا ءبىر جىلعا جەتپەي جۇمىسىنان كەتكەندەر دە بار ەكەنىن جەتكىزدى.
بۇرىن قالا, اۋدان اكىمى بولعان مارحابات جايىمبەتوۆ ارىپتەسىنىڭ ۇسىنىسىن قولدادى. ول ايماقتاردى ارالاۋ بارىسىندا اۋدان اكىمدەرىن تىكەلەي سايلاۋ جۇيەسى ءالى دە پىسىقتاۋدى قاجەت ەتەتىنىنە كوز جەتكىزگەن.
«اۋدانعا بولىنەتىن قارجى ماسەلەسىن رەتتەۋ قاجەت. ال اۋدان اكىمدەرىنىڭ قۇزىرەتى بويىنشا بىرنەشە زاڭعا وزگەرىس ەنگىزۋ كەرەك. مىسالى, ءبىلىم بەرۋ سالاسىنىڭ شىعىستارى وبلىستىق بيۋدجەتتە قالىپ, كىرىستەرى اۋدان بيۋدجەتىندە. قازىر اۋدان اكىمدەرىندە قۇزىرەت از, جاۋاپكەرشىلىك كوپ. ءتىپتى ءبىلىم, دەنساۋلىق, ۆەتەريناريا سالاسى, جۇمىسپەن قامتۋ ورتالىقتارى اۋدان اكىمىنە باعىنبايدى. ەڭ باستىسى, اۋىل اكىمدەرىن سايلاۋدىڭ 5 جىلدىق كەزەڭىن كۇتىپ, اۋىلدا سايلانعان اكىمدەردىڭ تاجىريبەلى كورپۋسىن دايارلاۋ ماڭىزدى. سوندا عانا ساياسي, ەڭ باستىسى كاسىبي كادرلار رەزەرۆى قالىپتاسادى. سوندىقتان وعان ازىرگە ۋاقىتشا توقتاۋ قويىپ, جان-جاقتى پىسىقتاعانىمىز ءجون», دەدى مارحابات جايىمبەتوۆ.
بۇعان قوسا, ەرلان سايروۆ اۋدان اكىمدەرىنىڭ سايلاۋىنا قىرۋار قاراجات كەتەتىنىن العا تارتتى.
«تەك بيىلدىڭ وزىندە 6 اۋدان اكىمى مەن 1 وبلىستىق ماڭىزى بار قالا اكىمىنىڭ سايلاۋى ءوتتى. وسىنىڭ وزىنە مەملەكەتتىك بيۋدجەتتەن 1 ميلليارد تەڭگەگە جۋىق قاراجات جۇمسالدى», دەدى دەپۋتات.
ءوز سوزىندە ەرلان سايروۆ اۋىلدىق وكرۋگ اكىمدەرىنىڭ سايلاۋ جۇيەسىن ەنگىزۋ بەس جىل بويى كەزەڭ-كەزەڭىمەن جۇرگىزىلىپ كەلە جاتقانىن ايتىپ, اۋدان اكىمدەرىن سايلاۋ ماسەلەسىنە جۇيەلى ءارى جان-جاقتى زەردەلەنگەن ءتاسىل قاجەت ەكەنىنە توقتالدى.
بۇل رەتتە ول الەمدىك تاجىريبەگە ارقا سۇيەگەن ساياسي ساراپشىلار مەن مەملەكەتتىك باسقارۋدا تاجىريبەسى بار ازاماتتاردىڭ «اۋدان اكىمدەرىن ءماسليحات دەپۋتاتتارى دا سايلاي الادى» دەگەن پىكىرىن ورتاعا سالدى.
سونداي-اق, دەپۋتاتتار وسىناۋ ماڭىزدى ماسەلەدە اسىعىستىق تانىتۋعا بولمايتىنىنا نازار اۋدارىپ, ۇسىنىستىڭ سايلاۋ پروتسەسىن شەكتەۋگە ەمەس, كەرىسىنشە حالىقتىڭ سايلاۋعا دەگەن سەنىمىن ارتتىرۋعا باعىتتالعانىن ەسكەرتتى.
ءسوز سوڭىندا قوس دەپۋتات جەرگىلىكتى ءوزىن-ءوزى باسقارۋ, مەملەكەتتىك قىزمەت, سايلاۋ, وڭىرلەردى دامىتۋ تۋرالى كوپتەگەن زاڭدارعا قاجەتتى نورمالاردى ەنگىزگەنشە, اۋدان دەڭگەيىندەگى اكىمدەردىڭ تىكەلەي سايلاۋىن توقتاتا تۇرۋدى ۇسىندى.
