دونور – ارتەريالىق گيپەرتەنزيانىڭ اۋىر تۇرىنە شالدىعىپ, ينسۋلت العان 50 جاستاعى ايەل ادام. ناۋقاس جەدەل تۇردە ورتالىق قالالىق كلينيكالىق اۋرۋحاناسىنا جەتكىزىلگەندە, دارىگەرلەر كونسيليۋمى ونىڭ ميى سەمگەنىن انىقتاپ, قايتىس بولعاننان كەيىنگى دونورلىققا جارامدىلىعىن راستادى. تۋىستارى كەلىسىم بەرگەن سوڭ دونورلىق جۇرەكتى الۋ وتاسى باستالدى.
جۇرەك اۋىستىرۋ وتاسى بەس ساعاتتان استام ۋاقىتقا سوزىلىپ, ويداعىداي اياقتالدى. ترانسپلانتاتسيالىق وپەراتسيانى الماتى قالالىق كارديولوگيالىق ورتالىعى مەن UMC كورپوراتيۆتىك قورىنىڭ ماماندارىنان قۇرالعان كاسىبي دارىگەرلەر جۇرگىزدى. بۇل كۇردەلى وتاعا قالالىق جۇرەك ورتالىعىنىڭ ديرەكتورى ەرماعانبەت قۋاتباەۆ پەن UMC باسقارما توراعاسى, پروفەسسور يۋ.ۆ.پيا جەتەكشىلىك ەتتى. UMC كومانداسى اقپارات تۇسكەن بويدا الماتىداعى ارىپتەستەرىنە قولداۋ كورسەتۋ ءۇشىن جەدەل تۇردە ۇشىپ كەلگەن.
يۋري ۆلاديميروۆيچ پيا ورتالىق ۇجىمىن وسى تاريحي وقيعامەن قۇتتىقتاپ, ونىڭ الماتىداعى كارديوحيرۋرگيانىڭ جاڭا كەزەڭگە قادام باسۋىنا جول اشقانىن اتاپ ءوتتى. سونداي-اق, ول دونوردىڭ جاقىندارىنا كوڭىل ايتىپ, ولاردىڭ شەشىمىنىڭ باسقا ادامداردىڭ ءومىرىن ساقتاپ قالعانىنا ەرەكشە توقتالدى.
«ترانسپلانتولوگيا باعدارلاماسىنا قوسىلۋ – ەمدەلۋشىنىڭ ءومىرىن ۇزارتۋعا, ونىڭ ساپاسىن ارتتىرۋعا باعىتتالعان ماڭىزدى قادام. بۇل تەك مەديتسينانىڭ دامۋ دەڭگەيىن ەمەس, قوعامنىڭ دا دونورلىق مادەنيەتكە دايىن ەكەندىگىن كورسەتەدى», دەدى ەرماعامبەت قۋاتباەۆ.
