فوتو: قاراعاندى وبلىسىنىڭ اكىمدىگى
تەكسەرۋ بارىسىندا جولداردىڭ تەحنيكالىق تالاپتارعا سايكەستىگى انىقتالدى. سونداي-اق قىسقا دايىندىق, جولداردى قاردان تازالاۋ جانە قولايسىز اۋا رايى كەزىندە ۋچاسكەلەردى ۋاقىتىلى جابۋ جۇمىستارىن ۇيىمداستىرۋ نازارعا الىندى.
تالداپ-تەكسەرۋ ناتيجەسىندە وبلىس ارقىلى وتەتىن رەسپۋبليكالىق ماڭىزى بار اۆتوجولداردىڭ جەتى ۋچاسكەسىندە جول-كولىك وقيعالارى ءجيى تىركەلەتىنى بەلگىلى بولدى.
وسىعان بايلانىستى پوليتسيا قىزمەتكەرلەرى «قازاۆتوجول» ماماندارىمەن بىرگە اتالعان ۋچاسكەلەردە ارنايى ەسكەرتۋ بەلگىلەرىن ورناتۋعا كىرىسكەن.
«رەسپۋبليكادا العاش رەت قاراعاندى وبلىسىندا جول شەتىنە قىزىل جولاق بەلگىسىن سالدىق. بۇل بەلگى قاراعاندى-قارقارالى تاسجولىندا ورناتىلدى. سەبەبى بۇعان دەيىن ءدال وسى ۋچاسكەدە ەكى كولىك سوعىسىپ, بەس ادام قازا تاپقان ەدى. قىزىل جولاق جۇرگىزۋشىلەردىڭ نازارىن اۋدارىپ, اسىرەسە تۇنگى ۋاقىتتا, قار استىنان دا جاقسى كورىنەدى. جولاق جۇرگىزىلگەننەن بەرى بۇل ۋچاسكەدە بىردە-ءبىر جول-كولىك وقيعاسى تىركەلگەن جوق», دەدى تەكسەرۋگە قاتىسقان قاراعاندى وبلىسى پوليتسيا دەپارتامەنتى باستىعىنىڭ ورىنباسارى جاسقايرات قايىروۆ.
ءوڭىر جولدارىندا قىس مەزگىلىندە قاۋىپسىزدىكتى ساقتاۋ, قايعىلى وقيعالاردىڭ الدىن الۋ ۇشىن رەسپۋبليكالىق تاسجولدارعا ۇلكەن اقپاراتتىق ەكراندار ورناتىلا باستاعان. وندا وبلىستىڭ ءار اۋماعىنداعى اۋا رايى كورسەتكىشتەرى نازارعا ۇسىنىلىپ تۇرادى.
«مىسالى, تەمىرتاۋدا جول جابىلعاندا كەپتەلىس تۋىنداماۋى ءۇشىن بالقاشتا دا قوزعالىستى شەكتەۋ قاجەت بولۋى مۇمكىن. جۇرگىزۋشىلەر ءوزى تۇرعان اۋماقتا كۇن اشىق بولعاندىقتان شەكتەۋ ءمانىن تۇسىنبەي جاتادى. سوندىقتان ەكراندار ارقىلى ناقتى جاعداي كورسەتىلەدى. سونىمەن قاتار, ءبىزدىڭ ۇسىنىسىمىزبەن رەسپۋبليكالىق جولدارعا ەلەكتروندى جىلدامدىق بەلگىلەرى دە ورناتىلدى. جىلدامدىق رەجيمى اۋا رايىنا بايلانىستى اۆتوماتتى تۇردە وزگەرىپ وتىرادى. قولايسىز اۋا رايى كەزىندە جىلدامدىق 80-60 كم/ساعاتقا دەيىن تومەندەتىلەدى», دەدى جاسقايرات قايىروۆ.
