Radio Free Europe/Radio Liberty (RFE/RL) – اقش ۇكىمەتى قارجىلاندىراتىن جانە كەڭەس وداعى مەن شىعىس بلوك ەلدەرى تۇرعىندارىن جاڭالىقتارمەن جانە تاۋەلسىز اقپاراتپەن قامتاماسىز ەتۋ ءۇشىن قىرعي-قاباق سوعىس جىلدارى قۇرىلعان حالىقارالىق حابار تاراتۋشى ۇيىم. بۇگىندە راديو شىعىس ەۋروپا, ورتالىق ازيا جانە تاياۋ شىعىستاعى 23 ەلدە 27 تىلدە حابار تاراتادى.
ۆەنگريا قىزمەتى العاش رەت 1993 جىلى جابىلعان, الايدا ءسوز بوستاندىعى مەن تاۋەلسىز جۋرناليستيكا جاعدايىنىڭ ناشارلاۋىنا بايلانىستى پرەمەر-مينيستر ۆيكتور وربان بيلىگى تۇسىندا, كونگرەسس پەن اقش-تىڭ جاھاندىق مەديا اگەنتتىگىنىڭ قولداۋىمەن, 2020 جىلى قايتا ىسكە قوسىلعان.
جابىلار الدىندا جاريالانعان مالىمدەمەدە Szabad Európa رەداكتسياسى «ۆەنگريالىق وقىرماندارعا ساپالى جۋرناليستيكا مەن وبەكتيۆتى اقپارات ۇسىنۋعا ادال قىزمەت ەتكەنىن» اتاپ ءوتتى. باسىلىم اۋديتورياسىنا قولداۋى ءۇشىن العىس ايتىپ, ماتەريالدارى ونلاين قولجەتىمدى بولاتىنىن مالىمدەدى.
ۆەنگريالىق بولىمشەنىڭ جابىلۋى Radio Free Europe/Radio Liberty, Voice of America, سونداي-اق اقش-تاعى PBS پەن NPR سياقتى حالىقارالىق جانە قوعامدىق حابار تاراتۋشىلارعا ارنالعان قارجىلاندىرۋدى كەڭ كولەمدە قىسقارتۋ اياسىندا جۇزەگە استى.
باق دەرەگىنشە, ترامپ تاعايىنداعان اقش-تىڭ جاھاندىق مەديا اگەنتتىگى اعا كەڭەسشىسى كاري لەيك كونگرەسكە حات جولداپ, Szabad Európa قىزمەتى «اقش-تىڭ ۇلتتىق مۇددەلەرىنە سايكەس كەلمەيدى» جانە «پرەزيدەنت ترامپتىڭ سىرتقى ساياساتىن السىرەتەدى» دەپ مالىمدەگەن.
