ءۇشىنشى توقساندا بانكتەر ءىرى كاسىپورىندار تاراپىنان ءوسىم جانە شاعىن بيزنەس سەگمەنتىندە قالىپتى ديناميكا ەسەبىنەن بيزنەس كرەديتتەرىنە جيىنتىق سۇرانىستىڭ ارتقانىن تىركەدى.
ءىرى بيزنەس سۇرانىسىنىڭ ارتۋى الدىڭعى توقساندا بايقالعان باسەڭدەۋدەن كەيىن ىسكەرلىك بەلسەندىلىكتىڭ قالپىنا كەلۋىمەن جانە ءبىر ءىرى بانكتە وتىنىمدەر سانىنىڭ كوبەيۋىمەن بايلانىستى. دەگەنمەن ورتا دەڭگەيلى كەيبىر بانكتەر ەكونوميكالىق جانە كرەديتتىك جاعدايلارعا قاراي سۇرانىستىڭ تومەندەگەنىن جازدى. بىرقاتار بانكتەردە ۆاليۋتالىق زايمدارعا قىزىعۋشىلىق ءوستى. ورتا كولەمدى بانكتەردىڭ ءبىرى كەپىلدىك قامتاماسىز ەتۋ تالاپتارىن جۇمسارتىپ, قابىلداناتىن اكتيۆتەر ءتىزىمىن كەڭەيتتى.
ناتيجەسىندە ءىرى بيزنەس بەرگەن كرەديتتىك وتىنىمدەر سانى 19%–عا كوبەيىپ, 237-گە جەتتى, ال ولاردىڭ ورتاشا كولەمى 6%–عا ازايىپ, 12,1 ملرد تەڭگەنى قۇرادى.
ورتا بيزنەس تاراپىنان سۇرانىس تۇراقتى ساقتالدى, ال شاعىن كاسىپورىندار اراسىندا قالىپتى ءوسۋ بايقالدى. كرەديتتەۋدى ىنتالاندىرۋدىڭ نەگىزگى قۇرالدارى «ورلەۋ» باعدارلاماسى جانە «دامۋ» قورىنىڭ پورتفەلدىك كەپىلدەندىرۋى بولدى. كەيبىر بانكتەر جاڭا كەپىلدىك ونىمدەرىن ەنگىزدى. ميكروبيزنەس سەگمەنتىندە بانكتەر ءبىر مەزگىلدە قارجىلىق جاعدايعا قويىلاتىن تالاپتاردى كۇشەيتىپ, سونىمەن بىرگە ارنايى موبيلدىك قوسىمشالار ازىرلەپ, تابىستى راستاۋ تاسىلدەرىن كوبەيتتى جانە سكورينگتى جاقسارتتى.
ورتا بيزنەس وتىنىمدەرىنىڭ سانى 5,3 مىڭ دەڭگەيىندە ساقتالدى, ال ورتاشا كولەمى 2%–عا تومەندەپ, 905 ملن تەڭگەنى قۇرادى. شاعىن بيزنەس وتىنىمدەرى 10%–عا ارتىپ, 999 مىڭعا جەتتى, ورتاشا كولەم 9%–عا ازايىپ, 27,7 ملن تەڭگەنى قۇرادى.
بانكتەر ءتورتىنشى توقساندا بيزنەس تاراپىنان كرەديتكە سۇرانىستىڭ تۇراقتى دەڭگەيدە ساقتالۋىن كۇتەدى. الايدا پايىزدىق مولشەرلەمەلەردىڭ وسۋىنە بايلانىستى كرەديت بەرۋ تالاپتارىنىڭ ءبىرشاما قاتايۋى بولجانىپ وتىر.
ءۇشىنشى توقسان قورىتىندىسى بويىنشا بانكتەر يپوتەكالىق زاەمدارعا سۇرانىستىڭ تومەندەگەنىن, ال اۆتوكرەديتتەرگە قىزىعۋشىلىقتىڭ ارتقانىن اتاپ ءوتتى. تۇتىنۋشىلىق كەپىلدى جانە كەپىلسىز كرەديتتەرگە سۇرانىس وتكەن توقسان دەڭگەيىندە قالدى.
يپوتەكالىق سۇرانىستىڭ تومەندەۋىنە يپوتەكا بويىنشا جىلدىق ءتيىمدى سىياقى مولشەرلەمەسىنىڭ 25%-دان 20%-عا تومەندەۋى اسەر ەتتى. وسىعان بايلانىستى بىرقاتار بانكتەر نارىقتىق يپوتەكالىق ونىمدەردىڭ شارتتارىن قايتا قارادى. دەگەنمەن يپوتەكالىق وتىنىمدەر سانى 19%–عا ءوسىپ, 288 مىڭعا جەتتى, ولاردىڭ ورتاشا مولشەرى 21%-عا ارتىپ, 21 ملن تەڭگەنى قۇرادى.
ايتا كەتەيىك, 2025 جىلدىڭ 9 ماۋسىمىندا يپوتەكالىق مولشەرلەمە 25%-دان 20%-عا دەيىن تومەندەتىلگەن ەدى. الايدا 17 ماۋسىمدا قارجى رەتتەۋشىلەرى بۇل نورمانىڭ كۇشىنە ەنۋىن 1 قاراشاعا دەيىن توقتاتتى, كەيىننەن ونى 2026 جىلدىڭ 1 شىلدەسىنە شەگەردى.
كەپىلمەن بەرىلەتىن تۇتىنۋشىلىق كرەديتتەرگە سۇرانىس ەكىنشى توقسان دەڭگەيىندە قالدى. ءبىر ورتا بانكتىڭ تسيفرلىق پيلوتتىق سەرۆيستى ىسكە قوسۋىنا بايلانىستى وتىنىمدەر سانى 94%–عا ءوسىپ, 94 مىڭعا جەتتى, ورتاشا كولەم 21%–عا تومەندەپ, 12 ملن تەڭگەنى قۇرادى.
كەپىلسىز كرەديتتەرگە سۇرانىس تا وزگەرىسسىز قالدى. بانكتەر بۇل سەگمەنتتە رەتتەۋشىلىك تالاپتاردىڭ كۇشەيگەنىن اتاپ ءوتتى: مەرزىمنىڭ 5 جىلعا دەيىن قىسقارۋى, 21 جاسقا دەيىنگى جانە 55 جاستان اسقان ادامدار ءۇشىن قوسىمشا تالاپتار ەنگىزىلۋى, «سالقىنداۋ كەزەڭى», كرەديتتىك تاريحى جوق ازاماتتىڭ بانك بولىمشەسىنە جەكە كەلۋى مىندەتتەلدى. سونىڭ ناتيجەسىندە وتىنىمدەر سانى 6%–عا ازايىپ, 17,2 ملن بولدى, ال ورتاشا ءوتىنىم مولشەرى 7%–عا ارتىپ, 1 ملن 50 مىڭ تەڭگەگە جەتتى.
اۆتوكرەديتتەرگە سۇرانىس 2025 جىلدىڭ العاشقى جارتىسىندا اۆتوسالوندار سۋبسيديالاعان باعدارلامالاردىڭ كەيىنگى اسەرىنەن وسە بەردى. وتىنىمدەر سانى وتكەن توقسانمەن بىردەي – 1,52 ملن بولدى, ال ورتاشا كولەم 5%–عا تومەندەپ, 6,9 ملن تەڭگەنى قۇرادى.
بانكتەر ءتورتىنشى توقساندا يپوتەكا, اۆتوكرەديتتەر جانە كەپىلسىز تۇتىنۋشىلىق كرەديتتەرگە سۇرانىستىڭ ازداپ تومەندەۋىن كۇتەدى. كەپىلدى تۇتىنۋشىلىق كرەديتتەر بويىنشا سۇرانىس تۇراقتى بولادى دەپ بولجانىپ وتىر.
