اقتاۋ قالالىق اكىمدىگى ءباسپاسوز قىزمەتىنىڭ مالىمەتىنشە, 2025 جىلى «New Level» كومپانياسىمەن مەملەكەتتىك مەرەكەلەر قارساڭىندا قالانى بەزەندىرۋ جۇمىستارىنا قاتىستى كەلىسىمشارت جاسالعان.
«كەلىسىمشارتقا سايكەس, مەردىگەر ۇيىم جىل باسىنان بەرى ءار مەملەكەتتىك مەرەكە الدىندا ورتالىق كوشەلەردەگى بيلبوردتارعا باننەرلەر ورناتۋ, جىلتىراقتار ءىلۋ, تاقىرىپتىق جالاۋشالار سالىنعان سەبەتتەر دايىنداۋ, سونداي-اق شاعىن ساۋلەتتىك نىسانداردى ورنالاستىرۋ جۇمىستارىن جۇرگىزىپ كەلەدى», – دەدى اكىمدىك.
«New Level» كومپانياسى قالانى جاڭا جىلعا دايىنداۋمەن دە اينالىسادى. بيىل بۇرىن ساتىپ الىنعان بيىكتىگى 20 مەتر بولاتىن ەكى جاساندى شىرشا ورناتىلادى. ولاردى جاڭارتىلعان شامدار مەن ويىنشىقتارمەن بەزەندىرۋ جوسپارلانعان. شىرشالار ءداستۇر بويىنشا 15ا شاعىن اۋدانداعى امفيتەاتر جانىندا جانە 19ا شاعىن اۋدانىنداعى ءابىش كەكىلباەۆ اتىنداعى مۋزەي اۋماعىندا قويىلادى.
«ورىندالاتىن جۇمىستار اياسىندا شىرشالار ماڭىندا جاڭاجىلدىق تاقىرىپتاعى شاعىن ساۋلەتتىك نىساندار قويىلادى, فوتوزونالار جابدىقتالادى. سونداي-اق كوشەلەر, اعاشتار, گۇلزارلار مەن بۇتالار جاڭا گيرلياندالارمەن جارىقتاندىرىلادى», – دەپ مالىمدەدى قالا اكىمدىگى.
اقتاۋدى مەرەكەلىك بەزەندىرۋ 17-24 جەلتوقسان ارالىعىندا جۇرگىزىلەدى. ال شامدار مەن اشەكەيلەردى الۋ 2026 جىلعى 15 قاڭتارعا جوسپارلانعان.
اكىمدىك بيىل قولدانىلاتىن جاڭا جىلدىق اشەكەيلەردىڭ باسىم بولىگى جاڭادان ساتىپ الىنعانىن, سەبەبى بۇرىنعىلارىنىڭ توزعانىن اتاپ ءوتتى. جالپى شىعىن كولەمى شامامەن 80 ملن تەڭگەنى قۇرايدى.
