ەلباسى «نۇروتان» پارتياسىنىڭ ساياسي كەڭەسىنىڭ بيۋرو وتىرىسىنا قاتىستى

استانا. 8 تامىز. مەملەكەت باسشىسى «نۇر وتان» پارتياسى ساياسي كەڭەسىنىڭ بيۋرو وتىرىسىنا قاتىستى. بۇل تۋرالى akorda.kz حابارلادى. وتىرىس بارىسىندا ەلباسى ۇلكەن جۇمىس اتقارعانى ءۇشىن باۋىرجان بايبەككە العىس ايتتى جانە پارتيا توراعاسىنىڭ جاڭا ءبىرىنشى ورىنباسارى اسقار مىرزاحمەتوۆتى تانىستىردى. قازاقستان پرەزيدەنتى «نۇر وتان» پارتياسى مۇشەلەرىنىڭ ىنتىماقتى جۇمىسى ارقاسىندا ونىڭ سايلاۋالدى تۇعىرناماسىنىڭ 70 پايىزى ورىندالعانىن, باسقا باعىتتار بويىنشا بەلسەندى جۇمىس جۇرگىزىلىپ جاتقانىن ايتتى. «پارلامەنتتەگى فراكتسيا ءبىز جۇزەگە اسىرىپ جاتقان بارلىق باعدارلامالاردى زاڭنامالىق تۇرعىدان نىعايتۋدى قامتاماسىز ەتىپ وتىر. پارتيا ازاماتتىق قوعاممەن كەڭ اۋقىمدى ديالوگتى جولعا قويدى. ونىڭ باستاماسىمەن قۇرىلعان «قازاقستان-2050»  جالپىۇلتتىق دەموكراتيالىق كۇشتەر كواليتسياسى ءبىزدىڭ قوعامدى ۇيىستىراتىن الاڭعا اينالدى, بۇل جۇمىستى جالعاستىرۋ قاجەت. پارتيانىڭ قوعامدىق قابىلداۋلارى  حالىقپەن  كەرى بايلانىستى ءتيىمدى قامتاماسىز ەتۋدە. ينتەرنەتتەگى, سونىڭ ىشىندە العاش رەت ەنگىزىلگەن «ەلەكتروندى پارتيا» ارقىلى جۇمىس كۇشەيدى. سونداي-اق, «جاس وتان» جاستار قاناتىنىڭ جاڭا باعدارلاماسىنىڭ قابىلدانۋىمەن بىرگە جاستارمەن جۇمىس جاڭا ساپالى دەڭگەيگە شىقتى», – دەدى نۇرسۇلتان نازارباەۆ. نۇرسۇلتان نازارباەۆ بىرتىندەپ ورتالىقسىزداندىرۋ جانە وكىلەتتىكتەردى جەرگىلىكتى جەرلەرگە بەرۋ جاعدايىندا پارتيانىڭ وڭىرلەردى باسقارۋ تاجىريبەسى بار كادرلارعا زارۋلىگى ارتا تۇسەتىنىن ايتتى. سونىمەن قاتار, قازاقستان پرەزيدەنتى قازىرگى ۋاقىتتا جەتەكشى ءارى بۇكىل حالىق الدىنداعى جاۋاپتى ساياسي كۇش رەتىندە «نۇر وتان» پارتياسىنىڭ الدىندا  اسا ماڭىزدى مىندەتتەر تۇرعانىن اتاپ كورسەتتى. سونىڭ ءبىرىنشىسى قازاقستاندىقتاردى بەس ينستيتۋتسيونالدىق رەفورمانى جانە «100 ناقتى قادام» ۇلت جوسپارىن جۇزەگە اسىرۋعا جۇمىلدىرۋ بولىپ تابىلادى. «جاڭعىرتۋ جۇمىستارى كۇردەلى جاعدايدا ءوتىپ جاتىر. ءبىزدىڭ ەكسپورتتىق تاۋارلارىمىزدىڭ باعاسى ايتارلىقتاي تومەندەپ, بيۋدجەت اقشاسى ازايۋدا. سوندىقتەن مەن ۇكىمەتكە جانە بارلىق اكىمدەرگە حالىق الدىنداعى بارلىق الەۋمەتتىك مىندەتتەمەلەردى ورىنداۋعا بيۋدجەتتە قاجەتتى قاراجات بولۋىن قامتاماسىز ەتۋ ءۇشىن قارجىنى قاتاڭ ۇنەمدەۋدى تاپسىردىم. ەل اراسىندا دا ءتيىستى ءتۇسىندىرۋ جۇمىستارىن جۇرگىزگەن ءجون», – دەپ اتاپ ءوتتى نۇرسۇلتان نازارباەۆ. سونداي-اق, قازاقستان پرەزيدەنتى «نۇرلى جول» باعدارلاماسىنىڭ جۇزەگە اسىرىلۋ بارىسىن ءتيىمدى باقىلاۋدى قامتاماسىز ەتۋدى تاپسىردى. «ءبىز قابىلداعان وسى جانە باسقا باعدارلامالار دەر كەزىندە جاسالعان, ونى ءتۇسىندىرۋ قاجەت. «نۇرلى جول» باعدارلاماسىن جۇزەگە اسىرۋعا كەيبىر ءىرى كاسىپورىنداردان بوساۋعا ءماجبۇر بولعان ادامداردى تارتۋ كەرەك. بۇل بارشا اكىمدەردىڭ مىندەتى, بۇعان قاجەتتى اقشا بولىنگەن, بارلىق جەردە اۆتوموبيل جولدارىن, اۋرۋحانا, مەكتەپ, باسپانا, تكش نىساندارىن جوندەۋ جانە سالۋدى قامتيتىن جۇمىستار بارشىلىق», – دەپ اتاپ ءوتتى مەملەكەت باسشىسى. نۇرسۇلتان نازارباەۆ پارتيانىڭ قوعامداعى بىرلىك پەن كەلىسىمدى ساقتاۋعا ىقپال ەتىپ, بارلىق تۋىندايتىن ماسەلەلەر بويىنشا حالىقپەن بەلسەندى جۇمىس ىستەۋى تيىستىگىنە نازار اۋداردى. سونىمەن قاتار, قازاقستان پرەزيدەنتى پارتياعا كەلەسى جىلى بولاتىن جانە كۇردەلى ەكونوميكالىق جاعدايدا وتەتىن پارلامەنت سايلاۋى جونىندەگى ناۋقانعا دايىندىقتى قازىردەن باستاۋ كەرەكتىگىن اتاپ ايتتى. سوڭىندا مەملەكەت باسشىسى پرەزيدەنت اكىمشىلىگى, ۇكىمەت, «نۇر وتان» جانە ونىڭ پارلامەنتتەگى فراكتسياسىنىڭ ۇيلەسىمدى جۇمىس جۇرگىزۋى قاجەتتىگىن اتاي وتىرىپ, اسقار مىرزاحمەتوۆكە بەلسەنە جۇمىس ىستەۋ كەرەكتىگىن ايتتى. تالعات رايىمبەك. دەرەك, سۋرەت: akorda.kz.