بۇل تۋرالى ءماجىلىس دەپۋتاتى تيمۋر قىرىقباەۆ جازدى.
«قازىرگى تاڭدا جەكە كەپىلگەرلىك كوپ جاعدايدا بانكتەر قولداناتىن اۋىر ءارى ادىلەتسىز تاجىريبەگە اينالعان. نەسيە الا الماي وتىرعان ازاماتتىڭ تۋىستارى مەن تانىستارى ولاردىڭ ورنىنا تولەم جاساۋ مۇمكىندىگى بولماسا دا, ارتىق مىندەتتەمەلەرگە قول قويۋعا ءماجبۇر بولاتىن جاعدايلار جيىلەپ كەتكەن. مۇنداي پراكتيكا كەيىن كەپىلگەرلەرگە ۇلكەن اۋىرتپالىق ءتۇسىرىپ, ولاردىڭ ءومىرىن ەداۋىر قيىنداتادى. اسىرەسە تەلەفون ارقىلى قاشىقتان راسىمدەلەتىن كەپىلگەرلىك كەزىندە ازامات وزىنە العان مىندەتتەمەنىڭ كولەمىن تولىق تۇسىنبەي قالۋى ءجيى كەزدەسەدى», دەگەن دەپۋتات.
وسىعان بايلانىستى ءماجىلىس دەپۋتاتى تيمۋر قىرىقباەۆ «بانكتەر تۋرالى» زاڭنىڭ 54-بابىنا وزگەرىستەر ۇسىنعانىن حابارلادى. تۇزەتۋگە سايكەس, ەندى بانك كەپىلگەرلىك نەمەسە كەپىل راسىمدەۋ كەزىندە كەپىلگەردىڭ قارجىلىق جاعدايىن ەسكەرە وتىرىپ, ونىڭ تولەم قابىلەتتىلىگىنە مىندەتتى تۇردە باعالاۋ جۇرگىزۋگە ءتيىس. سونداي-اق نەگىزگى قارىز بەن ۇسىنىلعان قامتاماسىز ەتۋ قۇنىنىڭ اراسىنداعى ايىرما بويىنشا مىندەتتەمەنى قابىلداۋعا كەپىلگەردىڭ جازباشا كەلىسىمى الىنۋى مىندەتتەلەدى.
ەگەر ۇسىنىلعان قامتاماسىز ەتۋ بانكتىڭ كەپىل ساياساتىنا ساي كەپىل شارتى جاسالعان ساتتە نەگىزگى مىندەتتەمەنى تولىق كولەمدە قامتاماسىز ەتسە, بانك جەكە تۇلعادان قوسىمشا كەپىلگەرلىك نەمەسە كەپىل تالاپ ەتۋگە قۇقىلى بولمايدى.
دەپۋتاتتىڭ ايتۋىنشا, ول ۇسىنعان تۇزەتۋدى دەپۋتاتتار ب.بازاربەك پەن ا.باققوجاەۆ تا قولداعان.
تيمۋر قىرىقباەۆ جۇمىس بارىسى تۋرالى الداعى ۋاقىتتا دا اقپارات بەرىپ وتىراتىنىن اتاپ ءوتتى.
