فوتو: Oqu-agartu ministrligi
ەلىمىزدە بالالار حالىقتىڭ ۇشتەن ءبىرىن – 34 پايىزىن قۇرايدى, ءارى بۇل كورسەتكىش جىلدان-جىلعا تۇراقتى ءوسىپ كەلەدى.
مەملەكەتتىك ساياساتتاعى باسىم باعىتتاردىڭ ءبىرى – بالالارعا ۇزاق مەرزىمدى قارجىلىق قولداۋ كورسەتۋ. قازاقستان – تابيعي رەسۋرستاردان تۇسەتىن تابىستىڭ ءبىر بولىگىن تىكەلەي بالالاردىڭ يگىلىگىنە باعىتتايتىن سيرەك ەلدەردىڭ ءبىرى. 2024 جىلدان باستاپ «ۇلتتىق قور – بالالارعا» باعدارلاماسى اياسىندا قوردىڭ ينۆەستيتسيالىق تابىسىنىڭ 50 پايىزى كامەلەتكە تولماعان ازاماتتاردىڭ جەكە جيناق شوتتارىنا اۋدارىلىپ كەلەدى. 2025 جىلى ءار بالاعا شامامەن 130 اقش دوللارى كولەمىندە قاراجات ءبولىنىپ, 324 مىڭنان استام بالانى قامتىعان. ەكى جىل ىشىندە ءبىر بالاعا شاققاندا جينالعان ورتاشا سوما 233 اقش دوللارىن قۇرادى.
وقۋ-اعارتۋ مينيسترلىگىنىڭ مالىمەتىنشە, 2023 جىلدان باستاپ بارلىق باستاۋىش سىنىپ وقۋشىلارى 100% تەگىن ىستىق تاماقپەن قامتىلىپ, 1,7 ميلليوننان استام بالانى قامتىعان جانە بالاباقشالاردا 953 مىڭ تاربيەلەنۋشى تەگىن تاماقپەن (بيۋدجەتتەردەن 207,4 ميلليارد تەڭگە ءبولىندى) قامتاماسىز ەتىلدى.
يۋنيسەف جۇرگىزگەن 2024 جىلعى MICS زەرتتەۋىنىڭ ناتيجەلەرى بويىنشا, قازاقستانداعى بالالاردىڭ تاماقتانۋ كورسەتكىشتەرى ەۋروپا مەن ورتالىق ازيا ەلدەرىنىڭ دەڭگەيىنە ساي كەلەدى. ساراپشىلار بۇل كورسەتكىشتەردىڭ تۇراقتىلىعىن جانە كۇرت اۋىتقۋلاردىڭ بولماۋىن ەرەكشە اتاپ ءوتتى.
بالالاردىڭ قاۋىپسىزدىگىن قامتاماسىز ەتۋ ماقساتىندا ەلىمىزدە زاڭنامالىق بازا دا نىعايتىلدى.
«زاڭ بالانى تولىق قورعاۋى ءتيىس. ءبىز بۇل قورعاۋ شىنايى ءارى ءتيىمدى جۇمىس ىستەۋى ءۇشىن ناقتى شارالار قابىلداپ جاتىرمىز. ءاربىر بالا مەملەكەتتەن تەڭ مۇمكىندىك پەن سەنىمدى قولداۋ الۋى كەرەك. ويتكەنى بۇل – ەلىمىزدىڭ بولاشاعىن قالىپتاستىراتىن بەرىك نەگىز», دەدى وقۋ-اعارتۋ مينيسترلىگىنە قاراستى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا.
2026 جىلدان باستاپ ەلىمىزدە بالالاردى قولداۋ مەن دامىتۋعا باعىتتالعان بارلىق شارالاردى بىرىكتىرەتىن «قازاقستان بالالارى» اتتى بىرىڭعاي ۇلتتىق باعدارلاما ىسكە قوسىلادى. بۇل باعدارلاما بالانىڭ ومىرلىك جولىنىڭ بارلىق كەزەڭىن قامتيتىن كەشەندى ۇلتتىق ستراتەگياعا اينالماق.
