استانا. 24 ماۋسىم. قىزىلوردادا سانجار اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ فيليالى اشىلدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
سالتاناتتى شاراعا وبلىس اكىمى قىرىمبەك كوشەرباەۆ پەن اتالعان وقۋ ورنىنىڭ رەكتورى ايقىن اقانوۆ قاتىستى.
فيليال قىزىلوردا وبلىستىق مەديتسينا ورتالىعىنىڭ جانىنان اشىلىپ وتىر. بۇل ايماقتان دارىگەرلەر دايارلاپ شىعاراتىن ءبىلىم شاڭىراعى بولماق. ەڭ باستىسى ەلىمىزدىڭ مەديتسينا ۋنيۆەرسيتەتتەرىندە ينتەرناتۋرا, رەزيدەنتۋرا, ماگيستراتۋرادان ءوتىپ جاتقان ستۋدەنتتەر ەندى قىزىلوردادا ءبىلىم الا الادى.
شارادا وبلىس اكىمى قىرىمبەك كوشەرباەۆ: «قازىر عىلىممەن اينالىسۋ زامان تالابى. ياعني, دارىگەرلەر بارلىعىن زەردەلەپ وتىرۋى قاجەت. حالىقارالىق دەڭگەيدە جۇمىس جاساعان جاعدايدا عانا وبلىس تۇرعىندارى ەم ىزدەپ وزگە ايماققا بارمايدى. بۇل ايماق ءۇشىن ۇلكەن جاڭالىق», – دەدى.
اتالعان ۋنيۆەرسيتەتتىڭ 85 جىل تاريحى بار. وندا 200 پروفەسسور, 800 دوتسەنت, 2 مىڭنان استام مۇعالىم قىزمەت ەتەدى. ەندى وسى بىلىكتى ماماندار سىر ەلىنە كەلىپ, قىزىلوردالىق ستۋدەنتتەرگە ءدارىس بەرەتىن بولادى.
«ءبىزدىڭ ۋنيۆەرسيتەتتەن 70 مىڭنان استام دارىگەرلەر دايارلانىپ شىقتى. نەگىزگى ماقسات وبلىستىڭ پوتەنتسيالىن كوتەرۋ. وعان مۇمكىندىگىمىز جەتكىلىكتى. 2017 جىلى بۇل فيليالدى عىلىمي زەرتتەۋ ورتالىعى رەتىندە قالىپتاستىرامىز», – دەپ مالىمدەمە جاسادى رەكتور ايقىن اقانوۆ.
ايتا كەتەيىك, ايماق باسشىسى وبلىستىق مەديتسينا ورتالىعىن كۇردەلى جوندەۋدەن وتكىزۋگە جانە تەحنيكالىق بازاسىن نىعايتۋعا وبلىستىق بيۋدجەتتەن قارجى قاراستىرىلاتىنىن جەتكىزدى.
تالعات رايىمبەك.
دەرەك, سۋرەت: وبلىس اكىمدىگىنىڭ ءباسپاسوز قىزمەتى.
