حالىقارالىق دەڭگەيدە وتكەن بايقاۋدا 60 بي ءانسامبلى ونەر كورسەتتى. بايقاۋدىڭ حورەوگرافيالىق كەزەڭىندە «ەركەم-اي» بي ءانسامبلى ونەر كورسەتىپ, ۇلكەن توپ – ءبىرىنشى جانە ەكىنشى ورىن, ورتا توپ ەكىنشى ورىن الدى.
دارىندى بالالاردى ونەرگە باۋلىپ جۇرگەن حورەوگراف اقەركە جانبولقىزى جەزقازعان قالاسىنداعى مۋزىكالىق كوللەدجى ءتامامداپ, تۋعان جەرى ش.ەراليەۆ اۋىلىنا «ديپلوممەن اۋىلعا» مەملەكەتتىك باعدارلاماسىمەن كەلگەن.
اۋىلدا «ەركەم-اي» بي ستۋدياسىن اشادى. بي ءانسامبلى التى جىلدىڭ ىشىندە كوپتەگەن جەتىستىككە جەتتى. 2019 جىلى الماتى قالاسىنداعى ونەر بايقاۋىندا ەكىنشى ورىن, قاراعاندى قالاسىندا ءبىرىنشى ورىن الادى. 2020 جىلى قاراعاندى قالاسىنداعى حالىقارالىق بايقاۋدا باس جۇلدەنى ولجالادى. 2021 جىلى شىمكەنت قالاسىندا ەكىنشى ورىن يەلەندى. 2023 جىلى جەزقازعان قالاسى اكىمدىگى ۇيىمداستىرعان «Ulytau Fest» بايقاۋىندا ءبىرىنشى ورىن الىپ, ءانسامبلدىڭ مەرەيى ۇستەم بولدى.
«اۋىل بالالارىنىڭ ساحنادا ونەر كورسەتسەم دەگەن ارمانى ورىندالىپ ءجۇر. ءبىزدىڭ ماقسات – تەك بي بيلەۋ ەمەس, بي ارقىلى بالالاردى تاربيەلەۋ, شابىت بەرۋ جانە ۇلتتىق ونەرگە دەگەن ماحابباتتى وياتۋ!», دەيدى «ەركەم-اي» بي ءانسامبلىنىڭ جەتەكشىسى اقەركە كوپبوسىنوۆا.
ۇلىتاۋ وبلىسى
