استانا. 21 ناۋرىز. بۇگىن «استانا ارلاندارى» بۇكىلالەمدىك بوكس سەرياسى اياسىندا ازەربايجاننىڭ «باكۋ وتتارى» كومانداسىن قابىلدادى. شىمكەنتتە وتكەن كەزدەسۋدە بوكسشىلارىمىز 4:1 ەسەبىمەن جەڭىسكە جەتتى. بۇل تۋرالى egemen.kz حابارلادى.
«استانا ارلاندارى» – «باكۋ وتتارى» 4:1
52 كيلو: ولجاس ساتتىباەۆ – مۋراد رابادانوۆ 3:0 (50:45, 50:45, 50:45) العاشقى جەكپە-جەكتە «ارلاندار» ساپىنان رينگكە ولجاس ساتتىباەۆ شىقسا, قارسى تاراپتان مۋراد رابادانوۆ جۇدىرىقتاستى. بەس راۋند بويى باسىمدىق تانىتقان قازاق بوكسشىسى 3:0 ەسەبىمەن جەڭىسكە جەتىپ, كومانداسىنىڭ قورجىنىنا العاشقى ۇپايدى سالدى. 60 كيلو: زاكير سافيۋللين – البەرت سەليموۆ 0:3 (44:50, 44:50, 44:50) ەكىنشى بولىپ شارشى الاڭعا زاكير سافيۋللين مەن البەرت سەليموۆ كوتەرىلدى. سەليموۆ كومانداسىندا كوشباسشىلاردىڭ ءبىرى. بيىلعى ماۋسىمدا ءوز سالماق دارەجەسى بويىنشا WSB جوباسىنىڭ جەكەلەي رەيتينگىندە كوش باستاپ كەلەدى. ال زاكير ءۇشىن بۇل العاشقى ماۋسىم. سوعان قاراماستان ءبىزدىڭ «ارلان» لايىقتى قارسىلىق كورسەتتى. العاشقى راۋندتار ازەربايجاننىڭ باسىمدىعىمەن وتسە دە, شەشۋشى ساتتەردە سافيۋللين ايانىپ قالمادى. الايدا, تاجىريبەنىڭ ارقاسىندا بۇل ايقاستا سەليموۆ 3:0 ەسەبىمەن جەڭىسكە جەتىپ, جالپى ەسەپتى تەڭەستىردى. 81 كيلو: حرۆوە سەپ – ميحايل دولگولەۆەتس 3:0 (50:44, 50:44, 50:44) «استانا ارلاندارى» ساپىنداعى حورۆاتيالىق لەگيونەر حرۆوە سەپ پەن قارسىلاسى ميحايل دولگولەۆەتس اراسىنداعى جەكپە-جەك ءبىزدىڭ بوكسشىنىڭ ايقىن باسىمدىعىمەن ءوتتى. بارلىق كەزەڭدە تىزگىندى ءوز قولىندا ۇستاعان سەپ تارتىستى قالاۋىنشا وتكىزدى. ناتيجەسىندە, تورەشىلەر ءبىراۋىزدان جەڭىستى «ارلانعا» بەردى (3:0). 69 كيلو: قاناعات مارالوۆ – پارۆيز باگيروۆ 2:1 (49:46, 48:47, 46:49) بۇكىلالەمدىك بوكس سەرياسىنداعى العاشقى جەكپە-جەگىن وتكىزگەن «ارلانىمىز» قاناعات مارالوۆ ءبىزدىڭ كومانداعا مەرزىمىنەن بۇرىن جەڭىس سىيلادى. قارسىلاسى پارۆيز باگيروۆ ەكەۋىنىڭ ايقاسى تەڭ دارەجەدە ءوربىدى. كەزدەسۋ سوڭىندا تورەشىلەر 2:1 ەسەبىمەن جەڭىستى قازاق بوكسشىسىنا بەردى. +91 كيلو: فيليپ حرگوۆيچ – گادجي مۋرتۋزاليەۆ تكو (R1) ال سوڭعى اسا اۋىر سالماقتاعى بوكسشىلاردىڭ جەكپە-جەگى ءبىر راۋندتان ۇزاققا سوزىلمادى. حرۆوەنىڭ وتانداسى, «ارلانىمىز» فيليپپ حرگوۆيچ پەن ازەربايجاندار سەنىم ارتقان گادجي مۋرتۋزاليەۆ اراسىنداعى ايقاستا تورەشىلەر جەڭىستى ءبىزدىڭ بوكسشىعا بەردى. ءبىرىنشى راۋندتىڭ اياقتالۋىنا 30 سەكۋند قالعان كەزدە قازىلار مۋرتۋزاليەۆكە قاتاڭ ەسكەرتۋ جاساپ, تارتىستى توقتاتتى. ناتيجەسىندە, حرگوۆيچتىڭ پايداسىنا تەحنيكالىق نوكاۋت جازىلدى. وسىلايشا «ارلاندار» بيىلعى ماۋسىمدا 10-جەڭىستەرىنە قول جەتكىزىپ, 30 ۇپايمەن «ۆ» توبىندا جەكە-دارا كوش باستادى. العاشقى اينالىمدا ازەربايجان كومانداسىن باكۋدە 3:2 ەسەبىمەن جەڭگەنىمىزدى ايتا كەتەيىك. كوماندامىزدىڭ كەلەسى قارسىلاسى «اقش نوكاۋتشىلارى». مارات جاكيەۆ جاتتىقتىراتىن «ارلاندار» بۇل ايقاستى 27 ناۋرىزدا اقش-تا وتكىزەدى. امەريكالىق بوكشىلار «ۆ» توبىندا 19 ۇپايمەن ءۇشىنشى ورىندا تۇر. ەلامان قوڭىر. دەرەك: egemen.kz. سۋرەت: worldseriesboxing.com.
