– مەن قازاقستاننان, اقتوبە قالاسىنانمىن. مەنى تەك اتا-انام عانا ەمەس, اتا-اجەم دە تاربيەلەدى. بالا كەزىمىزدەن مەن, قارىنداسىم, ءىنىم ۇشەۋمىز حالقىمىزدىڭ داستۇرلەرى جايلى كوپتەگەن اڭگىمەلەر تىڭداپ وستىك. ۇلكەندەر بىزگە ماقال-ماتەلدەردىڭ ءمانىن ءتۇسىندىرىپ, وتكەننىڭ دانالىعىن ءان-كۇي ارقىلى – دومبىرا, قوبىز جانە ۇلتتىق اسپاپتاردا ورىندالاتىن ءداستۇرلى اندەر مەن كۇيلەر ارقىلى ۇيرەتتى.
ءبىزدىڭ ەلىمىز دە مىسىر سياقتى كونە تاريحقا يە, بىراق زاماناۋي الەممەن بىرگە ىلگەرىلەپ كەلەدى. سوندىقتان, ءيا, مەن ەكى حالىق اراسىندا ەرەكشە رۋحاني بايلانىس بارىن سەزىنەمىن. وتكەنىمىز بولماسا, بۇگىنىمىز دە بولماس ەدى.
– پيراميدالار تۋرالى العاش رەت قاشان ەستىدىڭىز؟
– العاش رەت پە؟ ارينە, وتە ەرتەدە – بالكىم, وتكەن عاسىردا شىعار! (كۇلدى) ناقتى ەسىمدە جوق, بىراق پيراميدالاردى العاش مۋلتفيلمدەر مەن بالالار كىتاپتارىنان كوردىم دەپ ويلايمىن. كەيىنىرەك مەكتەپتە ەجەلگى مىسىر تاريحىن وقىدىق.
– پيراميدالار مەن ەجەلگى مىسىر وركەنيەتى ءسىز ءۇشىن نەنى بىلدىرەدى؟
– ولار مەن ءۇشىن مادەنيەت پەن دانالىقتىڭ نىشانى. ولار مىسىر تاريحىنىڭ قانشالىقتى تەرەڭ ءارى باي ەكەنىن كورسەتەدى. وسىنداي تاماشا مۇرانى ساقتاپ, الەممەن ءبولىسىپ وتىرعاندارىڭىزعا ۇلكەن قۇرمەتپەن قارايمىن.
– بۇل ءسىزدىڭ مىسىرداعى العاشقى كونتسەرتىڭىز بە؟ تۋريست رەتىندە وسى ەلگە بۇرىن-سوڭدى كەلىپ پە ەدىڭىز؟
– ءيا, مىسىرعا العاش رەت كەلۋىم. وكىنىشكە قاراي, بۇعان دەيىن تۋريست رەتىندە دە بولماعان ەكەنمىن. سوندىقتان ءدال قازىر وسىندا بولىپ, وسى فەستيۆالدە ەلىمىزدىڭ مادەنيەتىن تانىستىرىپ وتىرعانىما وتە قۋانىشتىمىن.
– ءسىزدىڭ ويىڭىزشا, مۋزىكا حالىقتار مەن مادەنيەتتەردى جاقىنداستىرۋدا قانداي ءرول اتقارادى؟ ونەر مەن مادەنيەت الەمدەگى ۇيلەسىمدىلىكتى ساقتاۋعا كومەكتەسەدى دەپ ويلايسىز با؟
– الەمنىڭ كەز كەلگەن جەرىندەگى – قازاقستانداعى, ەۋروپاداعى نەمەسە امەريكاداعى بولسىن كونتسەرتتەرىمنىڭ بىرىنە كەلسەڭىز, ءارتۇرلى ەلدەردەن جينالعان ادامداردىڭ بىرگە وتىرعانىن كورەسىز. ولار ءتۇرلى تىلدەردە ءان ايتادى: قىتايلىق جانكۇيەرلەر – ورىسشا, يسپاندىقتار – فرانتسۋزشا, ال بارلىعى بىرگە قازاقشا ءان شىرقاپ جاتقانىن كورەسىز. مەنىڭ عاجايىپ Dears جانكۇيەرلەرىم – مۋزىكانىڭ ءسوزسىز-اق قانشاما جۇرەكتەردى بىرىكتىرە الاتىنىنىڭ ەڭ جاقسى دالەلى.
– «پيراميدالار جاڭعىرىعى» فەستيۆالى جونىندەگى اسەرىڭىز قانداي؟ بۇل فەستيۆالدىڭ العاشقى شىعارىلىمىنا قاتىسۋ سىزگە قانداي اسەر سىيلايدى؟
– ءدال وسى جاڭا حالىقارالىق جوبانىڭ ءبىر بولىگى بولعانىما وتە قۋانىشتىمىن. بۇل العاشقى فەستيۆال وسىناۋ كونە تاريحقا تولى اسەم ولكەدە وتەتىن كوپتەگەن شارالاردىڭ باستاۋى بولادى دەپ ۇمىتتەنەمىن.
– پيراميدالار جانىنداعى كونتسەرتتەرىڭىزدى اسىعا كۇتىپ وتىرعان مىسىرلىق جانكۇيەرلەرىڭىزگە جانە مىسىردا تۇراتىن قازاق دياسپوراسىنا ايتارىڭىز بار ما؟
– مۇندا ءومىر ءسۇرىپ جاتقان بارلىق قازاقتارعا جانە قازاقستان مادەنيەتىنە قىزىعۋشىلىق تانىتاتىن, الىستاعى ەلدەن كەلگەن بارلىق جانكۇيەرلەرىمە ەڭ جىلى سالەمىمدى جولدايمىن. ماعان جاڭا كونتينەنتتە ءوز وتانىمدى تانىستىرۋ — زور مارتەبە ءارى ۇلكەن قۋانىش. قولداۋلارىڭىز بەن سۇيىسپەنشىلىكتەرىڭىز ءۇشىن العىس ايتامىن.
بيلەتتەردى Tazkarti Events پلاتفورماسىنان ساتىپ الۋعا بولادى.
