ءبىر پالاتالى پارلامەنتكە كوشۋدى ەل حالقىنىڭ كوپشىلىگى قولدادى

زەرتتەۋ دەرەكتەرىنشە, قازاقستان ازاماتتارىنىڭ جالپى العاندا 68,3%-ى ءبىر پالاتالى پارلامەنت يدەياسىن وڭ قابىلدايدى. دەگەنمەن, قولداۋ دەڭگەيى رەسپوندەنتتەردىڭ جىنىسى مەن جاسىنا قاراي ءارتۇرلى. ماسەلەن, ەرلەر اراسىندا بۇل كورسەتكىش 71,1%, ال ايەلدەر اراسىندا 66,1%-دى قۇراعان. رەفورمانى قولداۋدىڭ ەڭ جوعارى دەڭگەيى 18-29 ارالىعىنداعى جاستار توبىندا بايقالعان (72,9%). بۇل كورسەتكىش – قوعامنىڭ الەۋمەتتىك تۇرعىدان ەڭ بەلسەندى بولىگىنىڭ ساياسي جۇيەنى جاڭعىرتۋعا قىزىعۋشىلىق تانىتىپ وتىرعانىن ايقىن كورسەتەدى.

پروپورتسيونالدى سايلاۋ جۇيەسىنە كوشۋ ماسەلەسىنە كەلسەك, ساۋالناماعا قاتىسقانداردىڭ 63,6%-ى بۇل باستامانى قولدايدى. قولداۋ دەڭگەيى ايەلدەرگە قاراعاندا (62,2%) ەرلەر اراسىندا سالىستىرمالى تۇردە ازداپ جوعارى – 65,4%. سونداي-اق, بۇل پىكىرگە اسىرەسە جاستار توبى ايرىقشا قولداۋ كورسەتىپ وتىر: 18-29 جاس ارالىعىنداعى رەسپوندەنتتەردىڭ 71%-ى پارلامەنتتى تەك پارتيالىق تىزىمدەر بويىنشا قالىپتاستىرۋدى وڭ باعالايدى.

ماڭىزدى ءرول اتقاراتىن تاعى ءبىر فاكتور – ءبىر پالاتالى پارلامەنتكە كوشۋگە ەڭ جوعارى قولداۋدى عىلىمي دارەجەسى بار ازاماتتار (75,4%), جوعارى بىلىمدىلەر (71,7%) كورسەتىپ وتىر. سول سياقتى, پروپورتسيونالدى جۇيەنىڭ جاقتاۋشىلارى دا كوبىنەسە جوعارى ءبىلىمدى رەسپوندەنتتەر (67,5%), بۇل ساياسي جۇيەنى جاڭعىرتۋ قۇرالى رەتىندە پارتيالىق وكىلدىك تەتىكتەرىن ءبىلىمدى حالىق توپتارىنىڭ قاراستىرۋ ءۇردىسىن راستايدى.

تاعى ءبىر ايتا كەتەتىن جايت, اۋىلدىق جەرلەردە تۇراتىندار جالپى قالالىقتارمەن سالىستىرعاندا پارلامەنت رەفورماسىن جوعارى دەڭگەيدە قولدايدى. ماسەلەن, ءبىر پالاتالى پارلامەنتكە كوشۋگە اۋىل تۇرعىندارىنىڭ 72,8%-ى وڭ باعاسىن بەرەدى, ال قالالىقتار اراسىندا بۇل كورسەتكىش 65,4%-دى قۇرايدى. پارلامەنتتى پارتيالىق تىزىمدەر بويىنشا قالىپتاستىرۋعا قاتىستى دا ۇقساس ايىرماشىلىقتار بايقالادى: اۋىلدىق رەسپوندەنتتەردىڭ 67,8%-ى, قالالىقتاردىڭ 60,8%-ى باستامانى قولدايدى.

جالپى, قسزي دەرەكتەرى پارلامەنت رەفورماسىنا قاتىستى قوعامداعى كەلىسىمنىڭ جوعارى دەڭگەيدە ەكەنىن كورسەتەدى. ءبىر پالاتالى پارلامەنت پەن پارتيالىق وكىلدىك جۇيەسىنە كوشۋگە قولداۋدىڭ باسىم بولۋى, قوعامنىڭ زاڭ شىعارۋ بيلىگىنىڭ تيىمدىلىگىن ارتتىرۋعا جانە ساياسي مادەنيەتتى دامىتۋعا باعىتتالعان ينستيتۋتسيونالدىق وزگەرىستەرگە دايىن ەكەنىن دالەلدەيدى.

الەۋمەتتانۋلىق ساۋالناما قسزي تاپسىرىسىمەن بيىل 3 قازان مەن 5 قاراشا ارالىعىندا جۇرگىزىلىپ, ىرىكتەمە كولەمى 8 000 رەسپوندەنتتى قۇراعان. ساۋالناماعا 17 وبلىس پەن استانا, الماتى, شىمكەنت قالالارىنىڭ 18 جاستان اسقان رەسپوندەنتتەرى قاتىسقان.