وبلىس اكىمدىگى «بالىق شارۋاشىلىعىن 2015-2017 جىلدارعا دەيىنگى دامىتۋ» باعدارلاماسىن قابىلداعان. وسى رەتتە شاردارادا قانداي شارۋالار اتقارىلاتىندىعى, جوبالاردىڭ قارجىلاندىرۋ تەتىكتەرى تالقىلانعان. ناتيجە جاقسى. بۇرىن 3800 توننا بالىق اۋلانىپ كەلسە, قازىر اۋداندا 8 000 تونناعا دەيىن بالىق اۋلانادى. بولاشاقتا 27 تاۋارلى بالىق شارۋاشىلىعى ىسكە قوسىلماق. دايىن ءونىمدى ەۋروپا نارىعىنا ەكسپورتتاۋ ءۇشىن قوسىمشا 400 ملن. تەڭگە بولىنەدى. بۇل شارۋاعا كەرەكتى قارجى «ماكسيمۋم» ايماقتىق ينۆەستيتسيالىق ورتالىعىنان بەرىلمەك. شاردارادا وبلىس اكىمدىگىنىڭ ۇيىمداستىرۋىمەن وتكەن سەمينار-كەڭەستە وسىنداي جاعداياتتار ايتىلدى. سەمينارعا قاتىسۋشىلار «حاميت» سەلولىق تۇتىنۋ كووپەراتيۆىنىڭ 387 گەكتار اۋماقتى الىپ جاتقان بالىق شارۋاشىلىعىندا بولدى. مۇندا بالىقتى قابىلداپ العاننان تازارتىپ, فيلەسىن مۇزداتقىشقا سالىپ, دايىن ءونىمدى قوراپتارعا قاتتاۋعا دەيىنگى پروتسەستەر اتقارىلادى. شاردارادا سۋ قويماسى بالىق شارۋاشىلىعىنان تابىس تابۋدىڭ ۇلكەن مۇمكىندىگىن كورسەتىپ وتىر. ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا تاعى ەكى شاعىن بالىق زاۋىتى مەن ءبىر بالىق وڭدەۋ تسەحى ىسكە قوسىلۋ ۇستىندە. بالىق كاسىپورىندارى شاباقتاردى كول اۋماعىنداعى توردا ءوسىرۋ ءادىسىن مەڭگەرىپ العان. براكونەرلەردىڭ شاباقتارعا دەيىن ءسۇزىپ الاتىن قىتاي تورىندا كەتپەيدى, كولدىڭ كوركىنە اينالىپ كوبەيەدى. بۇل قاناتقاقتى جوبانىڭ وسىنداي ەرەكشەلىكتەرى بار. اۋدانعا جۇمىس ساپارىمەن بارعان وبلىس اكىمى اسقار مىرزاحمەتوۆ تاعى ءبىر كۇردەلى ماسەلەنىڭ ءتۇيىنىن تارقاتىپ قايتتى. شاردارا – وڭتۇستىكتىڭ وبلىس ورتالىعىنان ەڭ الىس اۋدانى. جولدار جوندەۋدەن ءوتتى دەگەنمەن, ماشيناعا ۇزاق. كەڭەس وكىمەتى داۋىرلەپ تۇرعان شاعىندا شىمكەنت–شاردارا باعىتىندا ان-24 سياقتى ۇشاقتار قاتىناعان. اسقار مىرزاحمەتوۆ ەسكى اۋەجايدا بولدى. ۇزىندىعى 1625 مەتر, بەتوندالعان اۋماعى 75 مىڭ شارشى مەتردى قۇرايتىن اەروپورت كەشەنى قايتا قالپىنا كەلتىرىلۋ ءۇشىن كۇردەلى جوندەۋدەن وتەدى. وبلىستىق ەنەرگەتيكا, تۇرعىن ءۇي-كوممۋنالدىق شارۋاشىلىق جانە جولاۋشىلار كولىگى باسقارماسىنىڭ باسشىسى نۇرلان الدامجاروۆ: «جۇمىس توبىن قۇرۋ جونىندە وبلىس اكىمى شەشىم شىعاردى. اۋەجايدى قايتا قۇرىلىمداۋ جۇمىسى ءبىر اي كولەمىندە باستالىپ, ەكى ايدىڭ ىشىندە اياقتالۋى ءتيىس. بۇل شارۋاعا 200 ملن. تەڭگە جۇمسالماق. جوندەۋ جۇمىستارى «وڭتۇستىك سپك» ارقىلى جۇرگىزىلەدى. اللا جازسا ەكى ايدان كەيىن شاردارانىڭ اۋەجايى العاشقى ۇشاقتارىن قابىلدايتىن بولادى», دەدى. شاردارا – شالقار كول. جاعالاۋى شاڭسىز التىن قۇم. دەمالىس ورىندارى كوپ. باسقا وبلىستاردان دا ادامدار كەلىپ كولگە ءتۇسىپ, بالىق اۋلاپ كۇنگە قىزدىرىنىپ راحاتتانىپ جاتادى. ياعني, ىشكى ءتۋريزمدى دامىتۋعا ناعىز لايىق جەر. ال تۋريزم دەگەنىڭىز – قازىناعا قۇيىلعان قارجى, قوسىمشا جۇمىس كۇشى. شاعالاسى شارق ۇرعان شاردارا اسپانىندا ەندى كۇمىس قانات ۇشاقتار دا ءجيى كورىنەتىن كۇن الىس ەمەس. اۋدان اكىمى قامىتبەك ايتورەەۆ بولاشاقتا الماتى, استانادان دا اۋە كەمەلەرى شارداراعا قاتىنايدى دەيدى.
باقتيار تايجان, «ەگەمەن قازاقستان».
وڭتۇستىك قازاقستان وبلىسى.
