مۇنداي تاجىريبەنىڭ ءبىرىن ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ Heriot-Watt ۋنيۆەرسيتەتى ەنگىزدى. Plenitude Kazakhstan كومپانيانىڭ باس ديرەكتورى فەدەريكو پۋلەزە اقتوبە كامپۋسىندا ءبىلىم الۋشىلارعا كومپانيانىڭ جاڭارتىلاتىن ەنەرگيا كوزدەرىنىڭ جۇزەگە اسۋ بارىسىن ءتۇسىندىردى. سپيكەر «Electrical Power Engineering» ءبىلىم بەرۋ باعدارلاماسىمەن وقىپ جاتقان ستۋدەنتتەرگە جەل ەلەكتر ستانتسياسىنىڭ تولىق جۇمىس تسيكلى, تەحنيكالىق ۇدەرىستەرىن ايتىپ بەردى.
ايتا كەتسەك, اقتوبە وبلىسىنىڭ قارعالى جانە حرومتاۋ اۋداندارىندا ورنالاسقان بادامشا-1 جانە بادامشا-2 جەل ەلەكتر ستانتسيالارى بۇگىندە ءوڭىردىڭ نەگىزگى ەلەكتر ەنەرگيا كوزىنە اينالىپ وتىر. جالپى قۋاتى 96 مەگاۆاتت بولاتىن بۇل نىساندار – ەلىمىزدەگى العاشقى جەكە قارجىلاندىرىلعان جەل ستانتسيالارىنىڭ ءبىرى. زاماناۋي General Electric تۋربينالارىمەن جابدىقتالعان ستانتسيالار جىل سايىن جۇزدەگەن ميلليون كيلوۆاتت-ساعات ەكولوگيالىق تازا ەنەرگيا وندىرەدى. وسى جوبالاردى جۇزەگە اسىرىپ وتىرعان Plenitude Kazakhstan كومپانياسى ەلىمىزدە سونداي-اق Shaulder كۇن ەلەكتر ستانتسياسى (50 مۆت) مەن ماڭعىستاۋ گيبريدتى ەنەرگيا جوباسىن ىسكە اسىرىپ كەلەدى.
سپيكەر ەلىمىزدە اشىلعان Heriot-Watt ۋنيۆەرسيتەتىنىڭ كامپۋسىندا «Electrical and Electronic Engineering» باعدارلامالارىنىڭ ماڭىزىن اتاپ ءوتىپ, اعىلشىن تىلىندە ءبىلىم الۋ بولاشاق ينجەنەرلەردىڭ حالىقارالىق دەڭگەيدە باسەكەگە قابىلەتتى بولۋىنا مۇمكىندىك بەرەتىنىن ايتتى.
