مينيسترلىكتىڭ ايتۋىنشا, جاڭا وزگەرىستەر اتا-انالار ءۇشىن راسىمدەردى جەڭىلدەتىپ, قاجەت اقپاراتتى جيناۋدى اۆتوماتتاندىرۋعا باعىتتالعان. ياعني بۇرىن قاعاز كۇيىندە سۇراتىلاتىن بىرقاتار قۇجاتتار تسيفرلىق فورماتقا كوشەدى. بۇل قىزمەت كورسەتۋدى اشىق ءارى جەدەل ەتۋگە مۇمكىندىك بەرەدى.
جوبادا «ۇيدە وقىتۋ شىعىندارىن وتەۋ» قىزمەتىنىڭ بىرىڭعاي دەرەكتەر بازاسى ەنگىزىلەتىنى ايتىلعان. بۇل – ءار وڭىردە ءارتۇرلى تولتىرىلاتىن قۇجاتتاردىڭ بىرىزگە تۇسىرىلەتىنىن بىلدىرەدى. سونىمەن بىرگە, قىزمەتتى بولاشاقتا پرواكتيۆتى فورماتقا اۋىستىرۋ جوسپارلانىپ وتىر. ياعني اتا-انالارعا قۇجات جيناپ ءجۇرۋدىڭ قاجەتى جوق, مەملەكەت قاجەتتى اقپاراتتى ءوزى جينايدى.
وزگەرىستەر ەكى نەگىزگى قۇجاتقا ەنگىزىلمەك:
– 2021 جىلعى №84 بۇيرىق (الەۋمەتتىك-ەڭبەك سالاسىنداعى مەملەكەتتىك قىزمەتتەر تۋرالى);
– 2016 جىلعى №28 بۇيرىق (ۇيدە وقىتۋ شىعىندارىن وتەۋگە قاتىستى اكىمشىلىك دەرەكتەر نىسانى).
بۇيرىق جوباسى 2025 جىلدىڭ 1 جەلتوقسانىنا دەيىن «اشىق نقا» پورتالىندا قوعامدىق تالقىلاۋدا بولادى. ازاماتتار وسى مەرزىمگە دەيىن ۇسىنىس ءبىلدىرىپ, قۇجاتقا ءوز پىكىرىن قالدىرا الادى.
