جيىننىڭ كۇن تارتىبىندە ەكى ەلدىڭ ساۋدا-ەكونوميكا, كولىك-ترانزيت, سۋ-ەنەرگەتيكا جانە مادەني-گۋمانيتارلىق سالالارداعى ىنتىماقتاستىق ماسەلەلەرى قاراستىرىلدى. قازاقستان پرەزيدەنتى قوناقجايلىعى ءۇشىن پرەزيدەنت شاۆكات ميرزيەەۆكە ريزاشىلىعىن ءبىلدىرىپ, ساپارىنىڭ باستى ماقساتى – قوس حالىقتىڭ دوستىعىن نىعايتىپ, تاتۋ كورشىلىك بايلانىستارىن كۇشەيتۋ, سونداي-اق ءتۇرلى سالاداعى ءوزارا ءتيىمدى ىقپالداستىقتى دامىتۋ ەكەنىن اتاپ ءوتتى. سونداي-اق قاسىم-جومارت توقاەۆ وزبەكستاندا حالىقتىڭ ءال-اۋقاتىن جاقسارتۋدى كوزدەيتىن ماڭىزدى باستامالار قولعا الىنعانىن ايتىپ ءوتتى. «وزبەكستان – ءبىز ءۇشىن تۋىستاس, اعايىن ەل, تاتۋ كورشى ءارى سەنىمدى سەرىكتەس. قوس ەل اراسىنداعى دوستىقتىڭ تامىرى تەرەڭ, حالىقتارىمىزدىڭ رۋحاني قۇندىلىقتارى ورتاق دەۋگە بولادى. قازاق-وزبەك قارىم-قاتىناسى ستراتەگيالىق سەرىكتەستىك جانە وداقتاستىق رۋحىندا قارقىندى دامىپ كەلە جاتىر», دەدى قازاقستان پرەزيدەنتى.
حالىقارالىق احۋال اۋمالى-توكپەلى كەزەڭدە سان قىرلى ىقپالداستىقتىڭ دامۋ قارقىنىن ارتتىرۋ قاجەت ەكەنىن اتاپ وتكەن مەملەكەت باسشىسى ەكى ەل اراسىندا جالپى سوماسى ءبىر جارىم ميلليارد دوللاردان (1,7 ملرد دوللار) اساتىن 78 بىرلەسكەن جوبا بارىن ءمالىم ەتتى. ونىڭ اياسىندا 15 مىڭنان استام جۇمىس ورنىن اشۋ كوزدەلگەن. «اتالعان جوبالار تولىق ىسكە اسسا, ەكونوميكالىق جانە ينۆەستيتسيالىق ىقپالداستىعىمىز ايتارلىقتاي كۇشەيەدى. بۇگىن ءبىز ولاردىڭ ءبىر پاراسىن ىسكە قوسامىز. قازاقستاننىڭ وزبەكستانعا سالاتىن ينۆەستيتسياسىن ودان ءارى ىنتالاندىرۋعا نيەتتىمىز. بۇل رەتتە وزبەك دوستارىمىزدان ادەتتەگىدەي قولداۋ كۇتەمىز. قۇرىلىسى ءجۇرىپ جاتقان «ورتالىق ازيا» حالىقارالىق ونەركاسىپ كووپەراتسياسى ورتالىعى يندۋستريالىق قۋاتىمىزدى ودان ءارى ارتتىرۋدا ماڭىزدى ءرول اتقارادى», دەدى قاسىم-جومارت توقاەۆ.
سونداي-اق پرەزيدەنت قاراپايىم ساۋدادان گورى ەت, بيداي, مايلى داقىلداردى وڭدەۋدىڭ تولىق وندىرىستىك تىزبەسىن قالىپتاستىرۋدى, مال شارۋاشىلىعى مەن ورگانيكالىق ەگىن شارۋاشىلىعىن بىرگە دامىتۋدى ۇسىندى. ءوزارا ىنتىماقتاستىق الەۋەتىن تولىق پايدالانۋدى قۇپتايتىنىن جەتكىزدى. ەڭ اۋەلى, ساۋدا-ەكونوميكا سالاسىنا ەرەكشە ءمان بەرۋ كەرەكتىگىن اتاپ ءوتتى. «ساۋدا-ساتتىقتى دامىتۋ ءۇشىن ءوسىمنىڭ تىڭ مۇمكىندىكتەرىن ىزدەۋ, تاۋارلار نومەنكلاتۋراسىن كەڭەيتۋ جانە شيكىزاتتىق ەمەس ەكسپورتتى ىنتالاندىرۋ شارالارىن قابىلداۋ قاجەت. وسى ورايدا ءوزارا تاۋار اينالىمىن ارتتىرۋ باعدارلاماسىن ساپالى جۇزەگە اسىرۋ ماڭىزدى. بۇگىن قۇرىلاتىن ءوڭىر باسشىلارى كەڭەسىن, سونداي-اق ىسكەرلىك كەڭەس پەن «UzKazTrade» بىرلەسكەن ساۋدا كومپانياسى سەكىلدى باسقا دا ەكىجاقتى مەحانيزمدەردىڭ جۇمىسىنان ناقتى ناتيجە كۇتەمىز», دەدى قازاقستان پرەزيدەنتى.
قاسىم-جومارت توقاەۆ جاڭادان قۇرىلاتىن جۇمىس توبىنان بارلىق اسپەكتىنى مۇقيات زەردەلەپ, ءوزارا ءتيىمدى ىنتىماقتاستىقتى جولعا قويۋعا قاتىستى ۇسىنىس بەرۋدى سۇرادى.
تاشكەنت
