– كەيىنگى كەزدە حالىق اراسىندا وسى ساۋال ءجيى قويىلىپ ءجۇر. كەيبىرى مۇنى بانك بەرەتىن جەڭىلدىك دەپ ويلايدى. شىن مانىندە جاعداي مۇلدە باسقاشا. حالىق اراسىندا ايتىلىپ جۇرگەن 5 جىلدىق شەگەرۋ – تولەم قابىلەتىن قالپىنا كەلتىرۋ ءراسىمى. بۇل ءراسىم سوت ارقىلى بەكىتىلەدى. ياعني زاڭ بويىنشا راسىمدەلەدى. ەڭ ماڭىزدىسى, بانك كليەنتكە 5 جىل دەپ مىندەتتى تۇردە جەڭىلدىك بەرمەيدى. زاڭدا بانك سونداي شەگەرىم جاساۋعا ءتيىس دەگەن تالاپ جوق. سول سەبەپتى ادامداردىڭ كوبىنىڭ ءوتىنىشى بانك تاراپىنان ەسكەرىلمەي جاتادى. ال سوت بەكىتكەن ءراسىم مۇلدە باسقا دەڭگەيدە جۇمىس ىستەيدى. بۇل ءراسىم بەكىگەن سوڭ قارىزى بار ادام بەس جىلعا ءبولۋ ارقىلى قارىزىن جوسپارلى تۇردە تولەي الادى.
وسى ءراسىمنىڭ ارتىقشىلىقتارىن قاراپايىم تىلمەن تۇسىندىرەيىن. ءبىرىنشى ارتىقشىلىعى, ەسەپشوت جابىلمايدى. ايلىق تۇگەل تۇسەدى. كارتا دا ەشقانداي شەكتەۋسىز جۇمىس ىستەيدى. Kaspi.kz بولسىن, باسقا بانك كارتاسى بولسىن ءبارى قولدانىلادى. ەكىنشى ارتىقشىلىعى, ءراسىم ءجۇرىپ جاتقان كەزەڭدە ەشكىم سوتقا بەرە المايدى. قارىزدى ءوندىرۋ ءۇشىن بانك تە, كوللەكتور دا شاعىمدانبايدى. ءۇشىنشى ارتىقشىلىعى, سوت ورىنداۋشىعا ءىس وتپەيدى. بۇل – ۇلكەن جەڭىلدىك. سەبەبى سوت ورىنداۋشى ادامدى تىعىرىققا تىرەيدى. جالاقىدان ۇستايدى, شوتتى بۇعاتتايدى, م ۇلىككە تىيىم سالادى. ال بۇل ءراسىم كەزىندە ونداي ارەكەتتەردىڭ ەشبىرى بولمايدى. تاعى ءبىر ماڭىزدى نارسە 3 پايىزدىق شىعىن تولەمەيسىز. سوت ارقىلى شىعىپ كەتەتىن قوسىمشا شىعىندار بولمايدى. كەلەسى ارتىقشىلىعى, قارىز سوماسى ءوسىپ كەتپەيدى. كوپ ادام قارىزدىڭ ۇستىنە قارىز قوسىلىپ, شەكسىز كوبەيىپ كەتكەنىن كورىپ مازاسىزدانادى. ال مۇندا 5 جىلعا بەرىلگەن جوسپار بويىنشا قانشا تولەيسىڭ دەپ كورسەتىلسە, سول سوما عانا تولەنەدى. ۇستىنە ءوسىم قوسىلمايدى.
ءراسىم سوتتا قارالىپ جاتقان كەزدىڭ وزىندە دە, ءسىزدىڭ شو-تىڭىز اشىق بولادى. شەتەلگە شىعۋعا تىيىم سالىنبايدى. ماجبۇرلەپ ءوندىرىپ الۋ شارالارىن قولدانۋعا ەشكىمنىڭ قۇقىعى جوق. بۇل نورمانى زاڭنىڭ 22-بابى بەكىتەدى.
ءوز تاجىريبەمدە تالاي ادامنىڭ وسى ءراسىم ارقىلى قايتا مۇمكىندىك العانىن كوردىم. بۇرىن قارىزدان قاشىپ, تەلەفونىن ءوشىرىپ جۇرەتىن ادامدار وسى ءراسىم ارقىلى زاڭدى جولعا شىقتى. قارىزىن جوسپارلاپ تولەي باستادى.
دايىنداعان –
ەلىگىماي توڭكەر,
«Egemen Qazaqstan»
