بۇل Advanced Mobile Location حالىقارالىق جۇيەسى ارقىلى جۇزەگە اسىپ وتىر.
— توتەنشە جاعدايعا تاپ بولىپ, بىزگە قوڭىراۋ شالعان ازاماتتىڭ قۇرىلعىسى ونىڭ ناقتى ورنالاسقان ورنىن اۆتوماتتى تۇردە انىقتاپ, كوورديناتتاردى وپەراتورعا جىبەرەدى. جۇيە ءبىر مەزەتتە ەڭ جاقىن ورنالاسقان قۇتقارۋ نەمەسە جەدەل كومەك ەكيپاجىن انىقتاپ, وپەراتورعا ۇسىنادى. سونىڭ ارقاسىندا ماماندار بۇرىنعىعا قاراعاندا الدەقايدا جەدەل ارەكەت ەتە الادى. ال ەگەر قۇرىلعىدا ينتەرنەت بولماسا, AML جۇيەسى كوورديناتتاردى SMS ارقىلى جىبەرەدى, — دەيدى IT-Space كومپانياسىنىڭ باس ديرەكتورى نۇرجان نۇرلىباەۆ Kazinform تىلشىسىنە بەرگەن سۇحباتىندا.
ازىرگە جۇيە ەلىمىز بويىنشا 3 ملن Android تەلەفونىندا جۇمىس ىستەپ تۇر. ال ەل بويىنشا جالپى 95% iOS قۇرىلعىسىندا سىناق رەجيمىمەن قوسىلعان. ماماندار جىل سوڭىنا دەيىن قازاقستانداعى بارلىق سمارتفونعا Advanced Mobile Location جۇيەسىن ەنگىزۋدى جوسپارلاپ وتىر.
— ەگەر ادام قوڭىراۋ شالىپ, بايلانىسقا شىعا الماسا, وپەراتور ول ادامعا اۆتوماتتى تۇردە قايتا قوڭىراۋ شالا الادى. وسىلايشا بىزبەن بايلانىسا الماعان كوپتەگەن توتەنشە قوڭىراۋعا قايتا حابارلاسامىز. جۇيە اۆتوماتتى تۇردە قاي بولىمشە مەن قاي اۋماقتا ورنالاسقانىن, سونداي-اق قانداي كۇشتەر مەن قۇرالدار قاجەت ەكەنىن كورسەتەدى. مىسالى, ەگەر وبەكت بولسا, جۇيە بىردەن ونىڭ ءورت قاۋپى بار ەكەنىن انىقتايدى, قانداي ماتەريالدار ساقتالعانىن ەسەپكە الادى جانە سول بويىنشا قالاي ارەكەت ەتۋى كەرەك ەكەنىن بەلگىلەيدى. بۇرىن بۇنىڭ ءبارى قولمەن جۇرگىزىلەتىن, سوندىقتان اقپاراتتى بەرۋ كەزىندە 5-10 مينۋتقا دەيىن ۋاقىت جوعالاتىن. ال ءبىزدىڭ ماقساتىمىز — ادام فاكتورىن بارىنشا ازايتۋ, — دەيدى سپيكەر.
