فورۋمدا جاڭا سالىق كودەكسىنىڭ بيزنەسكە بەرەتىن مۇمكىندىكتەرى ەرەكشە اتاپ ءوتىلدى. وڭايلاتىلعان دەكلاراتسيا رەجيمىندە تىيىم سالىناتىن قىزمەت تۇرلەرى 795-تەن 44-كە دەيىن قىسقارىپ, تاكسي سەكىلدى شاعىن كاسىپ يەلەرىنە جەڭىلدەتىلگەن تارتىپتە جۇمىسىن جالعاستىرۋعا جول اشىلدى. 2026 جىلدان باستاپ ەنگىزىلەتىن سەرۆيستىك مودەل مەن اۆتوماتتاندىرىلعان باقىلاۋ اكىمشىلىك قىسىمدى ازايتادى.
«جاڭا سالىق كودەكسى ەڭ الدىمەن بيزنەسكە قولايلى بولۋى ءتيىس. بۇل ەل ەكونوميكاسىنىڭ بولاشاعىنا وڭ اسەر ەتەدى», دەيدى «اتامەكەن» ۇكپ باسقارما توراعاسىنىڭ ورىنباسارى تيمۋر جاركەنوۆ.
ونىڭ ايتۋىنشا, پالاتا شاعىن جانە ورتا بيزنەس ءۇشىن تۇراقتى ءارى تۇسىنىكتى ورتا قالىپتاستىرۋ باعىتىنداعى جۇمىسىن جالعاستىرا بەرەدى.
قازىر كاسىپكەرلەر اراسىندا ەڭ ءجيى ايتىلىپ وتىرعان ماسەلە – جالپىعا بىردەي بەلگىلەنگەن رەجيم مەن ارنايى رەجيمدى قاتار قولدانعان كەزدە شەگەرىمدەرگە تىيىم سالىنۋى. كوپتەگەن كاسىپكەر بۇل نورمانىڭ سالدارىن ەندى تۇسىنە باستاعان.
«بۇل شاعىن بيزنەس ءۇشىن وتە ماڭىزدى سۇراق. ءبىز بارلىق ءوتىنىشتى جيناپ, سالانىڭ ەرەكشەلىكتەرىن ەسكەرىپ, ۇكىمەتكە كەزدەسۋ وتكىزۋ تۋرالى ۇسىنىس جولدادىق», دەدى جاركەنوۆ.
سونداي-اق فورۋمدا ءوزىن-ءوزى جۇمىسپەن قامتىعان تاكسي جۇرگىزۋشىلەرىنە قاتىستى جاڭا تالاپتار دا تالقىلاندى. جاڭا نورما بويىنشا, ارنايى سالىق رەجيمى مەن وڭايلاتىلعان دەكلاراتسيانى قاتار قولدانۋعا تىيىم سالىنادى. ماسەلەن, ارنايى رەجيمدە شاعىن دۇكەن ۇستايتىن كاسىپكەر كەشكىسىن تاكسي ايدايتىن بولسا, ەكى رەجيمدە قاتار بولا المايدى. ول نە تولىقتاي ءوزىن-ءوزى جۇمىسپەن قامتىعاندارعا ارنالعان رەجيمگە, نە وڭايلاتىلعان دەكلاراتسياعا ءوتۋى قاجەت.
«سەنات تالقىلاۋى كەزىندە ۇكىمەتتىڭ ۇستانىمى وزگەردى. سونىڭ سالدارىنان ساۋدامەن دە, تاكسيمەن دە اينالىساتىن ازاماتتار تولىق سالىق تولەۋگە ءماجبۇر بولادى. بۇل ياندەكس سياقتى پلاتفورمالاردىڭ مودەلىنە دە ىقپال ەتەدى», دەدى ساراپشى.
ونىڭ پىكىرىنشە, بۇل تالاپ جەكە تۇلعالار ءۇشىن تۇسىنىكسىز مەحانيزم قالىپتاستىرىپ, كولەڭكەلى ەكونوميكا قاۋپىن كۇشەيتۋى مۇمكىن.
تاكسي تاريفتەرىنىڭ كەلەسى جىلى قالاي وزگەرەتىنى دە ءسوز بولدى. ساراپشىلار باعا ەلدەگى ينفلياتسيا دەڭگەيىنە سايكەس وسەتىنىن, بىراق بىرنەشە ەسە كۇرت قىمباتتاۋ بولمايتىنىن ايتتى. تاكسوپاركتەر قاۋىمداستىعىنىڭ توراعاسى مەيرام ابەلكاسوۆ ءتاريفتىڭ نەگىزگى شىعىندار مەن نارىقتاعى سۇرانىس-ۇسىنىس زاڭىنا قاراي قالىپتاساتىنىن جەتكىزدى. ال ياندەكس تاكسي وكىلدەرى ناقتى اسەردى جاڭا نورمالار كۇشىنە ەنگەن سوڭ عانا باعالاۋعا بولاتىنىن اتاپ ءوتتى. ماۋسىمدىق فاكتور دا ماڭىزدى – جازدا جۇرگىزۋشىلەردىڭ ءبىر بولىگى باسقا سالاعا اۋىساتىندىقتان, ۇسىنىس ازايىپ, باعا وسەدى.
فورۋمدا ەكولوگيالىق كولىككە كوشۋ ءۇردىسى دە نازاردان تىس قالمادى. ياندەكس تاكسي ساراپشىسى الينا نيازوۆانىڭ ايتۋىنشا, ەلەكترلى كولىك جۇرگىزۋشىلەرى «ەلەكترو» تاريفىندە قازىردىڭ وزىندە «كومفورت+» ساناتىنداعى ارىپتەستەرىنە قاراعاندا جوعارى تابىس تاۋىپ جاتىر.
