سۋرەتتى تۇسىرگەن – جۇماباي مۇسابەك
اشىلۋ راسىمىندە ءسوز العان قالا باسشىسى ەرنات ءبازىل جاڭا ورتالىقتىڭ ءوڭىر تۇرعىندارى ءۇشىن ءمان-ماڭىزىن اتاپ ءوتتى.
– ادامنىڭ ەڭ قىمبات قازىناسى – دەنساۋلىق. سول سەبەپتى ساپالى مەديتسينالىق قىزمەت كورسەتۋ – باستى مىندەتىمىز. «Asmarmed» ورتالىعىنىڭ اشىلۋى – وسى باعىتتاعى ناقتى قادام. بۇل جوبا ارقىلى قالاعا 1,1 ملرد تەڭگە ينۆەستيتسيا تارتىلىپ, 150 جاڭا جۇمىس ورنى اشىلدى. مۇنداي باستاما تالدىقورعاننىڭ الەۋمەتتىك ينفراقۇرىلىمىن نىعايتىپ قانا قويماي, تۇرعىنداردىڭ ءومىر ساپاسىن جاقسارتۋعا ەلەۋلى ۇلەس قوسادى, – دەدى ە.ءبازىل.
ەم-دوم ورتالىعى مەديتسينالىق تەحنولوگيانىڭ سوڭعى جەتىستىكتەرىمەن جابدىقتالعان نىسان. مۇندا زەرتتەۋ كابينەتتەرى, كلينيكالىق زەرتحانالار, فيزيوتەراپيا, ەمدىك دەنە شىنىقتىرۋ بولىمدەرى ورنالاسقان. كەشەن ءۇش نەگىزگى بلوكتان تۇرادى, تاۋلىك بويى جۇمىس ىستەيتىن 40 توسەكتىك ورىندىق ستاتسيونار بار. مۇندا ناۋقاستارعا تاۋلىك بويعى, كۇندىزگى, جەدەل رەانيماتسيالىق كومەك كورسەتىلەدى. مامانداردىڭ ايتۋىنشا, ورتالىق كۇنىنە 100-گە دەيىن پاتسيەنت قابىلداۋعا قاۋقارلى. بۇل قالا مەن ماڭايداعى ەلدى مەكەن تۇرعىندارىنا ۇلكەن مۇمكىندىك.
جاڭا ورتالىقتىڭ اشىلۋىنا قالا تۇرعىندارى دا ەرەكشە ىقىلاس تانىتتى.
– مەديتسينالىق ورتالىقتىڭ اشىلۋى – ۇلكەن قۋانىش. بۇرىن اناليز تاپسىرۋ نەمەسە ەم الۋ ءۇشىن بىرنەشە جەرگە جۇگىرۋگە تۋرا كەلەتىن. ەندى ءبارى ءبىر ورىندا, سونداي-اق دارىگەرلەردىڭ ناۋقاستارمەن قارىم-قاتىناسى دا بارىنشا قالىپتى, قىزمەت كورسەتۋ مادەنيەتى وتە جوعارى, – دەيدى تالدىقورعاندىق زەينەتكەر راۋشان ابدىقادىروۆا.
جاس انا گۇلميرا ماحانوۆا دا وسىنداي ورتالىقتى كوپتەن بەرى كۇتىپ جۇرگەنىن ايتتى.
– بالامدى پروفيلاكتيكالىق تەكسەرىسكە اكەلدىم. قىزمەتكەرلەردىڭ كاسىبي دەڭگەيى, زاماناۋي جابدىقتار كوڭىل قۋانتادى. مۇنداي ورتالىقتاردىڭ كوپ بولعانى جاقسى. سونىڭ ارقاسىندا تۇرعىندار مەديتسينالىق كومەكتى جەدەل ءارى ساپالى الادى, – دەيدى ول.
قالا اكىمىنىڭ ءباسپاسوز قىزمەتىنىڭ مالىمەتىنشە, بۇگىندە تالدىقورعاندا 60-تان استام مەملەكەتتىك, جەكەمەنشىك مەديتسينالىق مەكەمە جۇمىس ىستەيدى. الايدا حالىق سانىنىڭ ءوسۋى مەن قىزمەت ساپاسىنا دەگەن سۇرانىستىڭ ارتۋى جاڭا مەديتسينالىق ورتالىقتاردىڭ قاجەتتىلىگىن ايقىنداپ وتىر. بۇل ورتالىق – وسىنداي سۇرانىستى وتەيتىن زاماناۋي كەشەن. مۇندا تاجىريبەلى ماماندار قىزمەت ەتەدى. ءسويتىپ, تۇرعىندارعا جوعارى دەڭگەيدەگى دياگنوستيكا, ەم, وڭالتۋ قىزمەتتەرىن ۇسىنۋ جوسپارلانىپ وتىر.
مەديتسينا سالاسىنىڭ ارداگەرى, دارىگەر سەرىكجان تولەۋحانوۆ ورتالىقتىڭ اشىلۋىن ءوڭىر مەديتسيناسىنداعى جاڭا كەزەڭ دەپ باعالادى.
– بۇگىنگى مەديتسينا تەك اۋرۋدى ەمدەۋ ەمەس, ونىڭ الدىن الۋ مەن حالىقتىڭ دەنساۋلىق مادەنيەتىن كوتەرۋگە باعىتتالۋعا ءتيىس. «Asmarmed» ورتالىعى وسى ماقساتقا ساي كەلەتىن مەكەمە. زاماناۋي جابدىقتار, كاسىبي كادرلار مەن قولايلى جاعداي – مۇنىڭ ءبارى تۇرعىندارعا كورسەتىلەتىن قىزمەت ساپاسىن ارتتىرادى, – دەيدى مامان.
جەتىسۋ وبلىسى بۇگىندە الەۋمەتتىك باعىتتاعى جوبالاردى دامىتۋعا باسىمدىق بەرىپ وتىر. دەنساۋلىق ساقتاۋ سالاسىنا ينۆەستيتسيا تارتۋ ارقىلى وڭىردە جاڭا مەديتسينالىق ينفراقۇرىلىم قالىپتاسىپ كەلەدى. تالدىقورعانداعى «Asmarmed» كوپسالالى ورتالىعى – وسى ساياساتتىڭ ءبىر كورىنىسى. بۇل نىسان تۇرعىندارعا قولجەتىمدى مەديتسينالىق كومەك كورسەتۋمەن قاتار, جاستارعا جۇمىس بەرىپ, قالانىڭ ەكونوميكالىق الەۋەتىن دە ارتتىرادى.
اتالعان ورتالىق – جەتىسۋ جۇرتىنىڭ دەنساۋلىعىن نىعايتۋ جولىنداعى ماڭىزدى قادام. زاماناۋي قۇرالدارمەن جابدىقتالعان, بىلىكتى ماماندار قىزمەت ەتەتىن مەكەمە تالدىقورعان مەديتسيناسىنىڭ جاڭا بەلەسىن تانىتىپ وتىر. حالىقتىڭ سەنىمى مەن قۋانىشى – ورتالىقتىڭ ەڭ ۇلكەن جەتىستىگى.
