بىرىككەن ۇلتتار ۇيىمىنىڭ مارتەبەسىن ارتتىرا تۇسەتىن بۇل سۋرەت – الەمدەگى ەرەكشە مۇرال. جىلدار بويى الەمنىڭ ءار تۇكپىرىندە اسا بەدەلدى حالىقارالىق ۇيىم تاقىرىبىنا ارنالعان ءىرى ونەر جوبالارى جۇزەگە اسقانىمەن, بۇل جۇمىس اسا بەدەلدى حالىقارالىق ۇيىم مانداتى مەن ورنىقتى دامۋ ماقساتتارىنىڭ مازمۇنىن قازاقتىڭ كوشپەلى مادەنيەتىمەن ۇشتاستىرىپ, كوز تارتاتىن استارلى مانىمەن دە ەرەكشەلەنەدى.
«Living Atmosphere» كومپانياسىنىڭ باستاماسىمەن ءادىل اۋباكىروۆ سالعان ۇزىندىعى – 36, بيىكتىگى 6 مەتر اۋقىمدى تۋىندىنىڭ ومىرگە كەلۋىنە «Shymbulak» كۋرورتى, بۇۇ-نىڭ قازاقستانداعى كەڭسەسى قولداۋ كورسەتىپتى.
مۇرالدىڭ سالتاناتتى اشىلۋ راسىمىندە بۇۇ جاھاندىق كوممۋنيكاتسيالار دەپارتامەنتىنىڭ وكىلى ۆلاستيميل سامەك بۇل قوعامنىڭ, جەرگىلىكتى ارىپتەستەردىڭ ۇيىتقى بولۋىمەن سالىنعانىن تىلگە تيەك ەتتى.
شىمبۇلاق بيىگىندەگى مۇرالدىڭ تۇساۋكەسەرىنە ديپلوماتيالىق كورپۋس پەن باق وكىلدەرى قاتىسىپ, تاۋلى ايماقتا تۋعان جوبانىڭ تۇجىرىمداماسىمەن, جاسالۋ تاريحى, تەحنيكالىق شەشىمدەرىمەن تانىستى.
«قۇراق كورپەمىزدە ءاربىر بولشەك ماڭىزدى, ءاربىر بولىك ورتاق ورنەكتىڭ ىشىندە ءوز ورنىن تابادى. مۇنىڭ استارى جانىمىزعا جاقىن – ءبىز دە دامۋىمىزدى ەكولوگيالىق جاۋاپكەرشىلىككە, ساباقتاستىق پەن تابيعاتقا دەگەن قۇرمەتكە سۇيەنە وتىرىپ قۇرامىز. بۇل جۇمىس «Shymbulak» كۋرورتىنىڭ رۋحىمەن ۇندەسەدى», دەيدى «Chimbulak Development» باسقارۋشى ديرەكتورى نۇرلان سەيىتقازين.
«مۇرال تۇجىرىمداماسى كوشپەلىلەردىڭ كورنەكى دە ماتەريالدىق ەمەس مۇراسىنا سۇيەنىپ, سيمۆولدار ءتىلىن زاماناۋي كوركەم فورماعا اينالدىرادى. ءاربىر بولشەك ءوز ماعىناسىن ساقتايدى. ولاردى بىرىكتىرە وتىرىپ, ءبىزدى قاۋىم ەتەتىن قۇندىلىقتار تۋرالى سىر شەرتىپ, تابيعاتقا, كورشىلەرىمىزگە, بەيبىتشىلىككە دەگەن قۇرمەتىمدى بىلدىرەمىن. بۇل مۇرال – بۇۇ 80 جىل بويى قورعايتىن قۇندىلىق قۇراعى عانا ەمەس, بولاشاققا باعىتتالعان كوشپەلىلەردىڭ كوزقاراسى», دەيدى سۋرەتشى ءادىل اۋباكىروۆ.
الماتى
