پەتروپاۆل. 24 ماۋسىم. قالالىق كامەلەتكە تولماعاندار ءىسى جانە ولاردىڭ قۇقىقتارىن قورعاۋ كوميسسياسىنىڭ وتىرىسىندا بالا تاربيەسىنەن جالتارعان 6 اكە-شەشەنى قۇقىقتارىنان ايىرۋ جونىندە شەشىم الىندى. بۇل تۋرالى قالالىق ءىىب-ءنىڭ قىزمەتكەرلەرى حابارلادى.
يۋۆەنالدى پوليتسيانىڭ ۋچاسكەلىك ينسپەكتورلارى 2015 جىلدان بەرى وزدەرىنىڭ بالا تاربيەلەۋ مىندەتتەرىنە سالعىرت قاراعان 162 اكە-شەشەنى ارنايى ەسەپكە العان. بيىل مەكتەپكە بارۋدان باس تارتقان, جامان ادەتتەرگە ءۇيىر 194 وقۋشىنى انىقتاعان. 82 اتا-اناعا 14 مىڭ تەڭگەگە دەيىن ايىپپۇل سالىنعان.
«جازعى كانيكۋل ۋاقىتتارىندا جاسوسپىرىمدەر اراسىندا ءتۇرلى تارتىپسىزدىك قىلىقتاردى بولدىرماۋ, الدىن الۋ جۇمىستارىن كۇشەيتۋ وتە ماڭىزدى. ولاردىڭ قۇقىقتارى دا زاڭ نورمالارى شەڭبەرىندە قورعالۋى ءتيىس. ساۋىقتىرۋ لاگەرلەرىنە تۇرمىسى از قامتىلعان وتباسىلاردان 500-گە جۋىق بالالار جىبەرىلدى», دەدى كوميسسيا وتىرىسىندا ءسوز العان قالالىق ءىىب-ءنىڭ باسشىسى قايرات ورازالين.
بۇل جولى كۇن تارتىبىنە 8 ماسەلە ۇسىنىلسا, ولاردىڭ التاۋى بالا تاربيەسىمەن اينالىسۋدان قاشقاقتاعان اتا-انالارعا قاتىستى بولىپ شىقتى. كوميسسيا مۇشەلەرى ولاردى اتا-انالىق قۇقىقتارىنان ايىرۋ تۋرالى ۇسىنىستى ءبىراۋىزدان قولداپ, ىستەردى سوتقا جىبەرۋگە شەشىم الدى.
جىل باسىنان بەرى 10 اتا-اناعا وسىنداي شارا كورىلىپتى. ولاردىڭ ءبارى ىشىمدىككە اۋەس.
ءومىر ەسقالي.
دەرەك, سۋرەت: پەتروپاۆل قالاسىنىڭ ىشكى ىستەر ءبولىمى.
