سۋرەتتى تۇسىرگەن – اۆتور
سامار اۋدانىنىڭ اكىمى سەرىك جەڭىس ۇلى وتكىزگەن ءباسپاسوز ءماسليحاتىندا تىلشىلەر كەلەر جىلى «ودەسسا» پارومىنىڭ قاتىناپ-قاتىناماۋى تۋرالى سۇراق قويدى. بىلۋىمىزشە, بىرنەشە جىلدان بەرى كولىك تاسىمالىمەن اينالىسىپ كەلە جاتقان پاروم يەسى كاسىبىنىڭ تيىمسىزدىگىن العا تارتىپ, كەلەر جىلى سۋ كولىگىن توقتاتۋعا بەل بۋعان. ول توقتاسا, تۋريزم سالاسى توقىرايدى. ولاي دەيتىنىمىز, پاروم ءمىنىپ, سۋدان ءوتۋ ءۇشىن سوناۋ اقتاۋ, اتىراۋدان اعىلىپ جاتقان ساياحاتشىلار بار. سوندىقتان دا سامار اۋدانىنىڭ باسشىسى كاسىپكەردى قولداۋ ماقساتىندا سۋبسيديا ماسەلەسى قاراستىرىلىپ جاتقانىن ايتتى. بيىلدىڭ وزىندە سارىبەل جاعالاۋىنا شامامەن 50 مىڭ تۋريست كەلىپ, تابيعاتىن تاماشالاعان. قازىردە جاعاجاي اۋماقتارىن اباتتاندىرۋ, ينفراقۇرىلىمدى دامىتۋ, جاڭا دەمالىس نىساندارىن سالۋ جۇمىستارى جۇرگىزىلىپ جاتىر.
– سامار اۋدانىنىڭ «تۋريزم جانە ينۆەستيتسيالار ورتالىعى» كمم قۇرىلىپ, سارىبەل اۋىلىندا زاماناۋي قوناقۇي سالۋ جونىندە حالىقارالىق «Pana Asia» كومپانياسىمەن مەموراندۋمعا قول قويىلدى. سونداي-اق بۇقتىرما سۋقويماسىنىڭ جاعاسىندا سەرۋەن ايماعىن سالۋ جوباسى دايىندالىپ جاتىر, – دەيدى اۋدان اكىمى س.جەڭىس ۇلى.
سامار جەكە اۋدان بولىپ قۇرىلعالى تۋريزمنەن بولەك, الەۋمەتتىك سالادا دا سەرپىلىس بايقالادى. اۋدان ورتالىعىنداعى كوپقاباتتى تۇرعىن ۇيلەر جوندەلىپ, جاس ماماندارعا, قات ماماندارعا ۇلەستىرىلىپ جاتىر. جاس مامان دەمەكشى, اۋدانعا بيىل 20 جاس مۇعالىم كەلدى. دەمەك كادر تاپشىلىعى دا بىرتە-بىرتە جويىلىپ كەلەدى. ولارعا ەڭ قاجەتتىسى – باسپانا. سامار اۋىلى ورتالىقتاندىرىلعان جىلۋ جۇيەسىنە كوشۋى دە ابدەن مۇمكىن. اۋدان باسشىلىعىنىڭ ايتۋىنشا, كەلەر جىلى جىلۋ قازاندىعىنىڭ قۇرىلىسى باستالادى.
اۋداندا حالىقتى قولداۋ, جاڭا جۇمىس ورىندارىن اشۋ جۇمىستارى كۇن تارتىبىنەن تۇسپەيدى. كەيىنگى 9 ايدا 298 ادام جۇمىسپەن قامتىلسا, 12 تۇرعىن ءوز كاسىبىن اشۋعا 18,9 ملن تەڭگە كولەمىندە گرانت الدى. 61 وتباسى اتاۋلى الەۋمەتتىك كومەك الىپ وتىر.
ساماردا سەرپىلىس بار. ءوندىرىس كولەمى 1,4 ملرد تەڭگەنى قۇراسا, قۇرىلىس جۇمىسىنىڭ كولەمى 5,4 ملرد تەڭگەگە دەيىن ۇلعايعان. تارتىلىپ جاتقان ينۆەستيتسيا دا ارتقان.
– جۇمىس جان-جاقتى جۇرگىزىلىپ جاتىر. اۋداننىڭ تۋريستىك الەۋەتى قانداي بولسا, اۋىل شارۋاشىلىعى سالاسى دا سونداي قارقىنمەن دامىپ كەلەدى. اۋداندا سۋارمالى جەرلەردى ۇلعايتۋ ماقساتىندا جۇيەلى جۇمىس ىسكە استى. بيىل 500 گا جەر اينالىمعا ەنگىزىلسە, الداعى ۋاقىتتا تاعى 582 گەكتاردى ىسكە قوسۋ جوسپارلانىپ وتىر. اۋىل شارۋاشىلىعى تاۋار وندىرۋشىلەرىنە 347,5 ملن تەڭگە سۋبسيديا, 572 ملن تەڭگە كولەمىندە نەسيە بەرىلدى, – دەيدى اۋدان اكىمى.
ءباسپاسوز ءماسليحاتىندا اكىم اۋداننىڭ ەرتەڭگى جوسپارىنا دا توقتالىپ ءوتتى. ايتۋىنشا, قۇممەن كومكەرىلىپ جاتقان جاعالاۋعا تەڭدەسى جوق اربات سالىنادى. ءتىپتى اۋەجايعا دەپ تە ورىن بەلگىلەنىپ جاتىر. كارىز جۇيەسىن جاڭارتۋ, جول جوندەۋ سەكىلدى جۇمىس كۇندەلىكتى, قالىپتى جۇرگىزىلە بەرەدى.
شىعىس قازاقستان وبلىسى,
سامار اۋدانى
