AEA-Europe – باعالاۋ اگەنتتىكتەرىن, مينيسترلىكتەردى, ۋنيۆەرسيتەتتەر مەن عىلىمي-زەرتتەۋ ينستيتۋتتارىن بىرىكتىرەتىن حالىقارالىق كاسىبي قاۋىمداستىق. بيىلعى كونفەرەنتسيا «باعالاۋدىڭ دامۋى جانە ونىڭ ءبىلىم بەرۋگە ىقپالى» تاقىرىبىنا ارنالعان. ءىس-شاراعا 43 ەلدەن 400-دەن استام جەتەكشى ساراپشىلار مەن عالىمدار قاتىستى.
كونفەرەنتسيا بارىسىندا ديرەكتور قازاقستانداعى ءبىلىم بەرۋ سالاسىنداعى باعالاۋ جۇيەسىنىڭ دامۋى, ۇلتتىق تەستىلەۋ ورتالىعىنىڭ قىزمەتى مەن پسيحومەتريكا باعىتىنداعى عىلىمي زەرتتەۋلەردىڭ جەتىستىكتەرى تۋرالى بايانداما جاسادى. سونداي-اق, قاتىسۋشىلارعا ۇلتتىق بىرىڭعاي تەستىلەۋ (ۇبت) تاپسىرمالارىنىڭ سەنىمدىلىگى مەن ۆاليدتىلىگىن ارتتىرۋعا باعىتتالعان عىلىمي تاسىلدەر تانىستىرىلدى.
باياندامانىڭ ماڭىزدى بولىگى Educational Testing Service (ETS) كومپانياسىمەن جۇزەگە اسىرىلىپ جاتقان حالىقارالىق ارىپتەستىككە ارنالدى. جۋىردا قر عىلىم جانە جوعارى ءبىلىم ءمينيسترى ساياسات نۇربەك پەن ETS كومپانياسى ءوزارا تۇسىنىستىك تۋرالى مەموراندۋمعا قول قويعان بولاتىن. قۇجات اياسىندا الداعى ءۇش جىلدا ۇبت تەستىلەرىن جەتىلدىرۋ جانە حالىقارالىق ستاندارتتارعا سايكەستەندىرۋ باعىتىندا بىرلەسكەن جۇمىستار جۇرگىزىلەدى. كونفەرەنتسيا قاتىسۋشىلارى بۇل باستامانى جوعارى باعالاپ, قازاقستاندىق تاجىريبەگە ايرىقشا قىزىعۋشىلىق تانىتتى.
Cito, AQA جانە باسقا دا جەتەكشى باعالاۋ ۇيىمدارىنىڭ باسشىلارىمەن عىلىمي ىنتىماقتاستىق جانە بىرلەسكەن زەرتتەۋلەر جۇرگىزۋ ماسەلەلەرى تالقىلاندى. سونىمەن قاتار, AEA-Europe پرەزيدەنتى, پروفەسسور دەميان ميورچانمەن مازمۇندى كەزدەسۋ ءوتتى. كەزدەسۋدە ETS-پەن بىرلەسكەن جوبانىڭ ناتيجەلەرىن الداعى كونفەرەنتسيالاردىڭ بىرىندە جەكە سيمپوزيۋم تۇرىندە ۇسىنۋ مۇمكىندىگى قاراستىرىلدى.
ءىس-شارا سوڭىندا ۇتو ديرەكتورى ب. ابدراسيلوۆ حالىقارالىق ارەنادا ۇبت-نىڭ جاڭا فورماتتاعى تەستىلەۋ جۇيەسىن زەرتتەۋدىڭ عىلىمي ناتيجەلەرىن بەلسەندى تۇردە ىلگەرىلەتۋ ۇبت-نى حالىقارالىق تانۋ ءۇشىن دە, ونىڭ زاماناۋي جانە تەحنولوگيالىق باعالاۋ قۇرالى رەتىندە قالىپتاسۋىنا دا ىقپال ەتەتىنىن اتاپ ءوتتى.
