بىرىككەن ۇلتتار ۇيىمىنىڭ مارتەبەسىن ارتتىرا تۇسەتىن بۇل تۋىندى –الەمدەگى ەڭ بيىك جەرگە سالىنعان مۋرال. جىلدار بويى الەمنىڭ ءار تۇكپىرىندە بۇۇ تاقىرىبىنا ارنالعان ءىرى ونەر جوبالارى جۇزەگە اسقانىمەن, بۇل جۇمىس بۇۇ مانداتى مەن ورنىقتى دامۋ ماقساتتارىنىڭ ءمانىن قازاقتىڭ كوشپەلى مادەني نىشانى ارقىلى ءدال بەينەلەيتىن قۋاتتى ۆيزۋالدى مەتافوراسىمەن ەرەكشەلەنەدى.
Living Atmosphere مۇرىندىق بولعان سۋرەتشى ءادىل اۋبەكەروۆتىڭ ۇزىندىعى 36, بيىتىگى 6 مەتر بولاتىن اۋقىمدى جۇمىسىنىڭ پايدا بولۋىنا Shymbulak كۋرورتى, بۇۇ-نىڭ قازاقستانداعى كەڭسەسى قولداۋ كورسەتكەن.
قۇزار بيىكتىكتەگى مۋرالدىڭ سالتاناتتى اشىلۋ راسىمىندە بۇۇ جاھاندىق كوممۋنيكاتسيالار دەپارتامەنتىنىڭ وكىلى ۆلاستيميل سامەك مۋرالدىڭ بۇۇ تاپسىرىسىمەن ەمەس, قوعامنىڭ, جەرگىلىكتى ارىپتەستەردىڭ باستاماسىمەن سالىنعانىن تىلگە تيەك ەتتى.
شىمبۇلاق بيىگىندەگى مۋرالدىڭ تۇساۋكەسەرىنە قوعامدىق ۇيىمدار, مادەنيەت پەن ديپلوماتيالىق كورپۋستىڭ جانە باق وكىلدەرى قاتىستى. قوناقتار تاۋلى ايماقتا تۋعان جوبا تۇجىرىمداماسىمەن, جاسالۋ تاريحىمەن, تەحنيكالىق شەشىمدەرىمەن تانىستى.
«قۇراق كورپەمىزدە ءاربىر بولشەك ماڭىزدى, ءاربىر بولىك ورتاق ورنەكتىڭ ىشىندە ءوز ورنىن تابادى. مۇنىڭ استارى بىزگە جاقىن – ءبىز دە دامۋىمىزدى ەكولوگيالىق جاۋاپكەرشىلىككە, ساباقتاستىق پەن تابيعاتقا دەگەن قۇرمەتكە سۇيەنە وتىرىپ قۇرامىز. بۇل جۇمىس Shymbulak كۋرورتىنىڭ رۋحىمەن ۇندەسەدى», – دەيدى Chimbulak Development باسقارۋشى ديرەكتورى نۇرلان سەيىتقازين.
«مۋرال تۇجىرىمداماسى كوشپەلىلەردىڭ كورنەكى دە ماتەريالدىق ەمەس مۇراسىنا سۇيەنىپ, سيمۆولدار ءتىلىن زاماناۋي كوركەم فورماعا اينالدىرادى. ءاربىر بولشەك ءوز ماعىناسىن ساقتايدى. ولاردى بىرىكتىرە وتىرىپ, مەن ءبىزدى قاۋىم ەتەتىن قۇندىلىقتار تۋرالى سىر شەرتىپ, تابيعاتقا, كورشىلەرىمىزگە, بەيبىتشىلىككە دەگەن قۇرمەتىمدى بىلدىرەمىن. مەن ءۇشىن بۇل مۋرال – بۇۇ 80 جىل بويى قورعايتىن قۇندىلىقتاردىڭ موزايكاسى عانا ەمەس, بولاشاققا باعىتتالعان كوشپەندىلەر كوزقاراسى», – دەيدى سۋرەتشى ءادىل اۋبەكەروۆ.
الماتى
