قازاقستان رەسپۋبليكاسىنىڭ سينگاپۋر رەسپۋبليكاسىنداعى ەلشىلىگىنىڭ, BI Group Holding-ءتىڭ ينۆەستيتسيالىق پلاتفورماسى BIG Invest جانە OD Consulting كومپانياسىنىڭ قولداۋىمەن ۇيىمداستىرىلعان ءىس-شاراعا 150-دەن استام قاتىسۋشى قاتىستى. ءىس-شارا قوناقتارىنىڭ اراسىندا ينۆەستيتسيالىق كومپانيالاردىڭ, بانكتەردىڭ, اكتيۆتەردى باسقارۋشىلاردىڭ, فينتەح-كومپانيالاردىڭ, ساقتاندىرۋ ۇيىمدارىنىڭ جانە باسقا دا قارجى ينستيتۋتتارىنىڭ باسشىلىق قۇرامى بولدى.
AIFC Connect الاڭىندا ەكى ەلدىڭ سالالىق ساراپشىلارىنىڭ قاتىسۋىمەن پەرسپەكتيۆتى ينۆەستيتسيالىق باعىتتار, قارجى ورتالىعىنىڭ ايماقتاعى ءرولى, سونداي-اق اكتيۆتەردى باسقارۋ نارىقتارىن, كاپيتال نارىقتارىن, ۆەنچۋرلىق ينۆەستيتسيالاردى, فينتەحتى جانە يننوۆاتسيالاردى دامىتۋ تۋرالى بىرقاتار پىكىرتالاس ۇيىمداستىرىلدى.
ءىس-شارانى قازاقستان رەسپۋبليكاسىنىڭ سينگاپۋر رەسپۋبليكاسىنداعى, اۆستراليا وداعىنداعى جانە جاڭا زەلاندياداعى توتەنشە جانە وكىلەتتى ەلشىسى اسقار قۇتتىقادام ءىلتيپات سوزىمەن اشتى.
«گەوگرافيالىق قاشىقتىققا, تاريحي جانە گەوساياسي كونتەكستەگى ايىرماشىلىقتارعا قاراماستان, ءبىزدىڭ ەلدەرىمىزدىڭ ۇمتىلىستارى, سىن-تەگەۋىرىندەرى مەن مۇمكىندىكتەرى ورتاق. 2023 جانە 2024 جىلدارى مەملەكەت باسشىلارى دەڭگەيىندە تابىستى ءوزارا ساپارلار ءوتتى, بۇل ساپارلار الەمدىك احۋال بارعان سايىن تۋربۋلەنتتى بولا تۇسكەن جاعدايدا ءبىزدىڭ جان-جاقتى سەرىكتەستىگىمىزگە قۋاتتى سەرپىن بەردى. دەگەنمەن, ءبىز بار الەۋەتتى تولىق پايدالانۋ ءۇشىن كۇش-جىگەرىمىزدى ەكى ەسە ارتتىرىپ, ءوزارا ساۋدا-ينۆەستيتسيالىق بايلانىستاردى كۇشەيتۋىمىز كەرەك. سوندىقتان «AIFC Connect: Singapore 2025» ءىس-شاراسى سينگاپۋرلىق جانە حالىقارالىق كاسىپكەرلەردىڭ قازاقستانداعى ينۆەستيتسيالىق احۋال مەن ىسكەرلىك مۇمكىندىكتەر تۋرالى حاباردارلىعىن ارتتىرۋعا باعىتتالعان».
ودان ءارى احقو-نىڭ قازاقستان مەن سينگاپۋر اراسىنداعى ىنتىماقتاستىقتى دامىتۋداعى مۇمكىندىكتەرى تۋرالى ءوز باياندامالارىندا احقو اكىمشىلىگىنىڭ باسقارما توراعاسى باقتيار تىلەۋبەكوۆ, Astana Financial Services Authority (AFSA) باس ديرەكتورى ەۆگەنيا بوگدانوۆا, احقو اكىمشىلىگىنىڭ كليەنتتەرمەن جۇمىس جونىندەگى باس ديرەكتورى باۋىرجان كانكين, احقو اكىمشىلىگىنىڭ يننوۆاتسيالار جونىندەگى باس ديرەكتورى تالعات امانباەۆ ايتىپ بەردى.
احقو اكىمشىلىگىنىڭ باسقارما توراعاسى باقتيار تىلەۋبەكوۆ قارجى ورتالىعىنىڭ قىزمەتىنە شولۋ جاساپ, ونىڭ قازاقستانداعى شەتەلدىك كومپانيالار ءۇشىن مۇمكىندىكتەردى كەڭەيتۋدەگى ارتىقشىلىقتارى تۋرالى بايانداپ بەردى: «سوڭعى جىلدارى قازاقستان مەن سينگاپۋر اراسىنداعى قارىم-قاتىناستار نىعايىپ, ساۋدا, تۋريزم سالاسىنداعى ىنتىماقتاستىق, سونداي-اق ساياسي ديالوگ پەن مادەني-گۋمانيتارلىق بايلانىستار كەڭەيدى. 2023 جىلى ەلدەرىمىزدىڭ پرەزيدەنتتەرى بىرنەشە كەلىسىمگە, سونىڭ ىشىندە سينگاپۋرلىق كومپانيالاردى احقو الاڭىندا تىركەۋ, قازاقستان اۋماعىنداعى جوبالارعا ينۆەستيتسيالار سالۋ سالاسىنداعى سەرىكتەستىكتى دامىتۋ ماسەلەلەرى بويىنشا كەلىسىمگە قول قويدى. بۇگىن احقو-دا سينگاپۋردان 48 كومپانيا تىركەلگەن. ورتالىق كومپانيالارعا اعىلشىن جالپى قۇقىق قاعيداتتارىنا نەگىزدەلگەن قۇقىقتىق رەجيم, الەمدىك دەڭگەيدەگى رەتتەۋ سياقتى بىرەگەي ارتىقشىلىقتار ۇسىنادى. ورتالىق فينتەح پەن يننوۆاتسيالار, جاسىل جانە يسلامدىق قارجىلاندىرۋ, كرەاتيۆتى يندۋستريالار, اۆياتسيالىق حاب جانە باسقا دا پەرسپەكتيۆالى سەكتورلار باعىتتارىن بەلسەندى دامىتۋدا. ءبىز سونداي-اق ترانسۇلتتىق جوبالاردى ىسكە اسىرۋ ءۇشىن قاجەتتى ينفراقۇرىلىمدى قۇرا وتىرىپ, قازاقستاننىڭ ءوڭىردىڭ نەگىزگى قارجىلىق ءارى ينۆەستيتسيالىق تورابى رەتىندەگى ءرولىن نىعايتۋدامىز».
بۇگىندە احقو يۋريسديكتسياسىندا سينگاپۋر كاپيتالىنىڭ قاتىسۋىمەن 48 كومپانيا ءوز بيزنەسىن بەلسەندى دامىتۋدا. ولار قارجىلىق قىزمەتتەر مەن ساقتاندىرۋ, اقپاراتتىق-كوممۋنيكاتسيالىق تەحنولوگيالار, كوتەرمە جانە بولشەك ساۋدا, تاۋ-كەن ءوندىرۋ ونەركاسىبى, كاسىپتىك, عىلىمي جانە تەحنيكالىق قىزمەت, وڭدەۋ ونەركاسىبى, قۇرىلىس جانە ت.ب. سياقتى سالالاردا قىزمەت جۇرگىزۋدە. كومپانيالار قاتارىندا: Bitmain Kazakhstan Limited, Kazakhstan Zhonghengyongsheng Energy Co. Ltd., RenEll Co. Ltd, Atlas Technology KA Ltd, AURORA QUEST SERVICES LTD جانە باسقالار بار.
ءىس-شارا باعدارلاماسىن AFSA باس ديرەكتورى ەۆگەنيا بوگدانوۆا جالعاستىردى, ول رەتتەۋشىنىڭ قىزمەتىن تانىستىردى جانە احقو يۋريسديكتسياسىنداعى قارجىلىق جانە قارجىلىق ەمەس قىزمەتتەردى رەتتەۋدەگى جاڭا ۇردىستەر تۋرالى ايتتى. ول ءوز سوزىندە تسيفرلىق اكتيۆتەر نارىعىنىڭ سەرپىندى دامۋىنا جانە احقو-نىڭ وسى سالاداعى حالىقارالىق تانىلۋىنا ەرەكشە نازار اۋداردى: «احقو قارجىلىق قىزمەتتەردى رەتتەۋ كوميتەتى احقو ەكوجۇيەسىنىڭ تۇراقتى جانە اشىق دامۋىن قامتاماسىز ەتۋدە شەشۋشى ءرول اتقارادى. ءبىزدىڭ ءتاسىلىمىز قارجى نارىعىنىڭ ءوسۋى مەن وزىق تەحنولوگيالاردى ەنگىزۋ ءۇشىن سەنىمدى نەگىز قۇرا وتىرىپ, يننوۆاتسيالار مەن جوعارى حالىقارالىق رەتتەۋ ستاندارتتارىنا سۇيەنەدى.
بۇگىنگى تاڭدا احقو يۋريسديكتسياسىندا 27 ليتسەنزيالانعان تسيفرلىق اكتيۆتەر قىزمەتتەرىنىڭ پروۆايدەرى, رەتتەۋشى «قۇم الاڭىنىڭ» 19 قاتىسۋشىسى جانە تولىق رەتتەۋ رەجيمىندە جۇمىس ىستەيتىن 3 تسيفرلىق اكتيۆتەر بيرجاسى بار. 2025 جىلدىڭ العاشقى ءۇش توقسانىندا احقو-دا ليتسەنزيالانعان تسيفرلىق اكتيۆتەر بيرجالارىندا ساۋدا-ساتتىق كولەمى 5,4 ملرد اقش دوللارىنان استى.
IOSCO تاقىرىپتىق شولۋىنىڭ قورىتىندىسى بويىنشا احقو-نىڭ تسيفرلىق اكتيۆتەردى رەتتەۋ سالاسىندا IOSCO ۇسىنىمدارىن ءساتتى ەنگىزەتىن الەمنىڭ جەتەكشى ءتورت يۋريسديكتسياسىنىڭ قاتارىنا كىرگەنىن ماقتان تۇتامىز. بۇل مويىنداۋ ءبىزدىڭ ينۆەستورلاردى قورعاۋ, نارىقتىڭ اشىقتىعى جانە يننوۆاتسيالاردى دامىتۋ قاعيداتتارىنا دەگەن بەيىلدىگىمىزدى راستايدى.
الداعى ۋاقىتتا ءبىز احقو-نىڭ تسيفرلىق قارجى سالاسىنداعى وڭىرلىك حاب رەتىندەگى ءرولىن نىعايتا وتىرىپ, توكەنيزاتسيالانعان اكتيۆتەر مەن ستەيبلكويندەردى شىعارۋ جانە اينالىسقا ەنگىزۋ ءۇشىن ينفراقۇرىلىمدى دامىتۋدى جوسپارلاپ وتىرمىز».
ءىس-شارانىڭ ىسكەرلىك باعدارلاماسىن Kazakh Invest-ءتىڭ سينگاپۋرداعى شەتەلدىك وكىلى ديانا ابلياكيموۆا جالعاستىردى, ول ەلدەر اراسىنداعى ەكىجاقتى قارىم-قاتىناستاردىڭ پەرسپەكتيۆالارى جانە ەلىمىزدىڭ سينگاپۋرلىق كومپانيالار ءۇشىن ينۆەستيتسيالىق الەۋەتى تۋرالى ايتتى.
سونداي-اق احقو اكىمشىلىگىنىڭ كليەنتتەرمەن جۇمىس جونىندەگى باس ديرەكتورى باۋىرجان كانكيننىڭ جۇرگىزۋىمەن Fireside chat فورماتىندا ديسكۋسسيا ءوتتى. Quest Ventures باسقارۋشى سەرىكتەسى دجەيمس تان سپيكەر بولدى. ساراپشىلار احقو-نىڭ ازيا-تىنىق مۇحيتى ايماعىنداعى قارجىلىق قىزمەتتەردى دامىتۋداعى ءرولى مەن ىقپالىن تالقىلادى. ديالوگتى BI Group South كومپانياسىنىڭ قارجى ديرەكتورى اناستاسيا كيم جالعاستىردى, ول ناقتى اكتيۆتەر سەكتورىنداعى بىرەگەي ينۆەستيتسيالىق مۇمكىندىكتەرمەن تانىستىردى.
تاعى ءبىر ديسكۋسسيا قارجىلىق تەحنولوگيالار سالاسىنداعى يننوۆاتسيالار مەن جاڭا قۇرالداردى زەردەلەۋگە ارنالدى. سپيكەرلەر سينگاپۋر فينتەح قاۋىمداستىعىنىڭ (SFA) پرەزيدەنتى حوللي فانگ, BigONE Exchangە باس كوممەرتسيالىق ديرەكتورى افينا مياو, Binance VIP كليەنتتەرىمەن جانە ينستيتۋتسيونالدىق ينۆەستورلارمەن جۇمىس جونىندەگى باسشىسى ميراندا برەتت بولدى.
فينتەح-يندۋستريا تۋرالى ديالوگتى احقو اكىمشىلىگىنىڭ يننوۆاتسيالار جونىندەگى باس ديرەكتورى تالعات امانباەۆ جالعاستىردى. ول بلوكچەين تەحنولوگياسىن پايدالانا وتىرىپ, استىقتى توكەنيزاتسيالاۋ, كورپوراتيۆتىك بەدەلدى سكورينگ جۇيەسىن جانە دەرەكتەر الماسۋ پلاتفورماسىن ازىرلەۋ, ۆەنچۋرلىك ستۋديالار ءۇشىن احقو-داعى مۇمكىندىكتەر سياقتى ورتالىقتا جاڭا فينتەح-ونىمدەرىنىڭ دامۋ بارىسى تۋرالى ايتتى.
ء«بىز ناقتى اكتيۆتەر توكەنيزاتسياسى قازىر نەگىزگى ترەند دەپ ەسەپتەيمىز. بۇگىندە ءبىز ارىپتەستەرىمىزبەن بىرگە استىقتى توكەنيزاتسيالاۋ جوباسىمەن جۇمىس ىستەپ جاتىرمىز. رەسپۋبليكادا جىل سايىن شامامەن 26,5 ملن توننا ءداندى جانە بۇرشاقتى داقىلدار جينالادى, بۇل سەكتوردى اسا ماڭىزدى ەتەدى. ال ەلدە استىق جانە قويما قولحاتتارىمەن وپەراتسيالارعا قىزمەت كورسەتەتىن 232 ليتسەنزيالانعان ەلەۆاتور تىركەلگەن, بۇل استىق ساقتاۋدىڭ دامىعان ينفراقۇرىلىمىن كورسەتەدى».
سونداي-اق فينتەح-يننوۆاتسيالاردى دامىتۋداعى جاڭا قۇرالدار تۋرالى ءوز پىكىرىمەن Phillip Capital فينتەح-ديرەكتورى سە حۋان كيات, CEO Investbanq ولجاس جيەنقۇل, GWM Capital Ltd كومپانياسىنىڭ CEO جانە OD Consulting Ltd باسقارۋشى ديرەكتورى ارمان باتاەۆ ءبولىستى.
GFCI 38 رەيتينگىنە سايكەس احقو شىعىس ەۋروپا مەن ورتالىق ازيا وڭىرىندە كوشباسشى ورىنعا يە ەكەنىن جانە قازاقستاننىڭ بيزنەسى مەن ەكونوميكاسىنا ارنايى جاسالعان جاعدايلاردىڭ ارقاسىندا كاپيتال تارتۋعا كومەكتەسەتىنىن ايتا كەتۋ كەرەك. 2018 جىلدان باستاپ احقو الاڭى ارقىلى قازاقستان ەكونوميكاسىنا 18,5 ملرد اقش دوللارى ينۆەستيتسيا تارتىلدى. احقو-دا اقش, ۇلىبريتانيا, قىتاي, تۇركيا, سينگاپۋر جانە باسقا دا ەلدەردى قوسا العاندا, الەمنىڭ 88 ەلىنەن 4600-دەن اسا كومپانيا تىركەلگەن. –
