وبلىستىق پوليتسيا دەپارتامەنتىنىڭ مالىمەتىنشە, بۇگىندە اۋىلدا 47 ءۇي, 272 ادام بار. شاعىن عانا ەلدى مەكەن بولعانىمەن, ءار ءۇيدىڭ ەسىگى ايقارا اشىق, ادامداردىڭ اراسى جاقىن, ءبىرىنىڭ قۋانىشى – بارىنە ورتاق. مۇندا ءبىر مەكتەپ, مەديتسينالىق پۋنكت جانە كۇندەلىكتى تۇرمىسقا قاجەتتى تاۋارلاردى ۇسىناتىن جالعىز دۇكەن جۇمىس ىستەيدى.
ماحامبەت اۋداندىق پوليتسيا ءبولىمى قوعامدىق قاۋىپسىزدىك بولىمشەسى باستىعىنىڭ مىندەتىن اتقارۋشى, پوليتسيا مايورى ايدوس سەيتقازيەۆتىڭ ايتۋىنشا, اۋىلداعى تىنىشتىق پەن ءتارتىپ – ادامداردىڭ ءوزارا تۇسىنىستىگىنىڭ ناتيجەسى.
«بيىل اۋىل تۇرعىندارى ءوزارا كەلىسە وتىرىپ, ىشىمدىك ساتۋعا دا, ىشۋگە دە مۇلدە تىيىم سالۋدى ۇيعاردى. قازىر اۋىلعا كەلسەڭىز, تىنىشتىق پەن تاتۋلىق ورناعان. ادامداردىڭ وي-ساناسى وزگەرىپ كەلەدى – ىشىمدىكسىز ءومىردىڭ ءسانى مەن ءمانى بار ەكەنىن ءتۇسىندى», – دەدى پوليتسيا مايورى.
قازىر اتىراۋ وبلىسىندا 50-دەن استام ەلدى مەكەن ىشىمدىكتەن باس تارتقان. مۇنداي اۋىلداردا قوعامدىق ءتارتىپتىڭ دەڭگەيى جوعارى, تۇرعىندار اراسىنداعى سىيلاستىق تا بەرىك. ەڭبەكشىل اۋىلىنىڭ ءومىر سالتى – قاراپايىمدىلىق پەن تازالىقتىڭ جارقىن ۇلگىسى. وسىنداي ونەگەلى اۋىلدار كوبەيسە, ەلىمىزدىڭ بولاشاعى دا جارقىن بولارى ءسوزسىز.
