جيىنعا قاتىسۋشىلارعا ماڭىزدى باس قوسۋدىڭ ماقساتى تۋرالى تانىستىرعان مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام الي ۆەدومەستۆا باسشىسى ايدا بالاەۆانىڭ قۇتتىقتاۋ حاتىن وقىدى.
«سىزدەر ەلىمىزدىڭ تاريحي-مادەني مۇراسى مەن باعا جەتپەس جادىگەرلەرىن ساقتاۋ, ولاردى عىلىمي اينالىمعا ەنگىزۋ, كەلەشەك ۇرپاققا جەتكىزۋ جولىندا قاجىرلى قىزمەت ەتىپ كەلەسىزدەر. ەلدىڭ زياتكەرلىك مەنشىگى مەن مادەني يگىلىگىنىڭ تۇتاستىعىن ساقتاپ, ارحيۆ ءىسىن جەتىلدىرىپ, اۋقىمدى جوبالاردى جۇزەگە اسىرعاندارىڭىز ءۇشىن العىسىم شەكسىز», دەپتى مينيستر ءوز قۇتتىقتاۋىندا.
ءىس-شارا بارىسىندا قاتىسۋشىلارعا «ارحيۆ – 2025» باعدارلاماسى بويىنشا اتقارىلعان جۇمىستار مەن قول جەتكىزىلگەن ناتيجەلەر تالقىلانىپ, بەينەروليكتەر مەن كورمە ماتەريالدارى ۇسىنىلدى. سونىمەن قاتار ارحيۆ مەكەمەلەرىنىڭ ماتەريالدىق-تەحنيكالىق بازاسىن جاڭعىرتۋ, تسيفرلىق جۇيەگە ەنگىزۋ باعىتىندا اتقارىلعان جۇمىستار تانىستىرىلدى.
اتاپ ايتار بولساق, بەس جىلعا جوسپارلانعان باعدارلاما اياسىندا گەرمانيا, پولشا, چەحيا, تۇركيا, فرانتسيا, ۆەنگريا, ءۇندىستان, يران, ەگيپەت, قىرعىزستان, رەسەي, ازەربايجان, بەلارۋس, كاتار رەسپۋبليكالارىنا عىلىمي-ەكسپەديتسيالار جىبەرىلىپ, ناتيجەسىندە 913-1990 جىلدار ارالىعىنا ءتان, قازاقستان تاريحىنا قاتىستى 7 000-نان اسا قۇندى قۇجاتتار جيناقتالىپ, عىلىمي اينالىمعا ەنگىزىلدى.
بۇلاردىڭ ىشىندە: 918 جىلى تەمىر حاننىڭ سايبەك حانعا ەلشى جىبەرىپ بۇرىندىقپەن مامىلەگە كەلۋى تۋرالى دەرەكتەر جانە شىعىس تۇركىستان حالقىنىڭ تاۋەلسىزدىگىمەن بوستاندىعى ءۇشىن كۇرەسكەن وسپان باتىر تۋرالى نۇرعوجاي باتىردىڭ ەستەلىكتەرى قاتارلى ماڭىزدى قۇجاتتار بولسا, كەلەسى كەزەكتە رەسەيلىك ارحيۆ قورلارىنان الىنعان قازاقتىڭ كۇيشى قىزى دينا نۇرپەيىسوۆا مەن ءبيشى شارا جيەنقۇلوۆا قاتىسقان قىسقا بەينەسيۋجەتتىك مۇرالار ارحيۆ قورىنا ەندى.
ورتا ازيا جانە تۇران كارتاسى. 1832 جىل. چەحيا ۇلتتىق كىتاپحانا قورىنان الىندى.
التىن وردا بيلەۋشىسى ءاز جانىبەك حانعا ارنالعان قولجازبا. 1350-1351 جج. تۇحبەت ءال-حاقان
