فوتو: قتج
«جولاۋشىلار تاسىمالى» اق مالىمەتىنشە, ۆاگوندار سىناق كەزىندە جالپى ۇزىندىعى 10 مىڭ شاقىرىمنان استام باعىتتارمەن ءجۇرىپ ءوتتى. مارشرۋتتار قاراعاندى, تاراز, شىمكەنت جانە وسكەمەن قالالارىن قامتىدى. تەست ناتيجەلەرى ۆاگونداردىڭ تەجەگىش جۇيەلەرىنىڭ سەنىمدىلىگىن, كليماتتىق جابدىقتاردىڭ تۇراقتىلىعىن جانە ءارتۇرلى تەمپەراتۋرالىق رەجيمدەرگە بەيىمدەلۋىن راستادى.
سىناقتار كەزىندە سىرتتا اۋا تەمپەراتۋراسى سىرتتا -10°C جانە ودان دا تومەن بولعانىنا قاراماستان, ۆاگون ىشىندە +22°C دەڭگەيىندە تۇراقتى ساقتالعان.
جاڭا Stadler پويىزدارىنىڭ العاشقى رەيستەرى 2026 جىلدىڭ قاڭتار ايىندا ىسكە قوسىلماق. ولار «نۇرلى جول – الماتى-2» جانە «نۇرلى جول – سەمەي» باعىتتارىندا قاتىنايدى.
2025 جىلدىڭ سوڭىنا دەيىن بارلىعى 51 جاڭا ۆاگون پايدالانۋعا بەرىلەدى. ونىڭ ىشىندە 21 كۋپە, 21 پلاتسكارت, 3 شتابتىق جانە 6 ۆاگون-ەلەكتروستانتسيا بار.
جولاۋشىلاردىڭ جايلىلىعى باستى نازاردا: ءار كۋپە جەكە كليمات-باقىلاۋ جۇيەسىمەن, روزەتكالارمەن جانە USB-پورتتارمەن, سونداي-اق جولسەرىكتى شاقىرۋ جۇيەسىمەن جابدىقتالعان. كورۋ قابىلەتى شەكتەۋلى جولاۋشىلار ءۇشىن دە بەلگىلەر قاراستىرىلعان.
ۆاگونداردىڭ كونسترۋكتسياسى ەلدىڭ وڭتۇستىگىندەگى ىستىق كليماتقا دا, سولتۇستىكتەگى سۋىققا دا توتەپ بەرۋگە ارنالعان. ءاربىر ۆاگوننىڭ قىزمەت ەتۋ مەرزىمى 40 جىلعا دەيىن, ال تەحنيكالىق قىزمەت كورسەتۋ كەزەڭى 20 جىل دەپ بەلگىلەنگەن.
